بسم الله الرحمان الرحيمو الصلاة و السلام على أشرف المرسليننبينا محمد صلى الله عليه وسلم
قوة بنات
شلونكم ؟
انا في بالي اسافر مصر لمدة 8 او 9 ايام جذي تغيير وهالمرة بودي اروح الاسكندرية وعندي كم سؤال
1- على حسب كم موضوع قريته استوعبت ان بورتو مارينا بعيدة عن الاسكندرية ساعة تقريبا من الاسكندرية ، حبيت اسال هي منتجع يعني الواحد يروح ويستانس فيه النهار كله مثل الخيران عندنا وجذي يعني والا لازم ننام فيه؟
2- مرسى مطروح وين تصير وشكثر تبعد عن الاسكندرية ؟
وهل هي احلى والا بورتو مارينا ؟
3- ابي اسامي فنادق حلوة ويكون سعرها معقول بالاسكندرية
قوة بنات
شلونكم ؟
انا في بالي اسافر مصر لمدة 8 او 9 ايام جذي تغيير وهالمرة بودي اروح الاسكندرية وعندي كم سؤال
1- على حسب كم موضوع قريته استوعبت ان بورتو مارينا بعيدة عن الاسكندرية ساعة تقريبا من الاسكندرية ، حبيت اسال هي منتجع يعني الواحد يروح ويستانس فيه النهار كله مثل الخيران عندنا وجذي يعني والا لازم ننام فيه؟
2- مرسى مطروح وين تصير وشكثر تبعد عن الاسكندرية ؟
وهل هي احلى والا بورتو مارينا ؟
3- ابي اسامي فنادق حلوة ويكون سعرها معقول بالاسكندرية
بصراحة احنا نروح نقعد في شقة مفروشة … بس كفنادق .. على حسب تبين جم نجمه ؟
اكو فندق الشيراتون – فندق فلسطين هذول بالعلالي …
عندج فنادق نص نص بعد .. قاعود و جده و مكة …. بس مادري شنو مستواهم يعني …..
مو وايد اعرف بسالفة الفنادق هناك لانه نقعد بالشقة ..
و الاسكندرية فيها وايد اماكن تروحيلها .. اذا تحبين التسوق و المولات ..
عندج : مول سان ستيفانو .( من تركبين التاكسي قوليله بس سان ستيفانو و اهو يوديج ) حلو و يديد و فيه محلات متنوعه
عندج جرين بلازا ( في منطقة اسمها سموحة ) وايد حلو و متروس محلات هدوم و جناط و كل شي .. و فيه فندق هيلتون و سينما و جم مطعم .
عندج كارفور سيتي سنتر .. .. فيه كارفور .. و فيه محلات اديداس و guess و اسبريت و كذا ماركة بعد و فيه العاب حق اليهال حلوة و مطاعم وايد و سينما .. ينفع حق طلعه عائلية
و الاسواق الشعبيه عندج المنشية .. حلو و شعبي على ذرب و فيه محلات وايد متنوعه .. هدوم و خامات و عطارة و تحف ..الخ الخ – العمود ( وااااااايد شعبي و مشي حالك .. اذا تتكيفين روحي .. )…
الاسواق العادية … عندج محطة الرمل .. شارع صفية زغلول .. محطة الرمل كلها تقريبا منطقة سوق و محلات و سينمات و مطاعم .. صايرة نفس السالمية عندنا … فيها كذا سينما و كذا مطعم ..ليتل سيزر … مكدونالدز .. هارديز .. كنتاكي .. باسكن .. و مطاعم كشري و فلافل .. ( اي صج على طاري الفلافل ترى في اسكندرية يسمونها فلافل هم بعد مو طعمية .. )
انصحج بعد تروحين حدائق المنتزه .. هذي كانت حديقة قصر الملك فاروق .. الحين صارت منتزه شكبرررررره تفرينه بالسيارة ما تخلصين !! تخيلي كانت حديقة قصر شخص واحد !!
و تروحين قلعه قايتباي … الي انبنت من بقايا منارة الاسكندرية الي اهي احد عجائب الدنيا السبع .. و حلوة يأجرون هناك قواري و حصن و ترمس و برد و خرابيط وايد .. تقدرين تدشين داخل و تطالعين القلعه من داخل .. و ساعات يسوون فيها معارض كتاب و عروض سينما …
و طبعا عندج مكتبة الاسكندرية …………. وااااااااااااااااااااااااااااااااااااااااااااايد حللللللللللللللوة واااااااااااااااايد حلللللللللوة و فيها شغلات وايد متنوعه .. متاحف .. معارض .. كتب اشكال و الوان و كل انواع الكتب الي تبينها لأي كاتب من اي جنسية و بكل اللغات .. و اهي بس لو تدشينها تتطمشين وناسه .. و تعتبر وحده من اكبر المكتبات في العالم .
و يا حلات التمشي بالليل على كوبري ستانلي … و البحر دار مادارج و الهوا يلفحج … واااااي شوقتيني صج صج صج والله شوقتيني ..
بالنسبة للمطاعم ودي أقولج على مطعم تروحين تجربينه .. انا شخصيا وايد احبه .. اسمه مينوش .. اكل ايطالي .. صاير في " رشدي على البحر " … ذوقي الكول سلو مالتهم .. و عندهم وايد أطباق حلوة انا احب اروحه صراحة ..
و اكو بنفس المبنى مال مينوش مطعم اسمه لاكازيتا .. هم بعد ايطالي و هم بعد اكله يهبللللل ..
