بسم الله الرحمان الرحيمو الصلاة و السلام على أشرف المرسليننبينا محمد صلى الله عليه وسلم
السلام عليكم ورحمه الله وبركاته ….
حبيت اني اشاركم في تقريري عن العمره اللي سوينا انا وريلي في العشرة الاواخر من رمضان ….
السلام عليكم ورحمه الله وبركاته ….
حبيت اني اشاركم في تقريري عن العمره اللي سوينا انا وريلي في العشرة الاواخر من رمضان ….
كان من الكويت الى الدمام
بعدين نروح مطار الدمام بالطياره حق جده
ومن جده عن طريق سيارة مستأجرة نروح مكه
قلنا انأجر سيارة احسن من التكاسي .. ( وياريتنا ما سويناها )
اول شي حنا طلعنا من البيت على الساعة 11 بالليل ..
رحنا الفروانية .. تسحرنا
بعدين رحنا للحلاق .. لان الاخ مو محلق يبي يحلق .. المهم .. طلعنا من الكويت على الساعة 2 الفجر
واول ما صادفنا من اماكن حلوة …
هذه استراحة داخل الاراضي السعوديه … صلينا فيها الفجر في مسجد طبعا للحريم والرجال
بالطريج في صور حلوة .. بس امشي واصور
هذه حق الشروق تو ما تشرق الشمس و للحين ما وصلنا الدمام
ترا 4 ساااعة بالسيارة امووووووووووووت على السفر باسيارة
هذه صور للدمام و الفنادق اللي دورنا فيها غرف فاضيه .. بالموسم هذا يكون الدنيا زحمه و الخدمات ولا شي
لازم تختارون مكان سنع تنامون فيه لان طيارتنا الساعة 6 المغرب .. والوقت للحين صبح لازم انام حنا سهاره
عليكم بالعافيه
اول صورع حلوووووووه وواضحه ماشاء الله
غرفه و حمامين وصاله و مطبخ ..
المهم سرير مريح وتكييف وبس
وهذا ملحقات الغرفه ..
على فكرة الثلاجه فاضيه ما فيها شي
هذا فندقنا من الخارج
طبعا وصلنا المطار وقبل ما اندش المطار اخذت زفه من ريلي من كثر ما صورت
قالي لو شفتج طلعتي الكاميرا ياولج .. طبعا خشيت الكاميرا
بالطياره الطيار قال لنا وصلنا الميقات .. حق المعتمرين .. طبعا الرجال في البعض بدل ملابسه بالطياره
وناس بدلت ملابسها بالمطار .. وناس طالعه بملابسها من بيتهم
ريلي بدل في المطار .. ودي احط لكم الصورة بس اخاف تخترعون
اول ما الطيار قال وصلنا المناسك … نوينا الحج ..
تقولين : اللهم لبيك عمره اهدي ثوابها كامله خالصة لامي ( الله يرحمها )
او لاي احد تبينه او حق نفسج تقولين ( اللهم لبيك عمره ) بقلبج ..
ويبدأ التكبير .. لبيك اللهم لبيك .. لبيك اللهم لا شريك لك لبيك ان الحمد و النعمه لك والملك لا شريك لك لبيك ( الرجال يقولها بصوت مسموع . و الحرمه بالسر ) …
وصلنا جده ..
اخذت لنفسي خط من شركه ( موبايلي ) يحلو خطوطهم ويحلو التسعيره حقتهم .. و الله طلعت زين و الوطنيه بايقينا وحنا ما ندري !!!!!!!!!
و اول ما وصلنا اجرنا سيارة من مطار جده .. عشان نروح فيها مكه
باطريج وحنا في جده متوجهين الى مكه رحنا مطعم ( الطازج ) و طقيناها بالعشر
وقاعده بطاليه قلت اصور المنيو
طبعا حنا كنا نبي نسوي عمرتين ..
