أجمل قصيده في ضياع الطير

بسم الله الرحمن الرحيم

السلاااام عليكم ورحمة الله وبركاته

هذه القصيده اخذت المركز الثاني في مهرجان الصقور في ابو ظبي

وهي عن ضياع الطير …..

للشاعر مشعل الحبيني …..

البارحه ياحسين مركاي كوعي \\ من العشا لين اذن الفجر ياحسين

ماغير اسلي خاطري بالدموعي \\ مثل الذي يقضي الدين بالدين

وكل السبب طيري حسين الطبوعي \\ النادر اللي شوفته تطرب العين

اللي اليا مني ندبته فزوعي \\ مثل الشجاع اليا نهموه القريبين

قمت اتذكر تلته لطلوعي \\ بخدن قنصنا فيه حروة سبوعين

مدري ثمان ايام معهن اسبوعي \\ لاشك كنهن يابن الاجواد يومين

وفي تالي المقناص يوم الربوعي \\ اتلى العهد به راح يلوى الجناحين

اقفى ورى خرب مسقر جزوعي \\ متذير واردفت من عقبه طيرين

وسقنا معاهن وسط خدن منوعي \\ اقفن شمال ومبعدات عن العين

وقفت ادربل مير مامن اسنوعي \\ وقالوا جهاز الطير مانسمعه زين

واجهدت رجلي بكل رجمن رفوعي \\ ارقى وألوح ودبل الصوت صوتين

وماقصرو وقت المنافع ربوعي \\ وخذت في جو القطامي نهارين

لاشك طيري مانوى لرجوعي \\ وانا بعد حدرت يم البلادين

ماكان ودي ان المفارق فجوعي \\ ليته موادعني سوات المحبين

الله يلوم الطير بعده يلوعي \\ خلاني اسهر والمخاليق ممسين

عساه يسلم من يدين الطموعي \\ اللي عن النشاد يخفي البراهين

والا الرجال اللي تعرف السنوعي \\ تلقى على حجله مع السبق رقمين

والا عساه بنازيات التنوعي \\ ورزقه على الله خالق الناس من طين

ومما جرى ياحسين قلبي قنوعي \\ لوكان عقبه خاطري صايرن شين

وسلامتكم ……………. هديه للطير وللي يحب الصقور