و اسكندرية طبعا مشهورة بالاسماك … فلازم تروحين تاكلين سمج في راقودة ..
… وين بعد وين بعد …
عندج مطعم اسمه بلبع .. يصير في الداون تاون …. مشويات و اكل بحري وايددددددددددد حلو و قعدته تهبل و ساعات يكون اكو فرقه تعزف عند كل طاولة شوي
وناسه مره عازف عود يحوس عند كل طاولة و ينقي واحد و يغنيله.. عاد مسكين علق على ولد خالتي لأنه عصصصصصصصصصصصصصصصصصل ضعيف كلش كلش … و بعدين قام يتغزل ببنت خالتي و عيونها الحلوة … لا تخافون ريال عود مو ياهل .. يعني كنوع من الوناسه مو اكثر ..
و اذا تذكرت بعد مكان في اسكندرية بقولج …
اما بالنسبة ..
لايهما احلى بورتو مارينا و لا مرسى مطروح .. اممم انا ما رحت بورتو مارينا .. بس رحت مرسى مطروح
اتوقع بورتو مارينا شاليهات و منتجع و رزة و كشخه و سياح … مرسى مطروح أبسط من جذي …. انا حبيت بصراحة مرسى مطروح وايد
مدينة بريئة جذيت تحسينها …
تبعد عن الاسكندرية حوالي ساعتين و نص الى 3 ساعات .. و تقدرين تحجزين بالباص (سوبر جت ) و تروحينلها …
تاجرين شقة مفروشة او شقق فندقية أو اوتيل .. و مرسى مطروح متروسة اوتيلات و كلهم زينين …
المدينة نظيفة و الماااااااااااااي فيها عجيييييييييييييييييييييييييييييييييييب و فيها شواطئ من اجمل ما خلق ربي .. صخور و جبال و شغلات وايد حلوة
عندج شاطئ كيلوبترا وايد حلو …
شاطئ الغرام ( فيه صخره كانت ليلى مراد قاعده تغني عليها في فيلم لها اسمه شاطئ الغرام ) و الناس يروحون هناك يصورون على هالصخرة ..
و شاطئ الابيض … Obaid .. بالضمة مو فتحة ..
و صراحة لا تطوفين منتجاتهم اليدوية .. دراريع و جناط شغل بدوي … شريت منهم جناط حق التلفون يهبلوووون ..
و هم نعناعهم وايد حلو …
و المدينة صغيرة و اسعارها رخيصة حيل و تكاسيها كلش رخيصة فما تحاتين فيها ولا شي و امان جدا ..
و تصير غرب مدينة الاسكندرية .. يعني قريبه على ليبيا .. و سكانها يكونون من العرب " بدو " . بس سكانها قليلين جدا جدا جدا و اهي المدينة أصلا معتمدة على المصيفين الي يروحولها .. و الحين بتلاقينها حلوة و مو زحمه …
ماقدر افيدج عن بورتو مارينا ..
شوقتيني ودي اروحح
عاد انا ادرس في القاهره ودي ازرق بو جم يوم
يعني صايرة نفس شرق بالنسبة للكويت .. شلون شرق اهي كانت منبع الكويت القديمة و الناس كلهم طلعو منها .. و تلاقين فيها كل شي تراثي و أصيل ؟
نفس الشي منطقة بحري … محلات الكبدة الاسكندراني .. و تشوفين الي يصنعون السفن يدويا عالبحر في مكان اسمه ( السيالة ) … تروحين تشوفينهم ليلحين يسوون قوارب صغيرة و ينزلونها بالبحر القعده هناك " تححححححححححححفة " …
و التجول عموما في منطقة بحري حلو و يخليج تحسين بروح اسكندرية الاصلية … و سوق السمج هناك و قهاوي و شغلات وايد ..
بالنسبة للمجمعات اكو بعد مجمع طحنا عليه السنه الي طافت عجبني بصراحة .. اهو مو وايد كشخه بس حلو حق التسوق و الصوايغ … مريح بالتسوق ما يتعبج …
اسمه " زهران مول " في منطقة " سموحه " … اهو صاير تقريبا 4 طوابق … بس صغار مو كبار … و مريح بالتسوق لأنه صاير على حرف u يعني تدشين الدور بالاسانسير او الدري … تمرين على كل المحلات و تردين تطلعين عالاسانسير .. يوديج الدور الي عقبه ..
ما فيه ممرات و حوسه و لوية … و فيه محلات وايد .. جواتي تكرمين .. و هدوم .. و مشغولات يدوية و تحف و شغل حق الصوايغ …
و تحت المجمع اكو سوبر ماركت " زهران " … هم حلو اذا تبون تشرون ماجله اذا بتقعدون بشقة …
و المجمع نفسه فيه سينما .. انا احب سينمتهم بصراحة .. 4 قاعات و مريحة و نظيفة و حلوة ..
اي صج ما قلتلج … اذا تبين تشترين ماجله و أغراض ممكن تتعاملين ويا بقاله عاديه .. و يوصل لي عندج بالشقة …
او تروحين سوبر ماركت .. و السوبر ماركت الاشهر في اسكندرية هو : فتح الله … لهم مليون فرع !
و كارفور ..
و زهران ..
و هذا مجمع سان ستيفانو
و هذي مكتبة الاسكندرية
كوبري ستانلي
السيالة
مسجد المرسي ابو العبااااس
منقووووووووول