تعالوا نعيد تفكيرنا من جديد ونفتح صفحه جديده مع رب العالمين

السلم عليكم ورحمة الله وبركاته

خواتي بعد الفاجعه اللي صارت بمنطقة الجهراء للمره الثانيه على التوالي لم يمضي على الحادثه الاولى سوى 5 اشهر ؟

وهذي فاجعه جديده فطرت قلوب الناس

خواتي خلونا نفكر ليش هالحوادث تكررت مرتين وبنفس المكان وبنفس المناسبه

هذي رساله من رب العالمين

قال رسول الله صلى الله عليه وسلم (إن الله كره لكم ثلاثاً قيل وقال وإضاعة المال وكثرة السؤال)

وفي آية قرآنية عن الإسراف (وَلا تُبَذِّرْ تَبْذِيراً * إِنَّ الْمُبَذِّرِينَ كَانُوا إِخْوَانَ الشَّيَاطِينِ وَكَانَ الشَّيْطَانُ لِرَبِّهِ كَفُوراً)

خواتي لاحظنا بالفتره الاخيره كثرة البهرجه والبطر والاسراف وخصوصا في حفلات الزواج وغيرها عسى ما الوحده صار عندها عرس ركض للمشاغل والصالونات وتقط اللي قدامها واللي وراها عشان بس يقولون عنها حلوه وذربه ؟!

طيب حلوه وذربه وبعدين ؟

ياخواتي كلنا نحب نكشخ ونلبس ونكون باحلى صوره بس بعقل ليش كل ماصار مناسبه راحو البنات البعض طبعا الله يهديهم نفخ وشفط وتجميل طيب ليش مو راضيه عن خلقة ربج معترضه على شكلج ربج لما خلقج كونج باحلى صوره ورب العالمين عارف اللي يصلحلج واللي مايصلحلج ياخواتي لاتخدعكم المظاهر ترى المظاهر خداعه ولاتغركم فلانه قطت وسوت انتي اعدلي واحتسبي الاجر عند رب العالمين بس قولي اللهم لك الحمد والشكر على نعمة الصحه والعافيه

والله ياخواتي ناس تملك مال قارون بس تبي الصحه والعافيه (لاحول ولا قوة الا بالله العلي العظيم )

خواتي من اليوم غيروا من انفسكم ولاتستهينون في اللي صار صدقوني هذا غضب من رب العالمين مو معقولة حادثتين تفصل بينهم اشهر قليله جاءت بدون سبب ولا حكمه من رب العالمين

لاتقولون مولدات كهربائيه والتماس هذا احنا قبل لاصار عندنا عرس ليتاتنا اترست الفريج من اوله لاخره وماكان عندنا نفس التطور اللي الحين والله حافظنا لاننا كنا عايشين على قدنا ماكانت تخدعنا المظاهر ولا كنا نتفاخر ولا نبطر بنعمة رب العالمين كنا نعيش على قدنا ولاكنا نطالع فلانه شنو عندها وشنو ماعندها ولا كنا نقول انا بسوي هالشي عشان اقث فلانه وانا بسوي هالشي عشان احرق قلب فلانه ؟ طيب وبعدين

هل ربنا راضي علينا في هالتصرفات؟

خواتي والله انا اكتب لكم هالكلام وفيني غصه وقهر على اللي صار والله اني انصحكم لوجه الله ومابي منكم ولا شي بس ابيكم شوي تعدون بينكم وبين نفسكم ولاتخلون هالشي يمر بسهوله لانه اللي صار مو الشي السهل اللي الواحد يقدر ينساه
خلونا نفتح صفحه جديده مع رب العالمين ونوعده مانقصر بحقه ابد وقبل لا نسوي اي شي نشوف هل هذا الشئ رب العالمين راضي عنه او لا ؟

والله ياخواتي ماكو شي بهالدنيا اهم من رضا رب العالمين ورضا الوالدين ولا هالدنيا فانيه بغمضة عين لاتقولون حريق ولا غيره ناس تموت وهي بفراشها (اللهم حسن الخاتمه )

خواتي من هاليوم ابعدو عنكم وسواس الجمال انتي حلوه بخلقة رب العالمين (وخلقناكم في احسن تقويم ) لاتقولين خشمي ولا خدودي ولا شفايفي صدقوني ياخواتي هلاشياء فانيه والجمال جمال الروح ونور وجهج برضى رب العالمين خلي عنج عمليات التجميل انتي حلوه بطيبتج وباخلاقج مو بشكلج الناس بعد عمر طويل لكم بتقول والله فلانه كانت حلوه ؟ ولا بتقول بيض الله وجه فلانه باخلاقها وطيبتها واحترامها؟

وخلو عنكم البطر والمجاكر بالعروس رب العالمين مو راضي عن تصرفاتنا اللي نسويها والدليل حادثتين تفرق بينهم اشهر قليله وكلهم نفس المكان ونفس المناسبه مافكرتوا ليش وشمعنى ليش ماصارت في خيام الرياجيل ليش صارت فينا ادري انه قضاء وقدر بس الواحد لازم يعيد تفكيره ويرضي ربه قبل كل شي

والله ياخواتي اني من امس ما نمت من هالفاجعه لاحول ولا قوة الا بالله العلي العظيم

اللهم اغفر لي موتانا وموتا المسلمين اللهم اغفر لهم وارحمهم وعافهم واعفو عنهم واكرم ونزلهم ووسع مدخلها ونقهم بالخطياء كما تنقي الثوب الابيض من الدنس

اللهم وعوض اهلهم بمصيبتهم وثبتهم واجرهم واخلفهم بخير منها يارحمان يامنان ياذو الفضل العظيم

واخيرا وليس اخرا اتمنى تفهموني وتسامحوني اذا زعلتكم او ضايقتكم بالموضوع

خواتي من اليوم كل وحده منكم تحط حصاله في بيتها ويوميا حطي فيها 50 فلس او 100 اللي يطلع معاج صج اهي صغيره في عيونا بس عند رب العالمين صدقه ودفعة بلاء لاتستهينون بهالشي

دعواتكم خواتي لموتى الجهراء واهلهم

وان لله وان اليه راجعون اللهم لا اعتراض لامرك