تجربتي القصيره مع معهد الكويت الصيني للمساج

قررت اروح اسوي مساج ريلاكس
قلت بغير عن سبا تايم خل اجرب شي يديد خصوصا ان جتوفي وظهري يعوروني فقلت اروح لمكان متخصص

اخترت المركز الصيني اختيار عشواءي قلت بجربه
رحت ولا مكانهم مو حلو اثاث حوسه بس قلت ميخالف يمكن شغلهم حلو واهم شي النظافه
والستاف ما يتكلمون لا انجليزي ولا عربي بالزور قدرت افهمهم اني ابي مساج ريلاكس قلت لها بجم؟ قالت الساعه بعشر دنانير
قلت يالله
الغرفه ليتاتها كلهم مبطلين مادري شلون بيي الريلاكس مع هالاضاءه
الي تسوي قرررررررررررررررقه صكت راسي ما بلعت ريجها والمشكله مادري شتقول مو مفهوم حجيها
وانا ما عندي الا اوكي واوكي
سوت لي مساج يعووووور اقول لها ابي ريلاكس مو تخسيس عمك اصمخ
وحطت باذوني شي مثل القمع وحرقته بشمع ما دري شسوت وتالي يابت لي كاسات هوا
انا الصراحه لاعت جبدي الهدف من المساج كان ريلاكس وابدا ماشفت هالشي
المهم قلنت يلا ميخالف تجربه وعدت
يوم رحت احاسب ولا حسابي 40 دينار!!

تقول كاسات هوا ب 5
الشمع الي حطته باذني ب 5
وزيت المساج حسبوه علي وعطوني اياه ب 20!!
طبعا انا انصدمت لاني ما طلبت هالاشياء بس من قرقتها وما ادري شتقول الظاهر ما فهمتها عدل
الصراحه ما عجبني شغلهم
بس يمكن الي يكون هدفها مساج تخسيس او مساج علاجي تستانس عليهم ويعجبها
انا الصراحه تجربتي كانت فاشله معاهم!
وبس خلصت الحتوته