بنات ساعدوني أبي مساعده بأغراض الجمعية الضرورية

شوفي حبيبتي كنت مثلج تزوجت و ما اعرف اسوي حتى الشاي الحين الحمدلله كل شي تقريبا اعرفه مطبخج لازم فيه :
بهارات اللحم – بهارات السمك – كمون بودر – كزبره بودر – لومي ناعم وعدل – دارسبن ناعم وعدل – كركم –
نخي وكشمش للحشو – صبغ الزعفران البودر – زعفران – هيل بودر وحب – ورق غار – مسمار – ماء ورد .
تخلطين في زجاجه كبيره دارسين عدل +هيل حب + ورق غار + مسمار هذول البهرات العدله تحطينهم مع فوح اللحم او
الدياي سواء مجبوس او مرق .
المجبوس تفوحين اللحم او الدياي بماء فقط 5 دقايق وتشخلينه بعدين تدقين الثوم والجنزبيل الطري وتحمسينه مع اللحم او الدياي مع البصل المقطع والبهارات العدله والبهارات البودر 5 دقايق والدهن طبعا بعدين تصبين الماء وتخلينه يفوح اذا لحم قطع كبيره ياخذ من ساعتين وربع الى ساعتين ونص واذا دياي ساعه الا عشر او ساعه الا ربع بس قبل لا يستوي اللحم او

الدياي بربع ساعه حطي ملعقتين ملح وبعد 5 دقايق ذوقيه اذا يبي ملح حطي شويه واذا زين خلاص بعدين طلعي اللحم او
الدياي عشان تقلينه حطي عليه ماء ورد منقعه فيه زعفران وصبغ الزعفران وهيل بودر واقليه بس طبعا بعد ما تكتين العيش تحطين العيش اللي منقعته ساعه بماء يميل للحراره مع ملعقة ملح تشخلينه وتحطينه بالجدر وتحطين الماء اللي طبختي فيه اللحم او
الدياي بس خلي الماء فوق العيش ارتفاع عقلتين اصبع او 2 سم وبس يصير الماء نفس مستوى العيش على طول وطي النار
وحطي الحديده تحت الجدر وبس ينشف العيش حطي ربع م/ك صبغ الزعفران البودر على العيش على جنب واخلطيه مع
شوية عيش عشان يطلع اللون ورشي ربع كوب ماء ورد بحركه دائريه عالعيش , والدقوس ابشري طماط وحطي عليه معجون طماط وماء وشوية دهن وملح وخليه يطبخ , والحشو قطعي بصل وحطيه بمقلاه وحطي عليه نص كوب ماء
وبس يشرب الماء حطي عليه دهن واحمسيه لحد ما يصير لونه بني فاتح حطي عليه لومي ناعم وهيل بودر وملح والنخي اللي فايحته بماء ومصفيته والكشمش اللي منقعته ساعه بماء دافئ والف عافيه واخذيها نصيحه من اخت اللي ما تحتاجينه لا تشترينه سواء اكل او اي شي ثاني

حبيبتي الأغراض المهمة لكل بيت ساعات تختلق من بيت لي بيت

البهارات مع أني ما أحب شغل الجمعيات أحب أخذه من مطحنة سمراء عدن

العيش

زيت

لحم مفروم

دجاج

نقانق وهمبورجر ومرتديلا

خضار مشكله

معجون طماط

الجاي

الحليب

البيض

الجبن

الطماط والبصل والثوم والبطاط

زيت زيتون

لبن وروب والعصير والبيبسي

صبغة عيش وزعفران

خل

الزيتون

معلبات

الكلينكس ومواد التنظيف
http://q8yat.net/showthread.php?t=60…CC%E3%DA%ED%E5

http://q8yat.net/showthread.php?t=62…CC%E3%DA%ED%E5

السلام عليكم ورحمة الله وبركاته ..

شوفي حبيبتي أساس الطبخ الكويتي ..

1- دجاج .. لحم .. لحم مفروم ..

2- عيش ..

3- بهارات ..

يعني حق الغدا ..

1- لازم تشترين دجاج ممكن تسوينه مجبوس أو مشوي أو كنتاكي أو مرق أو ملوخية .. أو صينية دجاج بالفرن ..

2- وممكن لحم حق المجبوس والمرق ..

3- ومعكرونة بأنواعها .. ممكن تسوين لزانيا وممكن سباغتي .. وممكن معكرونة باللحم المفرم وممكن باشميل ..

4- والهمبرغر حق الحمسات والشوي .. وعندج شيش طاووق حق البرياني حلو .. والكبة إذا بتسوينها لبنية .. وخضرا مثلجة ..

5- من الجبرة .. لازم بصل وثوم وبطاط وبيذيان وطماط وخيار وجزر وملفوف وخس وبقدونس حق السلطات مهم ..

6- زيت زيتون وأغراض الريوق .. صوص صويا وصوص سلطات وصوص اج بي وكاتشب ودقوس ..

7- معجون طماط ومايونيز وزيتون وجبن ..

يعني قسمي الأغراض قسمين ..

أغراض فريزر .. وأغاراض ثلاجة وخضرة ..

ومافيها شي بالبداية كتبيهم بورقة علشان لا تنسينهم ..

وقرري شنو طبخة اليوم .. وراح تلاقين نفسج شوي شوي تعرفين وبسهولة ..

والله يوفقج ..