ابي الطلاق

محتاجتكم ضروري ضروري

السلام عليكم

يمكن عنوان الموضوع يخرع
ولا تخافون مو بس عشان اجذبكم
لا
انا فعلا افكر بهالشي صارلي فترة
حتى استخاره استخرت
وقلت اطرح الموضوع اهنيه يمكن الاقي آراء مختلفه منها المؤيد ومنها المعارض
بس ودي اقرا واشوف احوال وآراء الناس
وراح اكون شاكرتلكم تعاونكم وتفاعلكم معاي

باختصار

زواجي دام فتره من الوقت لا اهيا فتره طويله ولا اهيا فتره قصيره تقدرون تقولون تقريبا 5 سنوات
وعندي ياهلين

بس

مادري شلون احس اني ضايعة ومتلخبطه ومو على بعضي
وايد انقهر من ريلي ومن بعض تصرفاته

خلوني اتكلم عنه شوي عشان توضح الرؤيه

خل اتكلم عن صفاته الزينه

• كريم
• الي اعرفه وشفته لي حد الآن ان صادق معاي
• ما عمري طحت عليه يكلم
• ما عنده خرابيط
• ما يسافر الا للضروره وهذي اذكرها الحين من ضمن صفاته الزينه لكن بعدين راح ارد اذكرها من ضمن صفاته الموزينه بعدين اقولكم شلون
• يحب عياله ومتعلق فيهم
• مرات احسه يحبني بس بالفتره الاخيره مادري صار عندي شك بالموضوع
• نشيط من النوع الي يحب الشغل
• لما نكون بأي مكان مع الاهل شاليه مثلا تلاقونه من النوع الي يفزع ويساعد

صفاته الي تنفرني منه

• دقيق (يدقق على نومتي ، تعابير ويهي ، نبرة صوتي ، كلامي )
• عسر .. يعني اذا بغى شغله وما لقاها ينعفس علي ونفسيه تصير صفر
• اسلوبه معاي مو حلو .. دفش .. ينزر ويزف على اتفه الاسباب .. وهالشي توني منتبهة عليه .. اهوا من زمان جذي بس بديت انتبه ما كنت انتبه لان انا من النوع الي اطوف والتمس العذر لكن من كثر ما صار ينتقدني وينتقد اسلوبي صرت انا بعد انتبه ولقيت ان اسلوبه معاي هجومي وكله مستعد يزفني ، والله العظيم اني لما فترة بسيطه كنت اطوفله ولا احط فبالي من باب ان يمكن مزاجه مو زين اي اكيد انا الغلطانه لازم اتحمل بس اكتشفت ان اهوا مستعد يحملني الغلط ، يعني لو مسويا شغلات وااايد حلوه يدور لما يطيح على الغلط يمسكه ويقعد يناجرني عليه ، ما يحضرني مواقف معينه لكن هذا الوضع بشكل عااام .

• غشمرته ثقيله وغصبن عني اتحملها واذا ما ضحكت وما خذيت الامر بروح رياضيه او ما عطيته ويه اطلع انا العصبيه الي ما استحمل وانا الي مستعده للهواش وانا الي دمي ثقييل .. متعب مو ؟
• من النوع الي يشيل بقلبه وما ينسى اي غلطه اسويها . ومع اول مشكله تواجهنا يفاجئني ان متذكر القديم واليديد ويعددلي ويذكري موقف موقف من تزوجنا والمصيبه ان 3 ارباع الي يقوله يكون ممسوح من ذاكرتي .
• مو مرتاح . يعني احسه انسان مو مرتاح ومومسترخي و كله اعصابه شاده .
• يدخن .
• ممكن يطنقر علي فجأه ويضل فترة ما يكلمني عدل وما يقول ليش متغير الا بعد فتره وتطلع شغلات عاديه بس اهوا يشوفها كبيره كبيره كبيره .

بعدين راح اقولكم سالفة عيد زواجي والسالفه الي قبلها لان كل العيوب الي ذكرتها عنه كنت متقبلتها لكن عقب هالسالفتين صرت بس افكر بالطلاق والي يردني عيالي مابيهم يتبهذلون . وكله اقول دام المشاكل بس بيني وبينه وما بدت تأثر على عيالي فخلاص لازم اضحي عشانهم . واقعد احمد ربي على النعمه واقول غيري ريلها يخونها ويطقها ويسبها على الاقل انا مو جذي . واسكت واشيل الفكره هذي من راسي . بس المصيبه اني صايره مو قاعده اتقبل اي شي منه . باط جبدي واحس عقب السالفتين مضايقه ومحتره وبداخلي شي انكسر ..

الحين يا حبايب قلبي الي ابيه منكم الآتي
قولولي شنو رايكم بموضوعي ؟ عندي سالفه لما افكر بالطلاق والا لأ ؟
ترا لو ما عيالي ما اضل معاه وانا قيلتله وحتى اهوا بعد يقولي نفس الكلام ان لو ما عيالنا جان خلاص ..
انزين تدرون انا شنو الي مخوفني ومرددني
اخاف استمر معاه الحين واتطلق بعدين
اخاف ما اقدر استمر معاه وخيرتي اتطلق
انزين اذا بتطلع فمن الاسلم حق عيالي اني اتطلق الحين صح ؟
لان بعدهم صغار وراح يكبرون على جذي
احسن من لا يتعودون على وضع ويلاقون روحهم بوضع يديييد ..
والله مو ضامنه نفسي لي جدام
الله يخليكم لا تخلوووني
رايكم ..