غدانا بالمطعم الايطالي Don Mario’s

مســـــــاكم الله بالخيــــــــر

قبل جم يوم سألتكم عن مطعم ، وللأسف بعضكم ماعرفتوه ، عاد توكلت على الله ورحته

المطعم الإيطالي
Don Mario’s

على البحر ، تدخلون له من مواقف مطعم جيليز ، يصير بعد روبي تيوزديي ، مقاااابل ميس الغانم ، اهم ثلاث مطاعم اثنين جدام وواحد ورا ، الي ورا ومدعوس ومايبين الا اسمه بالغصب هو دون ماريوز

رفيجتي قالت لي نحجز له لأنه زحمه ، عاد أنا رحت من الساعه 11 ونص الصبح حجزت ، لأنه رقمه للأسف موموجود بالنت ولا بالبداله !
بس لعيونكم بحطه 22475987

رحت وحجزت طاوله ، كانت العزيمه بمناسبة عيد ميلاد اخوي ، وسألتهم اذا عندهم كيكه + يغنون ؟ قال لي اي أما أييب الكيكه أو أطلبها منهم (من 11 دينار وفوق) المهم انا وديت الكيكه معاي وسويناله مفاجأه

هذا هو شكل المطعم من بره

وهذا من داخل ، دائري من الداخل ويطل على البحر، فيه قعدات خارجيه بس كان الجو مغبر مايساعد

هذي الــ Menu

ويابوا لنا ماي + مقبلاتهم ، عبارة عن تشكيله من الخبز + طماط + زيتون مطحون ، صراحه مادري عن طعمهم ماجربته شخصياً لأنه ماحب هالسوالف ، بس الشباب قضوا عليه لوووول

الحين بتشوفون الأكل الي طلبناه ، بس تكفون لا تسئلوني عن الأسامي لأنها كانت غلجه هههههههه
هذا الطبق طلبوا منه 4 ، يقولون لذيذ ، عباره عن باستا ومعاها مشروم ودياي (هذا الي أذكره) مع صلصه بيضا ، وبتشوفون بالصوره وراااا يم البيبسي أكو طبق فيه أشياء مادري شنهي بس هي من ضمن المقبلات الي طلبناها ، اخواني واعيال خالتي ياكلون ، أقولهم شنو هذا عاد ريحته زفره ، يقولون اي حلو بس ماندري شنو يمكن اخطبوط وهذااا ذيله شوفيه شوفيه خخخخ

وهذا الستيك ، ودام حطيته خلأتكلم عن الأسعار ، نسبياً الأسعار كلها معقوله بعني من 3 دنانير الى اربعه ، بس الستيك كان سعره مبالغ فيه ، كان بــ 8 دنانير وكسور !! ولد خالتي يقول لأمي (لأنها اهي بتدفع) كلنا بنطلب ستيك خخخخخ ، وهذي صورته ، نمونة الستيك حتى مو ذيج الستيكه الي تبرد القلب

وهذي الباستا وحده بصلصة بيضا والثانيه حمرا

وهذي بيتزاااا مارجريتااااا الي عشانهااا بس تعنيت للمطعم ، طلبنا 3 ، وصراحه كانت لذيذه لأنها خفيييفه وبسرعه تنزلط

أخيراً ، هالصوره تبين لكم القعده داخل المطله ع البحر ، القعده الخارجيه ، صراحه لو الجو حلو بتكون القعده بره أحلى

رايي بالمطعم ، يستاهل ان الواحد يجربه مره وحده ، وماشوف فيه زود انه يكرر الزياره لأني ماشفت فيه أكله مميزه بعد مادري عن الأكل الي أهلي طلبوه ، ماجربته لأني ماحبه ، فانتوا روحوا وحكموا

وللعلم ، الطلبات الي طلبناها + المشروبات من بيبسي وعصير طلع الحساب النهائي 62 دينار إلا ربع
أشوفه زين نسبياً ، ولكن أرد وأقول سعر الستيك مبالغ فيه + سعر المشروبات الغازيه ، يعني قوطي البيبسي الي بالجمعيه بـ 90 فلس ، بالمطعم بدينار ، اشدعواااااااه ، والله للحين شاكه بالسعر ، الي تروح تجيكه وتصحح لي اذا غلطانه

وبس سلامتكم وتعيشون ، وانتظروني بتقرير ثاني ، لأنه حلت لي السالفه

ملاحظة
ياربي شووويه عدد الصور بالتعقيب بس 10 صور ، الواحد مايقدر يعبّر عن شعوره وهو يتكلم >_<