بسافر دبي ثلاث ايام الرجااااء الدخوووووووول ضرووري

الأماكن السياحية في دبي ما تخلص .. و مثل ما قالوا لج الأخوات
تقدرين تاخذين الباص بو طابقين عشان تشوفين دبي و تاخذين فكرة عنها ..
لأنها ماشالله بين يوم و ليلية تتغير شوارعها ..
لدرجة انا نحن ياللي عايشين هني نضيع ..

أولا بما انج بتسكنين في جميرا بيتش .. فتقدرين تمرين على "برج العرب"

و تحجزين عشا أو غدا فيه إما في المطعم اللي تحت في قاع البحر
أو اللي فوق في السحاب .. و اللي يدور كل ساعة على ما أظن ..
(كنوع من التغيير عن المطاعم العادية)

و بعدها "الوايلد وادي" (نشاطات بحرية) بتكون عدالج بعد ..
و الجو الحين مناسب ..

و في فندق جديد "اتلانتس" في جزيرة النخلة .. تقدرين تزورينه ..
و تشوفين المنطقة .. بصراحة روووووعة .. لا تفوتج ..
و في فالفندق "أكويريم" تقدرين تزورينه بعد و تشوفين عجائب من خلق الله

و بعد النخلة .. في جميرا أيضا .. مشروع "مرسى دبي"
فيه ممشى و لا أروع .. تطل عليه مطاعم و محلات كأنج تتمشين في دولة أوروبية
يعني مكان راقي .. و يستاهل انج تزورينه ..

و فيه بعد مول جديد "دبي مول" على شارع الشيخ زايد
محلاته حلوه لكن بعدها مب كل المحلات مفتوحه،،
لكن مجموعه كبيرة فتحت الحين .. و في نفس المول .. صالة تزلج كبيـــــــــرة
و أيضا "أكويريم" تقدرين تشوفين جزء منه و انتي تتمشين في المول و اذا
بغيتي تدخلينه .. ادخلي بدون تردد ..

اممممممممممم .. بالنسبة للمولات .. اذا كانت هذه اول زيارة لج
يعني ما رحتي "Up Town" .. انصحج تروحينه
لأنه مول بس مفتوح .. لذلك لا تسيرين الظهر .. سيري جريب المغرب ..
الجو حلو و مب زحمة و أغلب اللي يتمشون أجانب ..
يشبه ميدان التسوق اللي في ألمانيا .. و هو في منطقة مردف

شو بعد .. شو بعد ..
روحي "Out let " مول .. هو شوي بعيد عن الأماكن اللي ذكرتها قبل
لكن .. لا تفوتينه .. بتحصلين كل الماركات فيه .. لكن بأسعار التخفيضات
يعني هالمول .. تحصلين كل شي فيه .. بسعر خيالي جدا ..
و قولي لي يوم بتسيرين .. لاني الوحيده اللي في العالية اللي احب أسيره ..
تقولين عندي دوام رسمي فيه ..
و هالفترة عندهم تنزيلات ..

جريب هالمول في "Dragon Mall" يعني السوق الصيني .. مول كبيـــــر
و تحصلين كــــــــــــــــل شي فيه .. بس انشالله ما تضيعين مكانه ..

و فيه بعد "Emirates Mall" من أكبر المولات اللي في دبي و في المنطقة
بشكل عام .. فيه كل الستورز تقريبا .. اذا كنتي حابه تتسوقين .. فنصيحة زوريه

أخاف أكون نسيت شي .. على العموم اذا بغيت أي معلومه عن دبي أو الامارات
بشكل عام .. كلميني ع الخاص ..
و فالج طيب ..