التخريب على العروس والمعرس بفرحتهم والتنقيص عليهم!

التخريب على العروس والمعرس بفرحتهم والتنقيص عليهم!

السلام عليكم ورحمة الله وبركاته

وعيدكم مبارك مقدما

هالموضوع طرا على بالي من اللي شفته وسمعته وحبيت تشاركوني برايكم فيه
وهل صج في نوعيه جذي من الناس

وقلت انسب مكان اهني قسم العروس

وأوضح كلامي بأمثله::

مثلا:: تي وحده للعروس تقولها وي مادريتي عن ريلج يشارك بالمنتدى الفلاني
وهذا نكه انا ماشفت مشاركاته ولا اعرف المنتدى بس يقولون حده سخيف ومليق
وتافهه وكلامه وسوالفه جنه ياهل بو ثلاث سنوات ……..

**أو وحده تتصل على العروس وتقولها انا حبيبة فلان وفلان يموت فيني
ومو متخلي عني ومتزوجج انتي عشان يرضي امه او ابوه ولا انا عيون
وقلب وروح فلان …….

**ولا وحده تصير لها (للعروس)حاقده عليها وماتحب لها الخير وتسوي نفسها
حبيبه وطيبة وخايفه عليها وتقولها شوفي يافلانه بقولج شي عشان مو بعدين
تقولين ليش ماقلتي لي او ماعلمتيني وخليتني غافله ..انا ريلي يعرف ريلج
ويقول عنه سوالف مو زينه وانه راعي سفرات وخرابيط وسهرات وراعي شرب
برا الكويت وترا بقي ينفصل من دوامه ولولا الواسطات جان الحين اهو عاطل
وانا قلت لج وبريت ذمتي …….!
8
8
8
والكلام طبعا كله جذب بجذب وتأليف من هالمره بس تبي تضيق خلق العروس
وتنقص عليها فرحتها وعيشتها ……

**ولا وحده مره كبيره بالعمر منقهره ليش يخطبون هالبنت ويخلون بنتها فتخرب
على العروس وامها وتروح لام العروس وتقولهم ترا هذيله حاريين وبخله وماعندهم
سنع وتراهم خاطبين بنتي بس رفضناهم قلعتهم محد مزوجهم ماخلو احد ماخطبو
منه ومحد زوجهم وشللي غردكم فيهم أنا اقول دامكم على للحين على البر
افتكوو منهم ومن نسبهم …….

**ولا وحده حاقده ونفس الشي ليش ماخطبو بنتها تروح لام المعرس او لخواته وتقولهم
ترا ام فلان (ام العروس )عوبه وقويه ومحد ييقدر عليها والكل يتحاشها
ومايبون قربهم واكيد بنتها طالعه عليها باجر تأذي ولدكم ويتعب معاها اشلكم
فيهم افتكو منهم ……

**ووحده ثانيه تحط على العروس بلاوي وانها سوت جذي وقالت جذب وكله كلك
بكلك بس عشان تخرب عليهم فرحتهم وتوصل لغرضها واهو التفريق بينهم….

**ولا وحده ثانيه يعني فاعلة خيير قاعده بجمعة حريم ومن بينهم ناس يعرفون
اهل المعرس وتسوي روحها ماتعرفهم وتسمعهم عشان يوصلون الحجي لاهل المعرس
وتقول ترا فلانه بنت فلان كلها تركيب بتركيب الشعر تركيب الضروس تركيب
الخشم مسويه عمليه ومعدلته ومسويه شفط ولا قبل كانت مث الفيل وتافخه خدود
وشفايفها وكلها من قمت راسها لريولها عمليات تجميل ……

**ولا الثانيه تقول ترا انا اعرف العروس من واهي صغيره جلحله ملحه ومافيها
من الزين شي ولا سنع ……….والعروس بالصج ملكة جمال بس الحره
عماة عين وفكر

شرايكم بهالبشر والنوعيه من الناس؟؟!

الله يكافينا ويكافيكم شرهم

تحيااااتي