ابي طريقة مجبوس الدياي & اللحم الكويتية :)

كلللوش
ماشاءالله تبارك الرحمن
توني ادري انج تزوجتي
ياقلبي عسى الله يتمم عليج ويسخره لج

مجبوس اللحم
اللحم مغسول تحطينه بماي دافي عالنار يطبخ بدون شي لما تبدا تطلع الرغوة البيضا تقصرين عليه وتشيلين الرغوة لحد ما تختفي
تحطين بصلة مقطعة وبهارات عدله مسمار -هيل-دارسين والملح
وخليه يطبخ اقل شي ساعتين (حسب حجم قطع اللحم )
بهالوقت تسوين الدقوس والحشو
الحشو بصله مقطعه ناعم بالمقلى عالنار لما تتحمر تضيفين ماي شوي شوي راح يصير لون البصل بني

ضيفي البهارات الناعمة المخلوطة والكشمش المنقوع بماي دافي والصنوبر المحمر او اللوز وشوية زيت وقلبيهم
غسلي العيش ونقعيه ونصيحه ماكو على عيش التموين الحين اذا ماعندج كنتري او انديا جيت
ونقعي شوية زعفران بماي ونقطة ماي ورد
استوى اللحم شيليه
بجدر ثاني على النار حطي سمنة مازولا وبهارات عدله هيل ومسمار وحطي العيش المغسول وصبي عليه من ماي اللحم لكل كوب عيش كوب وربع ماي وخليه يغلي لما جريب ينشف مايه قصري النار وصبي الزعفران على طرف وحطي الحشو يمه وغطيه بقصدير وخليه على نار هاديه حيل ربع الى نص ساعة
اللحم مسحي عليه بخلطة الزعفران او ممكن تذرين عليه دارسين مطحون وقليه بزيت (خليه يبرد عشان ما يطشر زيت بالقلاي )
او بالفرن يتحمر

مجبوس الدجاج
تبلي الدياية من داخل ببهارت
وحمسي زيت وبصل بالجدر وحطي الديايه فوقهم وحطي عليها بهارات عدله وهيل مطحون وصبي ماي يغطي الدياية وضيف الملح وخليها تطبخ ساعة او ساعة ونص حسب حجمها
ونفس مجبوس اللحم سوي العيش والحشو
والدياية خلطي معجون طماط مع بهارات شوي ودهني الدياية واقليها
وعليج بالعافية يا احلى عروس