تجربتي مع المنظار التشخيصي واستئصال كيس على المبيض

قوة بنات شخباركم..

حبيت اقولكم قصتي مع رحلتي للحمل
وبإختصار شديد ان بعد ما فحصت اكتشفت عندي كيسين على المبيض الايسر ونزل كيس واحد بعد شهر وظل الكيس الثاني لمده 8 شهور تقريباً مع المتابعه بالسونار وعطوني حبوب منع الحمل وحبوب تنظم الدورة وشربت اعشاب مراميه والمرقدوش وكليت اناناس وخس وانواع العلاج من النت جربتها ونفس الشئ مو راضي يروح وقال لي الدكتور احتمال كبير ان الي فيني كيس دم ولازم منظار وتوكلت على الله
وحدد لي موعد المنظار وبعدها قال لي روحي المختبر علشان ياخذون عينه دم وبعدها روحي لدكتور التخدير ؟؟
ها شنو دكتور التخذير حدي خفت ومن الخوف قلت له ما اعرف مكان الدكتور لوووووول
قال لي الممرضه بتجي معاج
ودكتور التخدير يسألني اذا فيني ضغظ وسكري او حساسيه او انفلونزا
وقلت له معاي زكام وقال لي اخذي علاج علشان ما يزيد الزكام لبكرة العمليه واخذت العلاج
والحمدلله خف

وجا موعد العمليه وقال لي صومي من الساعه 12 الليل وموعد العمليه 12 الظهر بس انا
من خوفتي ما اكلت الا فطيرة جبن لووول ونمت ليوم ثاني ورحت المستشفى وجابو لي لبس عور قلبي لووووول ماكو ستر فيه خخخخ وبعدها ريلي قعد معاي شوي وقال لي نامي الحين باقي 4 ساعات ارتاحي وانا بروح وبرجع قلت له اوكي وبعد بساعه جت الممرضه تحط لي
ابراه الدرب وبس شفت الابره افتتحت اذاعه البجي لووول والممرضات تجمعو علي ويهدوني مرة حبوبات وكل شوي يطلو علي ويضحكوني وبعدها جت الساعه 10 ونص تقول لي الممرضه يلا ماما في عمليه قلت له ها؟ شنو الدكتور قال الساعه 12 قالت لالا الحين انت جيب جوال مال انت يحط في الامانات وقلت له طيب بدق على ريلي واتصل عليه بسرعه تعال بس خلاص ودوني غرفه العمليات وما كان معاي اهئ اهئ واول مادخلوني كأنه فريزر بارد المكان وكل شئ اخضر وخلوني انطر في غرفه الانعاش ومن الاسم حدي خفت وابجي وكل شوي تجي وحده تهديني ماكو خوف والعمليه بسيطه وبعدها دخلوني غرفه العمليات وجا دكتور وهو يضحك حده فاضي ويقول لي انا دكتور التخدير مبروك على الخبر عيل لوووول وبس حط الابر في الدرب دقيقه بس وحسيت جسمي بارد وممرضه تقول لي الله يرزقج بالتوأم واحلام سعيده وعلى طول نمت وماحسيت بشئ وبعدها حسيت بانهم ينادوني علشان اقعد بس مو عارفه شلون افتح عيوني وابتدت العمليه الساعه 11 وقعدت الساعه 2 وتوني فتحت عيوني على طول شالو الاجهزة علي وطلعوني من غرفه الانعاش وركبوني غرفه الاستراحه وريلي ينطرني برا يتكلم وانا مو فاهمه له وبعدها قلت له ابي اكلم امي واتصل لها وقلت له امي لا تبجي انا طلعت بالسلامه وسكرت ونمت على طول وقعدت على الساعه 3 ونص شفت اختي وريلي ينطروني اقعد وسولفت معاهم شوي ورديت نمت حدي دايخه وجت بعدها امي وسولف معاها وفجأه حسيت بدوار براسي وقلبي فيه عوار بس ما حبيت اقول الى امي علشان ما تحاتيني سويت نفسي بنام وقالت امي خلج مرتاحه انا بروح وبس طلعت على طول دقيت على الممرضه قلت لها تعبانه رفعت راسي ورجعت كل الماي لان ممنوع بعد العمليه اكل مع اني يوعانه والحمدلله اارتحت ومع ذلك امي حست اني تعبانه واتصل لي قال لي صرتي زينه؟ قلت لها اي الحمدلله فديتها الله يخليها لي يااارب
والمشكله الكبيرة الي ما اكتشفتها ان فيني قصطرة للبول اكرمكم الله وجت الممرضه تشيله يعور عوار مو طبيعي امبيه مو صج تمنيت ما سويت منظار والله خلاص تعبت وكل شوي تحاميل وحبوب وابراه بالدرب وقلت لها بروح الحمام ودايخ راسي وراحت معاي وماسكرت الباب كاني مسويه عمليه قصيريه مااعرف امشي ولا اقعد ويوم ثاني سوى لي الدكتور خروج
وطبعاً المنظار 3 فتحات وانا سوى لي 2 على اليسار لان فيني كيس و1 تحت السره

والاهم هو نتائج المنظار وهذا الالم صج
قال لي انتي عندج مرض البطانه المهاجرة لكن بنسبه قليله وعندج بقع دم بالرحم وكويتهم لج وكويت مكان الكيس اما المبيض الايمن سليم الحمدلله ووضع الرحم طبيعي ومافيه اي عيب خلقي

والصدمه الي ما توقعتها
ان عندي التصاقات بالانابيب وقال لي لان كان عندج الالتهابات من قبل وانا فتحتهم
بالسائل شوي وبعطيج مضاد حيوي وان شاء الله يرجع طبيعي

بس بصراحه الم المنظار يتعب ماتوقعته جذي والله خصوصاً فتحه الي تحت السر
والحمدلله على كل حال والله يعوضني عن تعبي بتوأم يااااااارب

ودعواتكم لي بالذريه الصالحه