نعطير الملابس

نسيت لاقول شنو بخوري

امل الكويت وعطوراتي خلطه قويه

واي عطر واغلب شي استخدم عطورات الجزيره

شوفي هالافكار بعضها اسويها من قبل وبعضها استفدت منها من المنتدى

اولا….انا استخدم لملابس شامبو..وللتنانير …عامة الغامقه صابون الفيري(لاتستغربين …مال المواعين)

للتشطيف احط كمفرت الازرق……..

ثانيا…الملافع .. نفس الطريقه…لكن غسيل باليد او على ناعم في الغساله ….

ثالثا…احلى حركه تعلمتها….اعبي علبة رشوش(كمفرت +ديتول الاخضر الشخصي) واخففه بشوي ماء..وارش على ملابسي وملافعي قبل البخور…

رابعا..ابخر ملابسي في الدولاب احيانا واذا كنت في مزاج حلو….ابخرها (على المنشر الخاص بالبخور)
ارشها بعطور …..وابخرها بالعود الخام…..
واحيانا ابخرها بأي نوع بخور عندي,,,,,, اهم شئ يكون الخاص فيني……

ودائما..امر بالمبخره والبخور على ملابسي في الدولاب….

العطور اللي أحبها…كثيره
لكن عادة..استخدم اللي مليتها او ما تكون غاليه بالمره وقت التبخير…(مثل اغراء شبيه نارسيسو)
لكن وقت الجد استخدم عطوري الزينه…..ولاخرجت احط عطري المفضل في الشنطه…

من العطور اللي احبها واحسها قويه مع البخور

دراقون من كارتير
جوتشي البني… الين…. واستيلا وغيرها كثير
وطبعا دهن العود ومسك العروس…..اساسيات…لكن وقت الخرجه؟؟ وبعد الاستحمام

هذا اللي يحضرني الان …ولاتنسونا من دعواتكن

انا اعطر ملابسي من عطر باتشولي مع اي عطر فرنسي حده عجيب وبعدين ابخر ملابسي اللي بالكبت والله ان الريحة تتم فيه ايام وما تروح

الغسيل عندج التايد او اومو وطبعا جميع انواع الكومفرت انا استعملتهم واحلى واحد الي لونه برتقالي يهبل

وعند داوني اليديد البرتقالي والبنفسجي

ومن بعدها والملابس على سلة الغسيل احط بخوووور اي نوع بس يكون فاخر

والله الريحه تلزق بالهدوووم ومن بعدها لما اكوي هدومي احط مرشوووش من الرصاصي او من اجمل او من عبدالمحسن صراحه انا اغير وايد من هالعطور ماحب شي واحد

ومن بعدها قبل لا اطلع هم ارد احط بخور الغالي واي عطر فرنسي وبس

سلامتج

انا عاد غرامي الغسيل
اختي سافرت مره معاي وقامت تضحك علي لما شافتني بالليل بعد كل طلعه اقعد اغسل الملابس اول باول .. لا وخلطتي معاي ووالله حتى حبل الغسيل معاي …تضحكون علي شريت شريط ستان لانه سهل بالربط والشيل بالجنطه .. لاني مااحب غسيل الفنادق ولا احب اخذ معاي ملابس بالعوده وسخه عزكم الله …. صحيح مرات اكون تعبانه من اللف والدور وانا على طول بس اقعد من الصبح واغسل الملابس ماعدى الثقال اتفرغ لهم مثل الجنزات واصلا هذيل دايم اخذ القدم سواء لي او لعيالي معاي عشان بالعوده مااردهم معاي بس جنزات ريلي اكيد لا …لان دايم يحب ياخذ اليديد .
المهم خلطتي الصابونيه على قول الخوات تاجرات الصوابين …
للابيض تايد وشويه صابون مبشور للريحه طبعا واومو وادفانيش …( الخلطه هذي للديره بس )
للملون وهذي مو بس للملون لا بعد للسفر مالي خلق اخذ كذا خلطه …
اومو +ادفانيش + الصابون المبشور ماركه حياة او اي ماركه
للشطف كومفورت بس مو الازرق ( توحمت بريحته وكرهته مع انه حلو وريحته ثابته ) اخذ الوردي اللي بالورد وعلى فكره نازل يديد ريحته وايد وايد حلوه للي يحبون الورد .
وهم على المنشر ونص ناشفين ارشهم بخلطه اي خلطه تحبون افضل من نفس ريحه الكومفورت ..
الاسبوع اللي طاف سويت لي خلطه وايد حلوه
عباره عن كلونيا ورد الورديه كامله وكوب كومفورت الوردي اليديد وفيه معقم نفس طريقه الديتول بس ماركه داك ولا اضيف ماي ولا شي لان داك مخفف وايد … خلطتهم مع بعض عدل وصبيتهم بقرشتين فاضيني من بخاخات الزجاج والباجي رديته بقرشة داك خشيته للعازه لانه وايد …
المهم ترشين هالخلطه على الملابس بس تطلعينهم من النشافه او اذا كنتي بسفر بس يصيرون شويه ناشفين …

