☼ ☼ الهنوف في ربوع ماليزيا 2024 ☼ ☼

الحمدلله اولا انه تمم علينا سفرتنا بسلامه
ووهبنا نعمة هالسفره نغير جو ونرتاح..
يستاهل الحمد

رحلتنا كانت كالاتي:

٤ ايام مدينة سلانجور /بالصن وي لاقون
٣ ايام مدينة جنتنق /بالفرست وورد
٤ ايام بنانق / يومين بالهاردو ويومين بالبي فيو
٤ ايام كوالالمبور / دورسيت رجنسي

كانت بتاريخ ٥/٣١ – ٦/16
محذوف منهم يومين مالات السفر
فالاقامة كانت ١٥ يوم

كل حجوزات الفنادق من موقع بوكينج
والطيران الاتحاد والداخلي اير اسيا ..بعد حجزنا من النت

تكلفةالتذكره:-
215 دينار كويتي -ترانزيت بوظبي
6 ساعات للذهاب
وساعه ونص للعوده

نبدي ……
2012/5/31

رحنا المطار س ٣:٠٠ العصر بسرعه خلصنا شغلنا وطقينا فره بالسوق الحره لان كنت ابي عطر

وقع اختياري علي اسكادا خفيف وصيفي

اقلعنا ٥:٢٠ بالتمام
الرحله كانت قصيره ماحسيت بالوقت

قدمو لنا سناك(الله يديم النعمه)
صمونه بااارده وكلها بصل وبطل ماي
لو حاطين توست بجبن ابرك والله

وصلنا بوظبي ٨م بتوقيت بوظبي،، ٧بتوقيت الكويت
قزرنا الترانزيت بتضبيط جدول رحلاتنا والبحث بالنت والعشا

طرنا بعدين س ١:٤٠ص

اهني بدت رحلة المعاااااااااااااناة
ماتوقعت جذي الرحله غثيثه

عطونا بطانيه وجنطه صغيره فيها (فرشه ومعجون-وسدادة اذون -دلاغات-ومالت العين )

افلامهم كانت حلوه واختيارات متعدده موسقى واغاني وافلام كل الجنسيات وبرامج

طبعا اول ماركبنا عطونا نفس السناك الفاشل وزادو عليه بسكوت ومعمول ..يعني مرقعينها

نمت وقعدت مليون مره وتابعت شوي فلم هندي(دون 2)شاروخ خان
الرحله متعبه صج يبي لها فرست كلاس

قعدت ولا اثاريهم موزعين الفطور ولما طلبت منهم قالت وجبة البيض خالصه تبين نودلز قلت لا …..احد يتريق نودلز
قالت خل اشوفلج شي ثاني وجابت لي فطور فرسني
نظام موز محموس وتوست بعسل وزبده وعصير برتقال وزبادي فواكهه.

كليته غصب عشان بس اسكت عصافير بطني
وهم اقول لو حاطين توست وجبن احسن والله

الطيران حلو ونظيف ومواعيده تمام بس وجباتهم مو شي

المهم وصلنا اخيرا

ركبنا قطار اللي يوصل لمطار الامتعه

خذيت جنطتي وخذينا تكسي المطار (للصن وي) ب 85رنقت
نظامهم في كاونتر يعطونكم تذاكر للتكسي وفعلا تكسي المطار ارخص من اللي بره

اتجهنا لمدينة سلانجور اللي فيها فندقنا الصن وي لاقون

هذي خريطة جزء من ماليزيا وفيها المدن المعهوده

****
اكتفي بهالقدر
وانتظروني قريبا وحياكم بأي استفسار
يخص هالجزء