تقييم مفصل لدكاترة كلية الشريعه

يمكن يكون الدكتور غيّر نظامه بس عموماً هالدكتور محترررررم ومايظلم تااخذين حقج وزياادة

اشلون شرحه : ممتاز
اشلونه من ناحية التصحيح : الامتحان موحد والاجابة يا صح يا خطأ .. اعتقد ماله شغل تصحيحها : )
تعامله مع الطالبات : شديييده بس والله على حق تبي البنات يعرفون لـ التجويد ويتمكنون منه
اشلون درجاته : اللي تستاهل تاخذ A بس شكثر عندها D و F .. اذكرر لما أخذت عندها دي سجدت شكر وبجيت ودقيت على امي ابشرها اني نجحت بالمادة ههههههههههه ساعتها عرفت اني مو فالحة بالتجويد فـ حوّلت مايصير ادرس طلبة شي انا مو فاهمته أصلاً ولا خوش كلية والله
جم تيرم يعطي : ميد تيرم واحد "موحد"+ وفاينل " شفوي " وفاينل " كتابة "

مادة التجويد تقسيم الدرجات فيها :

10 – من الدكتور
30 – الميدتيرم " موحد"
30- فاينل " شفوي"
30- فاينل "كتابة"

وكنت ماخذه عندهم اول كورس لي قبل سنتين .. اذا تذكرت شي بكتبه

اسم الدكتور :
د. دهام الفضلي

نوع الاختبار موضوعي ولا مقالي :
مقالي

يطلب تقارير وبحوث وبرزنتيشنات ولا لا :
لا

يقبل بالطبيات :
اي يقبل

اشلون شرحه :
شرحه ممتاز عجيب، من الدكاترة اللي صج محاضراتهم حلوه، يعطي مرات فوائد تنفعكم، يشرح عن شغلة لو برا المنهج عادي .. يتطرق لمواضيع لها دخل بموضوع الدرس، يستشهد فيها، او يبين حكم شيء شرعي .. يعني مو مثل بعض الدكاترة يشرح الكتاب وبس، لا اهو يحرص ان يفيدكم ف يستشهد ب أمثلة ومسائل ثانية وجذي ..

اشلونه من ناحية التصحيح :
ممتاز

تعامله مع الطالبات :
صدره وسيع حده، انا لو مكانه جان ما استحملت، يجاوب على اسئلة البنات بالمسائل الشرعية حتى لو الاسئلة كانت من برا المنهج، يجاوبج عادي .. شعبتنا كانوا كله يسئلونه كل ما قال شيء نطت وحده تسأل جزاه الله خير ما قصر، وحتى هالشيء فادنا وأنصح تجيبون نوت تكتبون فيها الفوائد تنفعكم ..

اشلون درجاته :
ما يظلم وهذا المهم، عطاني حقي ..
والدرجات متنوعة، صعبة الـ 120 طالبة تلاقينهم امتيازات، لكن قال لنا اللي تجيب 89 اعتبرها A .. ( الـA من 95 وفوق )

جم مديتيرم يعطي :
واحد فصلي .. وفاينل .. كلهم مقالي

الفاينل قلنا له دكتور حط لنا سبع اسئلة من كل فصل سؤال، ونختار خمس نحلها ..

وسواها خوش طريقة حتى اللي طافها فصل وما درسته تقدر تحل اسئله ثانية اهي دارستها

يعيد الامتحان للي غابوا، واللي مو عاجبتها درجتها، وعطاهم تقريبًا نفس امتحانا

أنصح فيه
المادة فيها صعوبه لكن حلوه امتحاناته وسهله ما يعقدج .
واللي تبي نظام اسئلته، تدزلي خاص أقدر افيدها .

اسم الدكتور :
د. مريم الشمري

وصف المقرر :
المقرر من اسمه يمكن ما ينفهم، ف عشان جذي حبيت أحط وصف عساس قبل لا تسجلون تكونون على بينة .. واتمنى الكل يسوون جذي :d

المقرر عن الزواج وأحكامه .. مسميات الزواج قبل الإسلام – أركان وشروط عقد الزواج – أنواع شروط عقود الزواج ( الصحة – الإنعقاد – النفاذ – اللزوم ) – أنواع الزواج وأحكامه من حيث استيفاء الشروط – بعدين تدشون في المحرمات والولاية والكفاءة والمهور وحقوق كل من الزوجين على الأخر ..

نوع الاختبار موضوعي ولا مقالي :

متنوع ..
اختاري الإجابة الصحيحة
عرفي او اكتبي المصطلح
اذكري الدليل الشرعي
صح او خطأ

يطلب تقارير وبحوث وبرزنتيشنات ولا لا :
لا

يقبل بالطبيات :
إي، وتعطي بونس درجتين للي ما يغيبون ولا مرة ..

اشلون شرحه :
ممتازة، دكتورة مجتهدة وشرحها عجيب أفهم عليها حيل، ومحاضرتها حلوه، وتسولف بمواقف وجذي عساس تبسط لكم المعلومة، خوش دكتورة الله يجزاها خير، لو تنزل مقررات ثانية جان سجلت عندها .. ( اهي تعطي فقه1 وأحوال 1 )

اشلونه من ناحية التصحيح :
ممتازة ..

تعامله مع الطالبات :
محترمة وخوش دكتورة ..

اشلون درجاته :
حلوه درجاتها، وطبعًا تتنوع الدرجات القاعة فيه فوق الـ100 طالبة، لكن ما تظلمج وتعطيج وتحاول ترفعج واللي تستاهل الـa تعطيها ..

جم مديتيرم يعطي :
واحد فصلي .. واحد قصير .. فاينل

انصح فيها