تجربتي مع الاستقالة والتقديم على الديوان وكتاب الاجتياج

مدرس وكاره وظيفتي سنتين قدمت طلب للعمل الاداري ورفض ما لقيت قدامي الا الاستقالة وكانت خدمتي وقتها خمس سنين وهذا اللي صار قدمت الاستقالة واكثر من ثلاث اشهر يالله اخلصها بسبب كسل الموظفات بالتربية واهمالهم المهم خلصتها وعلى طول رحت قدمتها للتامينات عشان يشيلون اسمي عشان اقدر اقدم بالديوان والحمدلله التامينات من افضل الجهات الحكومية في الاتقان والمعاملة عشر ايام وانشال اسمي وقدمت على الديوان بالتلفون بعد خمس ايام من تسجيلي رشحني الديوان للتربية مرة ثانية وهذا الاجراء متوقع رحت للديوان ورفضت عشان ما يرشحوني للتربية مرة ثانية المهم بعد اسبوع او اثنين طلع الترتيب لان التسجيل خلص وبعد فترة بسيطة يطلع الترتيب وهذا نصه:-
2 / 3
مرفوض من جهة الترشيح
إن الترتيب لأولوية الترشيح بين المسجلين في نظام التوظيف يتغير بالنقص أو الزيادة حسب عمليات الترشيح والرفض واستكمال البيانات بصفة يومية

وخلوني افسر لكم النص السابق
2 يعني قدامي بس واحد
3 يعني اللي نفس تخصصي 3 باحثين عن عمل مثل تخصصي

مرفوض من جهة الترشيح —– يعني ترشيح التربية اللي رفضته
والباقي واضح
بعد شهر ونص او شهرين صار رقمي واحد واهني المهم
على طول كلمت سكرتير عضو وقلتله رقمي 1 وابي كتاب احتياج قالي تبي الصحة قلتله اي مكان رد قالي سو الكتاب وجيبه لي على طول مريت مكتبة الطالب وبنص دينار سوالي الكتاب وقدمته للسكرتير ووقعه بعدها توجهت للديوان وقدمت الكتاب واول دفعه نزلت من بعد تقديمي للكتاب نزل اسمي بالصحة راجعت وزارة الصحة وتوظفت

وصراحة كتبت الموضوع عشان اللي يبي يستفيد وما ابي غير الدعاء ماراح تخسرك لما تقول الله يوفق اللي كتب هالموضوع او الله يجزاه خير لان عيوني تفضخت وانا ابحث عن مواضيع تفهمني الاجراءات
واكثر موقعين استفدت منهم هذا المنتدى وحساب الديوان بالتويتر مع ان اللي يكتب بالحساب يطنش ومايرد بس قمت اقرأ التوتات اللي كاتبها والاسئلة اللي تنطرح عليه
صورت كتاب الاحتياج وحاولت ارفقه مع الموضوع بس عليمي ما عرفت راح احاول مرة ثانية واذا ما قدرت اكتبة لكم نص كتاب الاحتياج<<<<<<<<<<< يبي يوفر عليكم نص دينار