تجربتي مع الدكتور ماجد الشمري

السلام عليكم ورحمة الله وبركاته
آنا بصراحة حابة أشارك بتجربتي مع الدكتور صج إن إهي من 5 سنين بس أبسط شي أقدمه للدكتور
آنا الله يسلمكم كنت أعالج عند الدكتورة ناهد العلي وبالشهر الثامن رحت أسوي سونار ولا تكتشف الدكتورة بقعة سودة صوب قلب الجنين جان تقولي لازم نسوي سونار الملون وإهي ماكان عندها طيران مستشفي السلام ماكان عندهم مستشفي الهادي عندهم الجهاز بس مافي أحد يعرف يستخدمه مستشفي المواساة طبعا هالحجي آنا بروحي لا ريلي يدري ولا أمي الله لايوري أحد هاليوم ولا ذيج الدكتورة الهندية تسويلي السونار جان تقولي في بقعة سودة الغالب تكون ماي إهني بدا المشواااار
رديت البيت بجي ونواح ماني عارفة شسوي الياهل إلي كنت منتظرته من 8 سنوات صوب قلبه في ماي ؟؟؟؟
ع فكرة آنا عندي ولد وبنت والتأخير كان بإرادتي كنت أستخدم موانع عشان ما أحمل طبعا الحمدلله هذا برضا زوجي بس غلطة

إختي العودة الله يخليها لي إسألت عن دكتور يقدر يساعدني وصلنا للدكتور ماجد الشمري وعيادته بالجهراء
بالجهرا!!!! والله لو بالصين أروح له
المهم دقيت وأخذت موعد طبعا كان معاه خبر عن حالتي موصينه ع الله يوفقه ويرزقه ويجعل والدينه الجنه إنشاالله إلي وصلني لي عند
وصلت العياده وميته من الخوف أول شي سواه الدكتور سوالي سونار وفعلا تأكد إن في ماي صوب القلب ع الرئه اليسار
قال أول شي لازم أسوي لج تحليل أخذ عينة من ماي الرحم وأدزها لندن إذا الكروموسومات سليمة راح أسويلج عملية بسيطة وأسحب الماي
طبعا ع طول سوالي التحليل ما أجذب عليكم الإبرة عوده وبدون بنج كان يسحب الماي وآنا وزوجي قاع نشوف السونار شلون قاع ينسحب طبعا ماأقولكم شصار فيني من الخرعة ضغطي نزل مت مت وريلي لف ويهه ماتحمل يشوف
الحمدلله قال روحو البيت ونطروا إسبوعين
أهو بجي أهو أعصاب الله لايوريكم خاف بس نطرت إسبوعين الله وكيلكم 10 أيام وأروح الجهراء ولا الدكتور تو الناس ماصارلج إسبوعين وييييييييييييييييه قلبه شاب نار شوف المختبر دكتور الله يخليك والله ماقصر ولا النتيجة طالعة
الحمدلله الكروموسومات سليمه وألحين شراح نسوي
عملية سحب الماي طبعا بنج كامل راح أحط واير صغير عارفين قلم البك موفيه داخله شي بلاستك في حبر مثله بالضبط وأسحب الماي وأخليه معلق بالجنين سبحان الله خاف يتجمع ماي مرة ثانية
بأي مستشفي قال حجزوا بالمواساة قلنا حاضر والله بعد يومين موعدنا رحنا وحجزنا الوالده وإختي وزوجي كانوا معاي أخذنا غرفة وسوولي الترتيبات ننطر ننطر ننطر شالسالفة دكتور وينك ولا يوم دقينا جان يقول لا هالمستشفي ماينفع شلون مالون لا نروح السلام إهني إختي وزوجي راحو كلموه لا السلام ولا أي مستشفي خاص نبي مستشفي حكومي تدرون ليما ألحين ودي أعرف ليش غير رايه
المهم قالنا الصباح بآخذ أجهزتي وبعد يومين بكون ناطركم والله رحنا تدرون يوم سوالي السونار لقا كمية الماي زايدة الله الحافظ وتمت العملية بنجاح سحب الماي وخله الواير في بطني يوم وعيت لقيت جرحين صغار ع بطني سألت الدكتور ليش في جرحين لأن أول محاوله فشلت كانت صوب الصدر فالجنين لف فإضطريت أحاول من الظهر والحمدلله نجحت ألف حمد لك وشكر ياربي ثاني يوم طلعت خو سيدا دكتور متي بولد ها طبيعي ولا قيصرية لأن ولادتي الأولي قيصرية والثانية الحمدلله كانت طبيعي قالي موزين تولدين وإنتي بالثامن إرتاحي بالبيت وكل إسبوع راجعيني

