أخي النائب همسه من بنات الكويت

السلام عليكم و رحمة الله و بركاته ..

هذا الموضوع موجهه فقط للنواب ..

عل و عسى أن يوصل لهم صوتنا ..

أخي النائب ..

إحنا خواتكم و بناتكم بنات الكويت

نوجه لكم رساله ألم من قلوبنا على هالديره ..

نوابنا .. ليش وصل الأسلوب في التخاطب عند بعضكم لهالمستوى ؟؟؟

ما سمعتوا قول الله تعالى (( و لا تنابزوا بالألقاب بئس الاسم الفسوق بعد الإيمان ))
لما نائب يقول لزميله النائب (( يا بيسري .. و إلا يا مرتشي .. و إلا انتهت صلاحية خدمته بالمجلس .. و غيرها كثيييير ))
و إلا لما يقول لمن هو أكبر منه سنا و وظيفه (( مسيلمه الكذاب .. و منتو كفو .. و الشرهه مو عليك و غيرهااا أكثر ))
و إلا لما يخطبون جدام الصحافه و القنوات الإعلاميه و يقولون (( قناة شارع الطرب .. قناة العهر ((و يكرم القارئ)) .. و الساقط اللاقط الكلب النابح (( يكرم القارئ ))… و غيرها ألعن و ألعن …)))
و لما يقول نائب (( مجلس الأمه مو بقاله كل شوي صاكينه )) .. إنزين منو يملك الحق بإحلال المجلس غير الأمير ؟؟؟ امتلكنا الجرأه إن نلف بالكلام و نوجهه للأمير بهالطريقه ؟؟؟
و لما واحد من العامه يطلع بالتلفزيون و أمام كل القنوات الفضائيه يقول (( كرت أصفر للأسرة الحاكمه وهذا إنذار )) وصلنا لهلمرحله من …. تجرأ بليس علينا و خلالنا نتكلم جذي عن الأسره إللي لو نفر الديار كلها ما نلقى نفسها و لو ربعها؟؟؟
مو عيب إللي قاعد يصير …؟؟؟
هذي نتيجة الديموقراطيه إن ناخذها و نشوهها بهالطريقه ..؟؟؟
فيه أجيال قامت تتربى على هذا المستوى من الحديث و تتخذكم قدوه للأسف مو بالشي الطيب لا بالألفاظ الحلوه ..

نوابنا ..
الناس وصلتكم لهلمكان عشان تنمون هالبلد مو توقفون عجلة تنميتها و تردونا 100 سنه لورى و كأنا بغابه كلمن يدور الزله على الثاني ..
نوابنا نبي فزعتكم لديرتكم .. ترى الشيطان دخل بينا و الشيطان شاطر …
نوابنا الأفاضل ..
الديموقراطيه هي أن تمتلك الحريه لتقول ما تريد بحيث تحترم ديموقراطية الآخرين ولا تعتدي على حريتهم ..
لكن إللي قاعد يصير .. إنكم تتكلمون بطريقه لا ديموقراطيه تخدش حياء المواطن و إذنه و لكم الحق في قول ما تشاؤون بلا حدود من جنابكم من باب (الديموقراطيه و حرية الرأي ) .. في المقابل إذا أحد رد على كلامكم بنفس الأسلوب أو ما وافقكم الراي ما تتركونه بحاله (من باب الديموقراطيه ) لااااا تقوم الدنيا و ما تقعد إذا أحد ما مشى على هواكم .. و تحشدون المظاهرات و الندوات و كأنا في معركه و العدو من أمامكم و البحر من خلفكم و أكون أو لا أكون بطريقه انانيه بحته و التصفيق يعلى و الله ما تذكرت إلا حال الشعوب اللي ما يحتاج أذكرها يطلع قائد و يقول كلمه و يصفقون الناس إللي أشك إنهم فهموا كلمه وحده .. ورفع الشعارات .. وسالفة فيه ناس تحرك ناس إللي طالعين فيها توكم .. شسالفه قاعدين بدولة بوليسيه ؟؟ هذي ديرة الصباح ديرة الخير و البركه من فضل الله علينا حطنا تحت حكم الصباح و إللي مو مقتنع و مو عاجبه بس أبيه يلف يمين و يسار و فوق و تحت و يشوف حال الشعوب من حوله و يقارن بحاله ثم يحمد الله على النعمه إللي هو فيها ..

نوابنا الأفاضل ..
صرخة ألم نوجهها لكم ..قال تعالى (( تعاونوا على البر و التقوى و لا تعاونوا على الإثم و العدوان ))
و قال جل علاه (( و اعتصموا بحبل الله جميعا و لا تفرقوا ))
فهل بعد قول الله قول ..؟؟؟؟

و شكرا ..