تعال تكلمي عن وظيفتج – ابي العموم يشارك

شخباركم بنات

بنات ابي كل وحده تدش تكتب عن وظيفتها شنو القوانين والاشياء المسموحه والغير مسموحه

كلمينا عن طبيعه شغلج

اى قانون تعرفينه او معلومه او اى شي يخص الديره تعالي قوليلنا خلونا نستفيد من بعض

انا بنسبة لي اشتغل مجهزة تغذيه وحابه افيدكم واعلمكم عن شغلنا

طبعا مثل ما انتو عارفين وزارة التربيه تعاقدت مع عدة شركات لتجهيز الوجبات وتوزيعها على طلبة المدارسه

الشركات وظفونا عندهم ووزعونا على مدارس التربيه

بحسبه بسيطه جذي كل موظفه مسؤوله عن 100 طالب

المدرسه الي فيها 600 طالب يكون فيها 6 مجهزات تغذيه

شغلنا يبدا من الساعه 7 ونص نطلع العصير والماي ونحطهم على العربانات نفججهم ونبدا بتوزيع الماي على اول حصه

عقبها ناخذ سلال الاكل والعصير ونوزعهم جدام الصفوف

بحدود الساعه تسع ونص نبدا نوزع الوجبات على الصفوف

نلم الزايد ونوديه للاداره ونوقع ونطلع

هذا بخصوص المدارس الي مافيها صالات للاكل

وفي شغله عندنا اسمها وجبات خاصه

هالوجبات تكون حق البنات الي فيهم حساسيه او ربو او غيره يحطولهم اكل خاص فيهم وينكتب عليهم اساامي البنات الي يعانون من هالمشاكل – بس عيبهم ان كل يوم نفس الوجبه وهشي مكدر خاطر وايد بنات

ومعلومه حابه اضيفها تر من شروط المناقصات الي رست على الشركات ان يكون 80 بالميه من مجهزات التغذيه كويتيات

طبعا كلنا خضعنا لفحوصات طبيه ولازم نلبس دسوس وقبعات على روسنا والبوالطو وقت التوزيع وفرز الاكل

والاهم من هذا كله ان الي يشرفون على الوجبات هم وزارة الصحه

يعني وبشكل مخصص وزارة الصحه تدز للتربيه قائمه بالوجبات اليوميه وشنو المفروض تكون الوجبه لليوم والتربيه تدزها للشركات

بهالحاله اكل اليهال صحي وتحت اشراف طبي

بنسبة للمعاشات 200 من الشركه و360 دعم العماله

يلا دوركم