اقروا ((الاهتمام الام الرائع ببنتها الطالبه

اليوم بعرض لكم طريقتي ونظامي مع بنتي بمدرستها.. بس لاتتوقعون ان بنتي مميزة لا والله بنتي عادية جدا لكن انا حريصة اني اهتم فيها مو لازم تكون نابغة عشان تلاقي اهتمام مني

بنتي بالصف الثاني الابتدائي واحب اهتم بمدرستها

طبعا بنتي تتحمم لوحدها وعودتها كل يوم تحمم اول ماتجي من المدرسة وضروري كل يوم الصباح تغير ملابسها الداخلية كلها

اشيك كل يوم علي شنطتها وانزل كل الكتب وارتبها من جديد عشان ماتكون ناسية كاكاو او فطيرة بالشنطة

وكل اسبوعين اغسل الشنطه بالغسالة مع حقيبة الاكل

وبالنسبة لوجبتها مسوية جدول كل يوم نوع عصير او حليب من النكهات اللي تحبها وفطيرة او كيك او ….
كنت احط لها فاكهة ومكسرات لكن للاسف عندنا بالسعودية مافي تفتح والطفل اللي معاه فاكهة يواجه نقد

وزيادة علي مصروفها حاطة لها بجيب الشنطة الداخلي مبلغ ومفهمتها انه للطوارئ بس يوم تكون ناسية مصروفها او طاحت فطيرتها علي الارض او يكون عندهم حفل ونسيت تقولي وكذا
وكمان حطيت لها بكلة بالشنطة .. ليه؟؟ عشان كانت تطيح بكلتها وهي تلعب وتجلس طول اليوم شعرها مفتوح فهذي احتياط

واحرص يكون معاها معقم اليدين وصابون الشرائح ومناديل

شعرها قبل ماتنام اقرر التسريحة اللي تبغاها بكره واسويها لها بس مااشد شعرها لا اخليه مرخي عشان الصباح يكون سهل علي وتكون مرتبه دايم

ماتنام اذا جات من المدرسة تتحمم وتريح شوية وتبدأ تحل واجباتها لوحدها انا اشرف عليها من بعيد لبعيد والعصر ابدا اراجع لها بعد ماتكون حلت واجباتها والساعة 8 تكون بفراشها وتصحي الساعة 6 قبل موعد روحتها بساعة عشان تاخذ راحتها بالفطور وتكون فايقة

سابقا كنت يوم الخميس احضر لها دروس الاسبوع القادم كلها وكنت مرتاحة جدا لكن الان ترفض وتبغي تلعب وانا مااضغط عليها

اسطر دفترها وارتبه لدروس الاسبوع كلها عشان ارتاح واحط لها استكرات او ازينه برسوماتي

اهتم بالانشطة الجانبية حتي لو مو مطلوبة مثلا عندها ال الشمسية .. رسمت لها شجرة وفيها تفاحات وخليتها تكتب كلمات تبدا بأل الشمسية من عندها بالتفاحات واعطتها ابلتها وشكرتها كثير

احاول اعطيها معلومات خارجية ممكن تسأل عنها الابلة مثلا درس الفقه الاشياء التي لا يجوز الاستجمار بها .. القران اعطيها معني الايات بشكل مبسط

اذا حضرت لها الدرس قبل مااعطيها كل المعلومات لا .. خلي معلومات تاخذها من معلمتها عشان تكون مركزة وماتحس انها عارفة كل شئ وتمل من المتابعة

نصيحة اذا رحتي تسألي عن بنتك واشتكت المعلمة منها لاي سبب لاتقولي صح وانا متعبتني بالبيت وماترضي تذاكر.. لا لانك تعطي معلمتها انطباع سئ عنها ومهما حاولت بعد كذا ماراح تتغير نظرة المعلمة.. خليكي هادية واوعدي المعلمة انك تتابعيها وفي البيت ركزي علي هالنقطة ولاتهمليها

اعطيها فرصة تتكلم عن صاحباتها وانتي احفظي اسماءهم واسأليها عنهم باستمرار عشان تحسسيها انك دايم معاها

احيانا ارسل معاها كيك او شبس لها ولصاحباتها عشان يتشاركون

علمت بنتي كيف تدافع عن نفسها .. في البداية كنت اطلب منها اذا احد ضربها تعلم معلمتها لكن حسيت ان معلمتها طفشت منها وفي بالها ان بنتي زنانة وشكاية .. فقلت لبنتي خلاص خذي حقك بنفسك ولا تشتكي كثير اللي تضربك اضربيها

عشان اخلي بنتي تفكر فيني دايم .. احط لها شكولاته في وجبتها او ورقة صغيرة بمحفظتها واكتب لها كلمات بسيطة تفرح لما تشوفها واول ماترجع من المدرسة تجري تحضني

اسأل عنها بشكل دوري واي ملاحظة اسجلها لها بورقة تعطيها معلمتها لا تستحين وتعدين وتقولين المرة الجاية لا لازم تحسسي معلماتها انك متابعتها بكل شئ.. انا مثلا مرة بنتي المعلمة مصححة كتابها وبنتي كاتبه خطأ وماصوبته كتبت ملاحظة بالكتاب.. شفت نفس الشئ تكرر اتصلت عالادارة وكلمتهم وفعلا لقيت كتاب بنتي المديرة بنفسها مصححة الكتاب

اخيرا دعواتكم ان يرزقني الله بر اولادي وصلاحهم بحياتي وبعد مماتي

انا حبيت اكتب الموضوع بهذا القسم لاني اعرف ان اغلب اللي يدخلو امهات.. فحبيت تستفيدون

منقووووووووول