اول عمره بسرعه خلصناها تبارك الرحمن ..
اول ما وصلنا مكه ارتحنا شوي وبسرعه … رحنا عمرنا … وما كان في مجال اننا نصلي القيام لان استغلينا فترة الصلاه و كنا بالطواف .. اذكر الامام يقرا الدعاء ( القنوت ) وحنا انطوف حول الكعبه وانا اقول ورااااه سبحان الله .. مع اني مااعرف ادعي لقيت الدعاااء قدامي استغليت دعاء الامام و اقوله .. و الحمد الله …
على الساعة 3 ونصف .. خلصت الصلاه كلها .. والعمره وكل شي ..
بسرعه رحنا اتسحرنا ونطرنا صلاه الفجر ..
وطبعا صورت انا ..
سطح الحرم .. ممنوع الحريم تصعد فوق
هذه الصورة من الدور الثاني .. ( مو السطح ) يصير الحريم تصعد وصورت .. طبعا كنت مخلصة العمره .. لان هذه الصورة بيوم ثاني لان كلش ما في مجال تصورين وقت العمره .. الواحد يكون شعوره كله بالدعااااء و الصلاه .. فما في مجال للتصوير ..انا كل الصور اللي اخذتها لمكه من الداخل . . كانت بعد الصلاوات المغرب و العشاااء .. واثناء صلاه التراويح .. او بين الاستراحات مو اكثر ..
ثاني يوم صفطنا السيارة اللي امأجرينها ( ما ادري ليش مأجرينها )
وركبنا تاكسي قلنا نبي نروح المناسك .. اتفقنا مع واااحد انه يعلمنا على المناسك .. حقت الحج ..
هذا راعي التاكسي اخذنا في جوله يعلمنا فيها مناسك الحج بالطريق :
رحنا غار ثور . و جبل النور . جبل الرحمه .
طبعا ما في مجال اننا نصعد كلش … مع ان الناس تصعد بس انا وين اصعد ؟؟
طبعا مكتوب ما يصير مومن السنه التمسح بالجبل او الصلاه او حتى انج تصعدينه ..
بس الناس تحب اتفرج على كل شي .. ريلي صعد الجمل … الأجره 5 ريالات يا بلاش
وهذا مستر جمل ..
فوق الجبل يبيعون
قربت الصورة ( الكاميرا كانون 9 جي )
بيت احد الامراء
توسيع مكان الجمرات
طبعا اذن الاذان و حنا للحين انفر بالمناسك
ترا الفره ما تاخذ ساعتين بس حنا طلعنا متأخرين …
الشغله اللي اقدر اضمنها لكم في مكه انج ما تجوعين ..
وين ما رحنا الناس توزع اكل سبحان الله ..
بالاشاره واقفين هندي ماسك جيس كله تمر .. و يقول حق الناس الاذاان اذن .. ( حق اللي بالسياره ما يكون عارف اذا اذن او بعد ) .. و يوزعون اكل و تمر و لبن .. و صمووون الموجود ..
شوفوا حنا يوم رحنا صوب الجمرراااات الشرطه عطونا الجيس هذا
مكتوب عليه ( نعتنى بكم )
في لبن . وصمونه جبن . و تمر . وماي . و سلطة فواكه … ومناشف ورقيه ..
طلعنا على مكان ثاني .. نسيت اي جبل بالضبط .. بس المكان وايد حلو ومرتفع .. و الحلو فوق الجبال بيوت
وعماير
هذه اخذتها من الفندق .. ( زمزم ) المصلى ..
بعد العمره و الصلاه بعدها بحم يوم .. على يوم 26 رمضان
رحنا حق الطايف .. عشان وحنا رادين انمر الميقات مره ثانيه ونسوي العمره رقم 2
هذه صور من الطايف …
ههههههههههههههههههههههههههههه اي هذا جبل
بس رووعه و سكري التكييف و قعدي على كيفج تمتعي بهواااء بااارد ولا لبنان سبحان الله
مره صاعدين ومره نازلين ..
