دجاج بخلطة الروب الحامضة حدها لذيييذة تعالي شوفي يا عسل

السلام عليكم و رحمة الله و بركاته

اشلونكم حبيباتي و خواتي

لأني أموت على صواني الدجاج و أحب أفنتق فيهم عاد مزهبة لكم اليوم صينية دجاج يا سلام يا سلام طعم و ريحة جنان

سويها و فنتقي لأبو الشباب و لحبايبنا العيال و لحمولتج و أهلج و كل الناس

زهبي صينييتج و لبسي قاعها قصدير كامل و شوفي الحين المقادير و الطريقة :

المقادير :

1- دجاجة 900 جرام ( مقطعة مثل تقطيعة المرقة أفخاذ و صدور و جوانح ) و طبعا كل ما كانت الدجاجة أصغر عندي

زفرتها أقل و طبعا ما في أحلى من دجاج الفريش لأن المجمد فيه زفره فلازم نوخرها و راح أعلمج .

2- بطاط مقطع بشكل شرائح مدورة ( الكمية حسب صينيتج بالنسبة لي سويت 4 )

3- 4 فصوص ثوم مهروسة ( حسب كمية الدجاج و هذا للدجاجة الواحدة )

4- عصير ليمون جاهز أو ( عصري 3 – 4 ليمونات كبار )

5- صلصلة صويا

6- خل أبيض

7- 3 روب كامل الدسم أي نوع ( استخدمت نادك )

8- زعتر

9- ملح

10- بهارات دجاج

11- هيل حب كامل

12- قلاص وسط ماء حار

13- حبة ماجي دجاج الحمرة

الطريقة :

1- قطعي الدجاجة إلى أفخاذ و صدور و جوانح كما في الصورة

2- بعد تنظيف قطع الدجاج عدل بالماء ، رشي اشوية صويا و ليمون و خل و قلبي القطع عدل بعدين افركيهم

بالثوم المهروس عدل مع البهارات و اشوية ملح ( علشان نوخر الزفرة بإذن الله ) و غطيها بنايلون خلي قطع الدجاج تنقع ن

ص ساعة إلى ساعة كما في الصورة

3- الحين نصب الروب فوق الخلطة بعد التنقيع مع باجي عصير الليمون و حطي اشوية زعتر مقدار ملعقة سكر و خلطي

عدل كما في الصورة

4- زهبي الصينية و فرشي قاعها بقصدير و قطعي البطاط دوائر و حطيهم بالصينية و حطي جم حبة هيل مدار الصينية ( 6 – 10 ) حبات مثل الصورة

5- حطي قطع الدجاج في الصينية و وزعيهم على مدارها و كبي باجي الخلطة مع قلاص صغير أو وسط ماء حار مذوبة فيه

حبة ماجي دجاج الحمرة مو الزرقة قليلة الملح فوقهم ( ممكن تستغنين عن الماجي و الماء الحار بزيادة عصير الليون مع الملح مثل ما سويت ) مثل الصورة

6- غطي الصينية بقصدير و لا تسوين فتحات أبد غطيها كاملة و حطيها بالفرن تحت بس مو كلش لأ أرفع من الأرضي

بدرجة يعني مرفوعة عن النار بدرجتين علشان البطاط ما يحترق و خلي حرارة الفرن ما بين ( 130- 160 ) و خلتطبخ

ساعة كاملة

7- الشكل النهائي بيطلعلج ماء الدجاج الحامض بنكهة روب و زعتر حدها لذيذة و البطاط بصير طعهمة عجيب

حموضته لذيذة و قدميها مع خبز أو عيش ، عن نفسي سويتها للغدا فقدمتها مع عيش أصفر علشان أكسر اللون لأن الدجاج

بيطلع أبيض و سويت دقوس و عليكم بألف ألف عافية و هذي الصورة النهائية

هالله هالله بالردود الطيبة و دعواتكم الحلوة حبيباتي