مع السلامه ماليزيا لآخر مره

السلام عليكم
هذي السنه فعلا قلت مع السلامه ماليزيا لآخر مره
توني راجعه من ماليزيا الصراحه وايد تغيرت عن قبل والسبب العرب رحت لها 2024 2024 و بس أول مره كانت أحلا مره شعبها ( الماليزيين ) ودود ولا يزال وأسعارها رخيصه حيل .معروف إن لبس الماليزيين وايد محتشم وودوديين حيل وإذا شافوج خاصة في المصلى أو المسجد يسلمون بحرارة بس لا يحوشج معاملة الصينيين وايد شايفين نفسهم ومتحررين والله يعينج إذا تبين تسألينهم عن شي نفسهم شينه ،
اسعارها هذي السنه واييد غاليييية عن أول ما يسوى مشترى وشيلة الاغراض . اسعار التكاسي نار إذا صادفتي ولد حلال يستعمل العداد ممكن المشوار إلي بـ 12 رنج يوصلج تكسي ثاني 40 أو 30 يعني بوق أشكره .
بوضح ليش العرب هم السبب وخاصة الخليجيين :
1. يقطون افلوسهم على شي ما يسوى السعر إلي دافعة يعني إذا الشي بـ 100 نشتريه بـ 300 ( مسافر وبستانس) ليش لاقين الفلوس بالشارع.
2. في ناس ما حلاتها تطلع من ديرتها اتفشل بتكلم عن كم موقف شفته السنه هذي من مواقف كثيره .
أ. كنت رايحه الإكواريوم والمكان واايد حلو خلف الله على إلي عندنا وصادفت خليجي مع زوجته تخيلوا يشرب ماي ويكته من حلجه علي الحيوانات منتهى القذارة ( الله يخليكم وين يحترمونا إذا ما احترمنا نفسنا) .
ب. في البرجين قاعديين في كافيه ولا ذاك الخليجي معاه زوجته امنقبه ما اتبين عيونها وشغال الريال بوس على الخد والراس لوع جبدي إفششل شنه مو شايف خير اشتعوه ما يقدر يصبر لين يروح الفندق . وهذا الموقف تكرر مره ثانية في شارع العرب بس وحده سفور بس الأفظع إنها تجاريه في البوس .
ج. أفاموزا عرض الفيلة اعيال الأوادم كلها قاعده إلا إعيالنا نقزه حتى السور نطوه ودخلوا داخل عند الفيله .
د. كنتاكي في كوالا لمبور قعدت مع بنت يمنيه الله يستر عليها خوش وحده بنت تدرس في ماليزيا جايه مع صديقاتها قعد جنبنا رجل خليجي كبير في السن مسكينه قال لها ممكن أقعد رضت اتحسبه زوجي وقعد يسألها وهي تجاوب على نياتها ليما قال لها ممكن اتعرف إهنيه افطنت المسكينه إنه مو زوجي بس صج حقدت عليه رجل كبير والبنت من سن عياله ووحيده بدون أهل اشلون يستغلها بهذي الطريقة الوقحة بعد يومين شفته بالسوق مع زوجته وولده كبر البنت تقريبا واعتقد إن ولده الصغير .

س. سوالف الخليجين البايخه إلي كل واحد حاضن زوجته ويمشي معاها ولا لازق فيها بالأصنصير أشتعوه كلنا اعيال قريه وكلن يعرف أخيه شنو هذي الرومنسية من وين أطلعت أعتقد إن ما يجوز شرعا وبعدين مو لايق وفي مثل شعبي ينقال إذا الشي ما توالم مع صاحبه .
3. صار لي موقف يوضح كرههم الخليجيين . إلي راحت فندق رويال بنتانج بشارع العرب شافت موظف الإستقبال شكله صيني وهو ماليزي مايع اكلمج ابشوفت نفس شنج مو فاهمه جم مره يتهاوش مع الخليجيين وينرفز الواحد . الموقف إلي صار لي إني أخر يوم لي بالفندق بروح بننغ وبرجع مره ثانية لنفس الفندق طلبت من الموظف إن يحجز لي غرفتيين كنكت ( بينهم باب ) ووريته اورقة الحجز وقعد ساعه يطقطق بالكمبيوتر تقولين اسكت رحت بننغ ورجعت ولا ما في إلا غرفتين بنفس الطابق وبعيدين عن بعض كلمت الموظف قال ما عندنا شي مضمون المهم نقز الماليزي وقعد يكلمني بعصبيه ان الفندق كله خليجيين وكلهم يبون غرف متلاصقه وإنه ممكن يلقالي غرفه باجر قلت له خلاص باجر بجيلك إنت وتشوفلي موضوع الغرفه تتوقعون شنو ردة فعله قال : انتوا يالكويتيين ما تثقون بالناس والله وكيلكم تنرفزت وتخانقت معاه على قلة أدبه بس بينلي هذا الموقف مدى كررههم لنا .
وغير هذا اشياء ووايد اتخلي الواحد يقول( رغم جمال الطبيعه ) بس مع السلامه ماليزيا .