طبعا اهوا تعب .. و نمنا بنص الطريج قبل ما نطلع من الطايف ..
اهني بالمسافط .. سفط الاخ ونام وانا قاعده فاتحين الدرااايش على الهوا الطبيعي ..
طبعا وصلنا الميقات ..
وتسبحنا و لبسنا ملابس الاحرام ..
وردينا مكه من جديد .. و قلنا النيه ..
المره هذه انا كانت عمرتي حق ابوي الله يرحمه …
طبعا الحرمه ما تلبس نقااااب
تلبسن غطوة خفيفه ..
و يومها ما وصلنا الحرم الا الساعة 10 بالليل من الزحمه …
الشرطة منعوا دخول السيارات تصفطين صوب محابس الجن .. وتركبين الباص او التاكسي ..
و صار لنا حادث ريلي صاف سيارته و تجي شاحنه تبي تمر بين سيارتين ( سيارتنا وسياره واقفه ) وينحكر ريلي بالنص ..
ويجون الرجال يبون يطلعونه !! يمه وانا نزلت من السياره بس ابجي .. و اهوا يضحك علي ..
و سيارتنا الحمد الله ما تاثرت الطق كلها بالسياره الثانيه .. بس الموقف يخوف
و المصيبه شحاطي طاحت من ريولي .. وخفت لا ترد السياره عليها وتصير تحت التاير
وقعدت ابجي !!
ما ادري على شحاطي او على ريلي اللي انحكر
.. بعدين يه صوبي صبي بو 14 او 15 سنه .ز قلت له لو سمحت ممكن واشرت له على شحاطي تحت التاير .. بسرعه اخذها ولبستها .. والحمد الله تم انقاذ الشحاطه بنجاح
المهم ريلي يوم شافني .. قال لي شفيج تبجين .. قلت له شحاطي طاحت وخفت اطقها للحرم حافيه !!!!
اي رقعيها قولي ابجي عليك .. كلش ما في اسلووووووب
بس و الله صج ابجي عليه
العمره هذه انا تعبت فيها عدل .. الدنيا زحمه حييييييييييييييييييييييييييييييييييييييييييييييييي ييييل فوق ما تتخيلوووون
خلصنا العمره كان الامام على ركعتين الشفع و الوتر
سبحان الله بسرعه دشينا معاههم بالصلاه .. وصلينا الركعتين مع الامام .. كانت ليله 27 رمضان
و الدعاااء كان طوييييييييييييييييييييل ورييولي تكسرت … بس ما شاء الله حيل حيل حيل استانسنا ..
ما عرفهم بس خشيت وجيههم فشله …
هذه وحنا اخر يوووم طالعين …
الحليوه هذا خشيت صورته .. حمام واااجد
طبعا في صور كثير بس ريلي و انا مصورين ما اقدر احطها بالمنتدى
طبعا خلال ايام العمره كلها كنا ننتسحر بالفندق .. اهني
المطاعم مو ذاك الزود بس ما يخالف تأدي الغرض
بكل مكان تلاقون احد يبيع القهوة
واذا ما لقيتوا احد يبيعها تلاقون رجال قاعدين يشرربوون القهوة
ريلي ما يعيش من غير القهوة .. يدش عليهم يسلم يقعد يتقهوة وياكل تمر .. يعدل الراس ( الجمجمه ) و نمشي
درعموا عليهم …
و الحمد الله كانت رحله موفقه بكل المقااايس واستانسنا فيها ..
والفال للجميع يارب
عمره مقبوله يارب..
والحمدالله ع سلامتج..
خوش صور تشرح الصدر ماشاءالله..
جزاج الله خير..
ماشاءالله..
تقبل الله طاعتج..
والحمدالله ع سلامه..
وعسى دعيتيلنااا
اللهم آمين