بنت خالي تشتكي من مرت اخوها دشوا شوفوا شالسالفه وانتو لومكانها شنو تسوون ؟

اشلونكم يا بنات
امس اسولف مع بنت خالي تشكيلي من مرت اخوها لا تخترعون السالفه مو جايده
كل مافي الموضوع انهم خطبوها تقريبا العام وتمت الملجه وكانوا بسوون عرس بس ماصار لان يدتها توفت قبل العرس بشهر المهم اهم دزولها المهر وكان مبلغ حلو ومحترم والبنت حليوه ماعليها كلام وهاديه وما شافوا منها شر بس الي فيها قله السنع يعني ما حطت شي بالشقه حتى استكانه جاي وحده ماحطت كله من خالي وعمتي الي اهي مرت خالي وولدهم المعرس يعني حتى ما يابت كفر او مفارش والادهى والامر انها ولا كأنها عروس بالمره
ماتلبس بدل ايام الملجه اذا زارت بس يمكن مره او مرتين كله جينزات ولبس عملي الي يصلحون حق الدوام او طلعات السوق حتى الدراريع ما لبست دراعه سنعه برمضان مبينين من الرخاص ولا ذهب ولا اكسسوارات اللهم دبلتها حتى شبكتها ماتلبسها حتى ان الشبكه شاريتها اقل من الالف

وجناطها حيل عاديين يعني على الاقل حتى جنطه ماركه لو وحده ترتز فيها حتى لو الماركات الرخيصه يعني حتى عمتي مستغربه تقول وين المهر ؟ وعمتي كلمت ولدها بالسالفه ماتنلام حدها مقهوره والمهر الي عطوها اياه مو شويه تخيلو يا بنات ان قبل جم شهر يمكن بشهر 2 عمتي سوت استقبال لها ولبست بدله زينه اختها الي اصغر منها يمكن عمرها 20 كانت لابسه بدله لوعه على قوله خواتي لاني مارحت انشغلت
ويوم مره رحنا انا واختي سيتي سنتر شفنا قميص بخمسه من المنفشين يلوع الجبد جان تقولي اختي هذا بالضبط قميص اختها الي بالاستقبال انا طبعا طلعت عيوني 10 امتار لي بره من الصدمه والمشكله ان ام العروس مافيها سنع وبااااارده اصلا حتى يوم ودوا المهر امي راحت معاهم عزمنها عمتي قالت لنا ان العروس كانت لابسه بدى جم طويل حده عادي وتنوره جينز عاديه مو من الجينزات الكشخه
يعني مادري الوحده عند حمولتها يتروالي تطلع حرتها بالكشخه انتوا لو صادفكم جنه جذي تواجهونها وتنصحونها ولا تسكتون ؟ لانه ودهم يكلمونها بس يخافون تزعل والحين بعد اهي موظفه ومعاشها زين شهادتها دبلوم وولد خالي ماعليه قاصر ويصرف عليها عدل بس وين ؟
ابي رايكم ياحلوات لان يهمني