حطي مبخرج تحت المنشر بحذر يعني حطي الحامي فوقه واذا ما عندج مبخره انتبهي ان الملابس بعيده عن المبخر اخاف تطيح عليه .
وبخوري للملابس هاليومين سيد جنيد الي بالعلبه البيجيه من الشايع اخذتها لقيتها حلوه بس مو حييل قلت تصلح للملابس .. بس ريحتها مع الورد تينن .
وبالكوي برشاش الكوي نفس الخلطه المعطره … تثبت وايد وايد وايد … وريحتها دبل .
غرامي غسيل الملابس بس مااحب انشر ولا احب اكوي اصفط اي بعد ماتكويهم الخدامه ارتبهم انا بطريقتي لاني علمتها التصفيط على اصوله جنهم بارفف المحلات ماشاء الله …
وعلى فكره اذا حطيتوا الملابس بالكبت وهم مصفطين لا تحطون الصوب المفتوح من التصفيط بالواجه لا حطو المغلق يعني الثنيه جذيه شكلهم احلا وارتب بالكبت والكبت يفتح نفسكم او ماتبطلونه ….
بالكبت ارفف التصفيط بالنسبه لريلي لان ماشاء الله ملابسه وايده … وكلهم تصفيط ماعدى الدشاديش طبعا تعليق وهذيل لهم طريقه عندي ثانيه تعجبكم …
الارفف بكبت ريلي ثلاث انا سويتهم اربعه يبت النجار وضاف لي رف وتحت درجين
الارفف رف للقمصان قاسمته قسمين اليمين والشمال اليمين للقمصان النص كم والشمال للكم الطويل
رف للبلايز .. نفس القمصان
رف للبلايز الرياضيه بسم الله عليه رياضي قاسمته قسمين بلايز وبنطلونات رياضيه
الرف الاخير للبنطلونات مصفطتهم الجنزات على صوب والعاديه على صوب وطبعا بتسفيط البنطلونات لا تضغطون لان تطلع فيهم جفسه خليهم على راحتهم .. يمكن بنات تحبون تعلقون البنطلونات وانا بعد بس ماعندي مكان وبعدين سعه الكبت من داخل كبيره تكفي البنطلون مجفوس جغسه وحده مثل العلاقه ..
اما الدشاديش مقسمتهم بكبت التعليق قسمين وحاطه بينهم ورق الشايع المعطر كحاجز او فاصل عشان الغالي يعرف ايهم اللي لبسها وايهم الي مالبسها يعني مكويه ولا انلبست .. الورق على طول الكبت وملزقته بعلاقه المصبغه …جان زين عندي كاميرا غير الموبايل جان صورت الكبت لعيون النظاف واللي يحبون الترتيب والنظافه .
يمكن تسالون الغتر وينها …. الغتر بكبت ثاني كان كبت للتلفزيون بغرفتي وانا مااحب التلفزيون بغرفه النوم مهما كان … لما يبت النجار خليته يسويلي علاقه مثل كبت التعليق وحطيت فيه الغتر والشمغ كلها وبنفس الفاصل لنفس السبب
وطبعا ريلي ما يعلق لا يقط على الغنفه او مرات على السرير بعد …. وانا ايي واشيل انا قيلتها عادي مع اني اتنرفز خاصه اذا كنت برا وييت ولقيته نايم ينام والديباج فوقه وفوق الديباج غترته او ملابسه … مرات مو دايم واضطر اشيل واصفط او اكوي بعد اذا حيل معفسين .
الكبت فيه خانات وايد ماشاالله بس انا ماخذه الحصه القليله منه لاني اصلا مااحب اصفط ملابس ملوت الطلعات اعقلهم هم وقمصان النوم والشوفينيره للملابس الداخليه والبيت والبجامات بعيد عن اغراض ريلي وهو حاطه ملابسه وبجايمه بالادراج اللي بالكبت ومكمله بادراج كبت الغتر الدلاغات واكسسواته مثل الاحزمه وغيرها ….
لااحد يقولي صوري والله ماعندي كاميرا لاني مااحب التصوير بس شكلي عشان مثل هالمواضيع باشتريها …
ها اشرايكم لااحد يقول لي سنعه …. لاني بيتوتيه وماكو شغل غير كل يوم حوسه وترتيب … امس امي قالت لي ليش ما ييتي بيتنا قلت لها قاعده ارتب الكبت ضحكت مرت اخوي وقالت انت كله جذيه ماعندج غيرهالترتيب قلت ضايق خلقي وعيزانه اطلع برا ماشاالله الكويت وايد حاره وربي يحفظ هالديره كله غبار والبيت مغبر ويبيله تنظيف اول باول … مع انه عندي خدم بس والله يابنات مااحسهم يبردون جبدي بالتنظيف .
ووووووووووووووووووووووبس شكلي قرقتكم وايد