الطفوله في الحي الشعبي

يقولون اكبر هم الطفل لعبته ؟ !

فعلا اكبر هم الطفل لعبته او طلوع الشارع هذا كان اكبر همنا ايام الطفوله كانت احلى ايام لانعرف هم ولا نشقى بحب وخيانه ولا تبكي فراق غالي عليك .

ايام الطفوله قمه في الروعه وكلن له طفولته بس طفولة الحي الشعبي غير لها لذه وشقاوتها البريئه ..

مادري من وين ابدا طفولتي ؟؟
بس ببداها من هذاك اليوم اللي اشرقت فيه شمس الصباح على صوت الوالد وهو يقوم خواتي للمدرسه طبعا انا حريصه اني اقوم الصبح معهم ولو اني ماادرس للحين صغيره بس اقوم عشان اخذ فسحه مثل خواتي وبعدها اروح افطر واخذ لعبتي طبعا ايامنا مافي مثل اللحين عرايس فله وباربي لا كانت لعبتي سله فيها فواكه او مخده اللبسها فستان اختي الصغيره والعبها كأنها بنتي واسوي نفسي ربت بيت والبس طرحت امي < يعنني حرمه
واقعد اللعب لين يأذن الظهر ولمن يأذن اروح اجلس عند الباب تصك راسي الشمس ماهو مثل اطفال اليوم من زود النعومه اذا شافوا الشمس انصرعوا او صابهم انهيار عصبي > المهم اروح واجلس عند الاب وانتظر خواتي يجون من المدرسه ماهو غلا فيهن لا بس اشوف وش جابوا لي معهم جابوا لي بسكوت ولا ايس كريم < عاد ايس كريم زمان غوار او ايس كريم ابو علك .
عاد سبحان الله ايامنا كان اذا شفت الايس كريم كانك شايف غالي من الفرحه لدرجه انك تقعد تأكل فيه ساعه كامله من الخوف انه يخلص < شفاحت اطفال مو شايفه خير
واذا خلص زعلنا , المهم بعد مأكل الايس كريم انتظر ابوي عند الشجره اللي قدام بيتنا بس المره هذي ماهو انا بس لا معي اختي ننتظره لين يجي من الدوام ولمن نشوف سيارته كنا نتسابق من اللي توصل لابوي اول وحده , نروح للبيت ونتغدا كانت الناس وقت حر وتقيل الا انا مانام انتظر متى يأذن العصر ,

وصلنا عند المرحله اللي الله يذكرها بالخير وقت العصر كان له حماس غير طبيعي من يأذن العصر ماتشوف احد في بيته اللي يروح من المسجد لشارع على طول هذا حال اولادنا زمان > عيال اليوم يقول لك لا الحر يأثر على بشرتي , المهم اما انا كنت مايسلم الامام الا وانا سابقه الاولاد على الملعب كاني الحكم ولا عجايزنا اول غير مايفوتن قهوت العصريه يوم عند ام محمد ويوم عند ام فلان ويوم عند ام علان حتى لو متقابلات في الصبح لازم يتقابلن العصر يمكن تكون في سالفه جديده وتفوتها <عاد اذا فاتتها سالفه كان فايتتها صلاه من الصلاوات .
عاد انا ماطلع الا وانا ماخذه نبيطتي وعلبت الماء اللي مسويتها على شكل مسدس مويه <ترا مسدس المويه اخترعوه من عندنا , ونقعد نلعب بالمويه والاولاد يلعبون كوره واحيانا اذا طفشنا رحنا ندور لنا قطوه ونطاردها يومنا كله ولا ندور لنا علبة ببسي ونرميها بالحجر < يعنني صيادين , ومايجي المغرب الا واحنا تعبانين من اللعب ومانوصل للبيت الا واحنا مشهبين من الغبار عاد ايام زمان حلات اللعب وانتي حافيه

المهم الروايه طويله بس حبيت اكتب الشي المميز فيها وياليت تعجبكم

اختكم جووود