الجواب الشافي والكافي لكل من سأل عن كريم أملا

مرحبا خواتي..
موضوعي اليوم كنت كاتبته رد على اختي المملوحه23 في موضوعها (كـــريم ( أمــلا ) للتــخــدير …. مــمـــنـــــوووووووووووع …؟؟؟؟؟؟؟؟؟؟؟؟ ).
وبما ان الموضوع حيل يهم بنات منتدانا الغالي حبيت احطه لكم كموضوع مستقل بروحه .

على بركه الله..

اولا: كريم املا كريم طبي للتخدير مصرح فيه من وزاره الصحه الكويتيه وموجود بالمستشفيات الحكوميه بعد، بكميه محدوده جدا ويستخدم لحالات معينه.

ثانيا: الكريم كان لفتره قريبه يباع بالصيدليات والسبراي بعد ولكن لكثرة استخدامه الخاطئ خلوه بوصفه (نفس قصه المضادات الحيويه).

ثالثا: مسألة انه ليش مو متوفر بالصيدليات وبس حريم يبيعونه فمو لأنه مو مرخص لا… لأنه لازم يكون عندكم وصفه عشان تاخذونه. واذا بالخاص يكون متوفر بس بالعيادات المتخصصه ومثل ماقلنا لازم وصفه

رابعا: بقول لكم معلومات عنه وعن طريقه استخدامه عشان تفيدكم وخصوصا تفيد الخوات اللي استخدموه ومانفعهم.

الكريم :عباره عن خليط من نوعين من المخدر(ليدوكين-بريلوكين) كل واحد بنسبه 2.5% عشان جذي تشوفون نسبه 5% على العبوة مالته.
ويستخدم الكريم لتخدير الجلد موضعيا ليمنع الاحساس بالالم اللي يكون مع بعض العمليات مثل ادخال انبوب وريدي (الكاثيتر) او اخذ عينات الدم من كبار السن لانه في بعض الحالات جلدهم ما يتحمل كلش ولحالات قروح الساق هذي الاستخدامات الطبيه البحته. ويستخدمونه بعد في تخدير الجلد لعلميات الوشم (التاتو) والليزر.

طريقه استعماله: اول شي لازم تعرفون ان الكريم يستعمل بس عالجلد، وطريقته انكم اتحطونه وتغطونه بالضمادات البلاستيكيه اللي تجي وياه بالعلبه او حتى بلاستك عادي ينفع، ولما تحطون الكريم ماتقعدون تفركونه عالجلد مجرد انكم تحطونه كطبقه فوقه وتغطونه ولازم تحطونه اقل شي ساعه قبل. بعدها تشيلون البلاستك وتنظفون المكان وخلاص

الاثار الجانبيه: احب اطمنكم انه ما يأثر عالصبغه الجلديه بشي اللي هي الميلانين عشان جذي هو لا يسمر ولايبيض بعد . وتقريبا الاثار الجانبيه قليله واهمها انه ممكن يسبب احمرارطفيف او وخز للمنطقه ولكنه مؤقت فقط ويروح علا طول اما اذا حسيتوا انه ما ناسبكم من اول استخدام وطولت الاعراض معاكم فلا تستخدمونه كلش ومع كريم ببانثين مال الصغار يوم او يومين راح يرد كل شي نفس اول

الحمل والارضاع: طبعا المعروف انه الحامل تبتعد قد ماتقدر عن الادويه وكريم املا المخدر التوصيات اللي جايه من المصنع انه ما يستخدم للحامل الا اذا كانت الحاجه ضروريه اما المرضع فالدراسات ما أثبتت انه يطلع او ما يطلع مع حليب الام عشان جذي لاينصح فيه الا باستشاره دكتور طالما مافي دراسه مؤكده تثبت امان استخدامه في هالفتره.

الحفظ: يفضل حفظه مابين 16-30 درجه مئويه

ولمعلومات اكثر انا حاطتلكم الورقه الارشاديه(الليف لت) اللي تنحط معاه من مصنعه

وهذا الرابط http://www.astrazeneca-us.com/pi/EMLA.pdf

ملاحظات اخيره:

الشركه المصنعه لهالكريم هي AstraZeneca وهي طبعا سويديه ولكن لها 27 مصنع في 19 دوله مختلفه ، يعني مو معناته انه العبوة اللي واصلتلكم تكون مصنوعه في السويد بس اذا عليها شعار الشركه فمعناته بنفس الجوده وتحت نفس المعايير والمواصفات في الصنع.

هذا كل شي اعرفه عن هالكريم . وانا متأكده من كل كلمه كتبتها 100%
واذا عندكم اي استفسارات حياكم الله

ابي من كل اللي استفادوا دعوه حلوة على قد تعبي بالشرح

وشكراا