المرقوق من مطبخ جولي بالصور

السلام عليكم

من زمان ما نزلت موضوع بهالقسم ..

بس الجو يشجع هالأيام وخاصة بالمطر ..

أحلى جو للمرقوقه …

والحين .. بسم الله نبدي

المقادير

1 دجاجه بدون جلد مغسوله ومقطعه اربع قطع

1 بصله مفرومه / 2 ثوم مقطع شرايح

خضار [انا حطيت فاصوليا – كوسا – جزر صغار- بيديان- فلفل علوب حسب الرغبه] مقطعين بحجم وسط

3 طماط بالخلاط

بهارات مشكله + عود دارسين + 4 حبات فلفل اسود عدل + ملح + مكعب ماجي (حسب الرغبه)

نص علبه معجون طماط صغير

العجينه

1 كوب طحين اسمر (بر)

1.5 كوب طحين من الخباز (أو كامل)

ماء للعجن

رشه ملح

الطريقة

* نحط الجدر على النار مع شويه زيت ونحط البصل ونحركه لين يذبل وبعدين اضيف قطع الدجاج مع البهارات والماجي

والثوم ونحرك شويه لين تطلع الريحه الطيبه

* اضيف المعجون واحرك شويه وبعدين اضيف عصير الطماط واضيف عليه ماي حار (راهي) واخليه

على نار عاليه واغطي الجدر .

* في هذا الوقت اسوي العجين[ احط كوبين طحين مع رشه ملح واشغل العجانه.. واضيف شوي شوي ماي وبعدين احط باجي الطحين واعجن لين تصير العجينه مثل عجينه الفطاير.. وأخليها ترتاح ربع ساعه

*والحين يكون المرقه صار لها ربع ساعه .. تضيفين الخضار .. وتبدين تشتغلين بالعجين.

*الحين تقسمين العجينه الى كور .. وتفردين العجينه واخليها رقيقه نوعا ما وبعدين اقصها بهذا الشكل(لازم ترشين طحين علشان ما تلزق)

* والحين المرقه جاهزه .. تحطين قطع العجين يم بعض ..وتخلينها شويه وتاخذين من المرق وتحطين عليها

وتغطين الجدر شويه وبعدين تحطين اللي بعدها وتكرين نفس الخطوات لين تخلصين كميه العجين

* بعدين تغطين الجدر وتخلين تحته حديده وتقصرين عليه وتخلينه لمده ساعه تقريبا

* وجذيه راح يكون شكلها عقب ساعه

* وهذا الشكل النهائي للمرقوق

وعليكم بألف عافية