○☼彡تجربتي الناجحه في تدريس عيال رفيجتي،،تجربة مثمرة الحمدالله○☼彡

السلام عليكم

مشرفات القسم العزيزات على قلبي

ام عبووود

الصابرة المحتسبة

أمهاتنا الغاليات اولياء امور الطلبة

تحية وبعد،،

بداية

هذا الموضوع هو اهداء مني لاختي الغاليه المشرفة ام عبوووود

من خلاله رح اكتب لكم تجربة سابقة لي في مجال التدريس على الرغم اني مو ابله

بس الايام تعلم الانسان وايد امور ويكتسب من خلالها خبرات كثيرة

وللعلم وقبل لا اكمل كلامي

هذا الموضوع مو دعاية واعلان حقي

انما فقط لذكر تجربتي السابقة في تدريس عيال رفيجتي يمكن تفيدكم بشي وتفتح عيونكم على نقاط مهمة انتو غافلين عنها

ورفيجتي عندها اثنين

من بدايتي معاهم واحد كان بصف رابع والثاني بسادس

واكيد ودكم تشوفون عيالكم باعلى المراتب ان شاءالله

من فترة طويلة دقت علي رفيجة عزيزه علي وطلبت مني اساعد ولدها اللي بصف رابع عنده امتحان انجليزي ومو عارف يدرس

حتى كانت تجيه مدرسة وانحاشت منه لانه يننها هههههههههه

التدريس يبيله طولة بال وصبر يا أمهاتنا العزيزات

وبسبب طولة بالي وصبري قدرت امسك عيال رفيجتي واساعدهم بالدراسة من لما كان واحد منهم بالصف الرابع لي واستمريت معاه لي الصف العاشر

واخوه اللي كان بصف سادس واستمريت معاه لما وصل اول ثانوي

والحين اسم الله عليهم الصغير الحين اخر سنة ثانوية واخوه الكبير سنة اولى جامعة

حسبة عيالي والله وحبيتهم من كل قلبي واهم بعد

كنت اسمع لهم بكل شي يصير معاهم بالمدرسة

وهذي ثاني نقطة مهمة في موضوعي

انج تسألين ولدج او بنتج شصار معاهم بالمدرسة
وسؤالج هذا رح يحسسهم انكم مهتمين فيهم غير موضوع الدراسة

المهم

رحت عند رفيجتي علشان اشوف شنو سالفة ولدها العسر ههههههه

قعدت معاه وسولفت معاه شوي وضحكته وشوي بديت معاه بالدراسة
بكل راحة عرفت شنو طبيعة الامتحان اللي عنده من قرائتي للمادة بشكل سريع

بالنسبة لمادة الانجليزي طبعا الكل يعرف :

ضرورة قراءة الدرس من خلال الطالب ويبيله متابعة من الاسرة

ثاني شي

قراءة المفردات وضروي نسخها اكثر من مرة حتى ترسخ بعقله ويحفظها

ثالث شي

اذا المادة تضمنت قواعد اللغة الانجليزية Grammar لابد من قراءة القاعده عدل وتفهمونها لعيالكم مع ذكر مثال على كل قاعده على حسب المرحلة الدراسية

رابع شي

قراءة اسئلة الدرس وتعويد الطالب انه يحاول يدور الاجابة من القطعة الموجوده

وبقول لكم على طريقة شلون يقدر يحل السؤال المتعلق بالدرس :

خليه يقرأ السؤال ومحاولة شرحه وان ماكنتي قادره تفهمين معنى السؤال
اذا عندج قاموس ترجمة استعيني فيه واشرحي اي معنى موجود بالسؤال

وان ما قدر يعرف جواب السؤال على الرغم اجابته موجوده بالفقرة
ادله على طريقة يعرف الاجابة :

مثلا ،،، اقوله شوف الكلمات بالسؤال ،،ان لقيت مثلها بالفقرة اعرف انه الاجابة موجوده فيها

هذا في حال كان من الصعب انه الطالب يطالع الاجابة ويفهم السؤال

خامس شي

كتابة امتحان قصير كتجربة علشان تشوفين مدى استيعابه للمادة

ولاتنسون يا خواتي اهم شي اهم شي

ضروري الطالب يحفظ على الاقل من ورقة تصريف الافعال لو 3 كلمات

واقصد بتصريف الافعال

مثل اللي بالصورة

وتصريف الافعال رح يلحقهم لي اخر سنة بالثانوية

سادس شي

ضروري محاولته قراءة الفقرة والتدريب عليها ولو غلط واهو يقرأ خليه يعيد الكلمة اللي غلط بقرائتها مرة ثانيه