قالي لازم آخذ أبر كورتيزون عشان رئة الجنين والله وأخذت جم إبرة كنت أروح مستشفي مبارك يعطوني إياها طبعا بواسطه هاااا
طبعا الطبيات إشتغلت النفسية زفت والأكل صار تعويض دشيت التاسع إسبوعين مانطرت جان أدق دكتور بس ماني قادرة
نفسيتي تعبت تولدني تولدني ( خبااااااااااااال ) والله وأروح شافني وقال عندنا وقت الجنين مكتمل وماكو أي مانع بس نبي ننطر شوي ( خاف صج )قال أوكي باجر تعالي الصبح مستشفي الصباح الصبح أي صبح اليوم اليوم والله كان الوقت متأخر رديت البيت وسلمت ع عيالي وأخذت جنطتي ورحنا الصباح ولا هذي دكتورة الخفارة لا إنتي تو الناس عليج أمبيه آنا قلبي شاب نار قلت لزوجي دق دق ع الدكتور بدش داخل ولا أحد بيعطيني ويه الله وكيلكم نص ساعة ولا إهي نفسها الدكتورة يايه بنفسها ها شلونج إحنا معاج ولا تخافين ؟؟؟
والله يبدون معاي طلق صناعي وإبتدا المشوااااااااااااااار دكتور ماجد الساعه 7 الصبح عندي قالي آنا ماراح أولدج بس راح أوصيهم عليج والله ماقصر إستشاري إيه وشافني والحمدلله لي غاية ما صارت الساعة 11 الظهر طبعا آنا أطلق بدون صوت الحمدلله بس وصلت مرحلة ماني قادرة أتحمل ولا هذي الدكتورة إلي بس أقول الله يوفقها الدكتوره خالده المجيبل جان تقولي آنا دوامي ينتهي الساعه 1 ولازم أولدج قبل عفوااا دكتورة الله يخليج بنام عواااااااااار بموت لا مايصير إنت توه ماخذه مخدر موزين والله ماكو بعد ساعه بالضبط مع آذان الظهر ولا نادوا الدكتوره ولاااااااااااده ( طبعا ولاده طبيعيه ) خو الياهل ماشفته سيدا خذوا مني قالوا إن حطوه بالحضانه وإن بخير وكان تحت إشراف الدكتور منيف العجمي والحمدلله الياهل بخير وسلام صج إن الوزن كان قليل كيلوين ونص بس الحمدلله
ع فكرة كانت هذي أول عملية بالكويت حق دكتور ماجد الشمري ( سحب الماي من الجنين في بطن الأم ) كان يبيني أنشرها بالجرايد بس آنا رفضت المهم إني أسلم ع هالياهل إلي عذبني هالعذاب لا وأحلي عذاب يصراحة يستاهل
نسيت أقول ترا إهي بنت وألحين إهي بالروضه أدعوا لي إن الله يخليها لي ويبلغني فيها إنشالله وأشوف عيال عيالها قولوا آمين
مشكور يادكتور ماجد مشكور
مشكورة يادكتورة خالدة مشكورة
مشكور يادكتور عبدالله مشكور
مشكور يادكتور سالم مشكور
وسلامتكم …