بغيت الأرض تنشق و تبلعني

قوه بنات هذي أول مشاركه لي بالمنتدى ، و بصراحه ما أدري من وين أبدي و لا اشلون أبدي بس قبل كل شي أحب أقولكم اني كنت متردده من طرح مشكلتي بس كنت مخنوقه و أبي افضفض و حسيت انه المنتدى اهو احسن مكان اقدر افضفض فيه بدون تكليف ولا أقنعه ، أللي بطرحه الحين اهوه موقف أبيكم تحكمون عليه و ياكثر المواقف اللي عندي ، آنا متزوجه صارلي 8سنوات الحمدالله و عندي بنتين الله يحفظهم ، و زوجي من الأهل يعني مو غريب ، مشاكلي مع ريلي كلها بسبة أهله اهمه من النوع المتسلط أمه و اخته الكبيرة بالذات مو بس معاي مع الكل يعني تنامين و تقومين و تحطين و تشيلين بأمرهم و فيه خير اللي يغلطهم و يقولهم انتو غلط مو صح و آنا بطبعي مسالمه ما أحب القيل و القال و مطيعه و مو من طبعي النجره و الصراخ و اللي يقط علي كلمه اسكت و ابلعها و لا أرد جذي أمي ربتني اني أكون سلبيه مع نفسي ، مع اني جامعيه من كليه محترمه و علميه و شهادتي أعلى منهم كلهم بس ماسحين فيني القاع و عادي خالتي تزفني جدام الناس اذا فيه مناسبه ولا استقبال و غيره و اهيه من النوع اللي اذا عصبت ما تثمن كلامها و المصيبه دايم يكون فيني التنفيس ، ما ابي اعور راسكم بكلامي بس بغيت اعطيكم نبذه بسيطه عن معاناتي معاهم المهم قبل يومين كنت عندهم موديه البنات و طلعنا نقعد في الحديقه اشوي و كنا كلنا قاعدين ( خالتي حمواتي رياييلهم عمي ) ما عدا زوجي و أخوه و عمي توه جاي من الديوانيه و قاعد يمدح اب بوفيه جايبه لهم مرشح و حماتي تقوله خبري انك تسوي ريجيم ما قدرت اتهد البوفيه جان يرد عليها ( و الله أم حوحو لين حطو جدامها مثل هالبوفيه ما تهده و تمسك فيه و عادها مرتين ) جان حماتي تقوله ( لما انت تقدر اتهده و تسوي ريجيم اهيه تقدر ) يعني بترقع ، ( على فكره آنا متروسه اشوي ) و هالحجي صار جدام رياييل حمواتي و ساد الصمت لمدة دقيقتين من الصدمه ، آنا بالبدايه ما كنت مستوعبه و لما استوعبت انقبض قلبي و راح نفسي و حسيت الدنيا تدور فيني ، و ما عرفت اشلون اقعد ، بدون ما احس لقيت نفسي ماخذه بناتي و راجعه البيت ، يتلي حالة انهيار أول مره أحس بالمثل اللي يقول بغيت الأرض تنشق و تبلعني ، يمكن تشوفون الموقف عادي بس بالنسبه لي كانت القشه اللي اقصمت ظهر البعير ، ظليت منهاره ابجي و اول مره أكسر خاطر نفسي و لما شافني زوجي بهالحاله و سألني و قلتله ما ادري اشلون يه ابوي في بالي و قمت اتحسر على الأيام اللي كنت فيها ابيت ابوي و ابعز ابوي الله يطولي بعمره و قلتله اتمنى لو اكون في بيت ابوي و لو ليوم واحد بس علشان احس بكرامتي اللي انمسحت من اول ما تزوجت ، طول عمري عشت معززه مكرمه في بيت ابوي محد تجرأ يهيني و لا يدوسلي على طرف طول ما ابوي موجود ، جان يقولي ( بس ابوي مو قاصد هذي غشمره و انتي حساسه و كله تكبرين الأمور ) قلتله بس موجذي مو جدام انسباكم هذي كبيره مو حلوه بحقي ولا بحقه و الغشمره لها أصول و آداب ما لقى غيري هذا و آنا قايمه فيكم و شايلتكم على راسي نسيتو كل اللي سويته و بدال الكلمه الطيبه هذا اللي أحصله منكم ، اهوه سمع مني هالكلام قام هدني و حط راسه و نام زعلان ، و آنا تميت طول الليل ابجي و اقرا قرآن علشان أهدي الخنقه اللي فيني و ادعي الله يهديهم ، صدقوني يا بنات لي اليوم و آنا ابجي ، قولولي يا بنات هل بالغت بردة فعلي ، أدري طولت عليكم بس انتو خواتي و ابي أفضفض