ولاتنسون ضرورة حفظ معاني الدرس اول باول

مو لما يجي وقت الامتحان وتتوهقون

الدراسة يا خواتي لو كانت اول باول افضل لكم ولهم

لانه اغلب الطلاب ما يدرسون الا وقت الامتحان

لكن لو كان فيه متابعة من الاهل للطالب وسؤاله شنو خذيت اليوم خليني اشوف

رح يخفف عليكم الكثير

انا تكلمت بالنسبة لمادة الانجليزي لانه ادري مو الكل قوي بهذي المادة

وانا بالفعل اتبعت هذي الطريقة مع عيال رفيجتي والحمدالله نجحت فيها وصرت اشوف العلامات الزينه اللي تفرح

والطالب لي شاف علامته بالامتحان علامة عاليه رح يساهم في رفع معنوياته في الدراسة

بالنسبة لباقي للمواد كنت اتبع نفس الطريقة:

اول ما يجون من المدرسة كانوا يتغدون ويرتاحون شوي وتبتدي الدراسة

كل واحد يفتح جنتطه ويقولي شنو اخذ دروس سواء يديده او نفس الدرس

ضروري جدا يا خواتي مراجعة عيالكم بكل درس ياخذونه قبل تحضير الدرس اليديد

لانه رح يخفف عليكم حمل كبير وقت الامتحان

لانه لو ما راجع دروسه اول باول لما يجي يدرسه وقت الامتحان جنه ياخذه اول مرة ورح يلاقي صعوبة في فهم الدرس

هذي نقطة مهمة ركزوا عليها

وشغله ثانيه مهمة

ياليت تختارون وقت مناسب لتدريس اليهال

لاتحسسونهم انكم وراكم مشوار وودكم تخلصون تدريسهم بسرعة

لانه مارح يستوعب شي ويتم يفكر ويقول بينه وبين نفسه ( امي تطلع ،،وين بتروح ،،او امي رح يجيها ضيوف ،، ياترى منو)

لاني اكتشفت هالشي من خلال تدريسي لولد رفيجتي اللي كان صف رابع اذكر مرة قلت له (يلا ياقلبي ادرس هذا الدرس لاني مستعجلة شوي بطلع) ويروح يقول لامه يمه نهى تطلع مشوار ولازم اخلص دراسة بسرعة

اكتشفت انه مثل هذا الكلام ممكن يأثر على تركيزه بالدراسة

وفعلا ماعدت اذكر ابد سالفة اي مشوار او امور ثانيه ممكن تشتت تفكيره وتركيزه

كل كلامي معاهم كان بحدود الدراسة

بتكلم عن شغله مهمة جدا

ترا الطالب يا امهاتنا العزيزات يتعب ويمل اذا تم يدرس بشكل متواصل

ضروري يرتاح شوي

يعني مثلا

ممكن تقدمين له كاكاو او عصير او شي خفيف ياكله

استراحة على الاقل من 10 دقايق لي ربع ساعة

والطالب اذا حس انه في احد مهتم فيه رح يتشجع ويدرس ويركز

وترا في يهال يحبون يلعبون اكثر ما يدرسون
وهذا متعب حق بعض الامهات

لكن لو كان في طريقة تتعامل فيها الام مع ولدها انها تقوله

خلص دراستك بالاول وسوي اللي تبيه مع وعد من الام انها تعطيه هدية او تشتريله شي يحبه

وهذا الكلام لازم يتعلمه من بداية دخوله المدرسة

والاهمال هني رح يكون له اثار سلبية في باقي المراحل الدراسية

وضروري من الاهل متابعة عيالهم في كل شي ومعرفة النقاط السلبية عندهم ومحاولة علاجها باسرع وقت

لا تقولون ماعندنا وقت نجابلهم وتقطوهم على المدرسين الخصوصيين

انتو الاولى في متابعتهم ومعرفة شنو يحتاجون له

بالنسبة لعيال رفيجتي بدو اسم الله عليهم يكبرون ومع كل سنة دراسية يتغير تفكيرهم واسلوبهم

وانا كنت ماشيه معاهم على هوا تغيرهم من ناحية طريقة دراستهم واسلوبهم

بتكلم الحين بالنسبة للواجبات المدرسية :

الطالب ان تركنا له مجال يهمل واجب من واجباته رح يتعود

ضروري جدا متابعة الواجبات حتى يحس بالمسؤولية وانه عليه شي لازم يسويه

وحاولوا تسوون له نشاط لاي مادة من المواد بعمل وسيله او مجسم حتى ياخذ علامة نشاط ومشاركة
وقتها رح يستانس انه قدم شي مميز واخذ عليه علامة

اسلوب التحفيز والتشجيع وايد مهم يا امهاتنا العزيزات

مو شرط بتقديم الهدايا دايما

ممكن بالكلمة الحلوة

(عفيا عليك ،، ماشاءالله عليك تدرس عدل )

واليوم رح اكتفي بالحديث عن تجربتي مع عيال رفيجتي

واذا ودكم اكمل معاكم قولولي يا خواتي ومستعده لاي سؤال منكم

عسى ربي يوفق عيالكم في دراستهم

بقلمي الخاص
أختكم

نهى الأحمد