جربتي او سمعتي عن الغدر تعالي قولي لنا قصتج واحنا بنشاركج

الله يعينج حبيبتي وعن جد قصتج وايد مأثره

تسلمين حبيبتي وانا اعتبر ان كل بلاء او ضيق يصير لي هو نعمه وقرب اكثر من الله لا الله اذا احب ابتلاه والحمدلله علي كل حل

بس الغدر والنفاق مالهم حل للاسف انتشرو وكثير ن البر يعطيك من طرف اللسان حلاوة ويروغ منك كما يروغ الثعلب

الله ينصرج حبيبتي ويشفيج فديتج تقبلي مروري

غدرة فيني زميلتي بالعمل وكرهت شغلي كله
كانت قدامي اهي الحبوبه الطيبه المغلوبه على امرها واللي تحبني ويضيق صدرها لو اتغيب عن الشغل
وكنت احسن الظن فيها وعلى نيتي الطيبه والحمد لله
لين جاء يوم واتصات على مشرفتنا بالعمل وقالت لها ان جوجو مهمله وما تشتغل وبس قاعده تسولف وتضحك
مع اني والله ارجع البيت وظهري يوجعني من الشغل واحيانا ما اقدر انام من وجع ظهري كله من الشغل بالدوام
واذا بغت تغيب تقوم باخر الدوام تحوس بالحسابات حق الشركه
اجي من باجر اشوف الحسابات حوووووسه وتنحط السالفه على راسي وينخصم من مرتبي وانا يا غافلين لكم الله ما كنت ادري انها تلعب بالحسابات وتاخذ الفلوس بمخباتها
وسوتها فيني مرتين حسبي الله ونعم الوكيل
بعدها المشرفه حقت الشركه شكت بالسالفه واتصلت علي وانا بالبيت وتكلمت معي وصحتني على نفسي
ودقت على البنت الغداره وتهاوشت معها .. تدرون وش سوت الغداره ؟؟ من بكره ما داومت وجت امها تهوش وتصارخ ليش تتهمون بنتي
عاد امها من احد الجنسيات العربيه اللي معروفين بطول اللسان وحب الفلوس (ما ابغى اقول ويزعلون البنات اللي لهم علاقه ذيك الديره)

صرت اشتغل بصوب واهي بصوب ولا بينت لها اني حاسه بغدرها
وشفت فيها يووووووم اسود والحمدلله .. بس بعد شنو ؟؟ بعد مالهفت فلوس الشركه
ياربي ماتخاف ربي يعاقبها ؟؟ ماتخاف ربي ما يوفقها بحياتها؟؟

الحمد لله اللي عافاني مما ابتلاها فيه وفضلنا على كثير من خلقه تفضيلاء

الله يوفقج اختي ويشفيج ويخليلج ولدج

آه من الدوام وبلاوي الدوام شكثر أشياء تضيق الخلق حاشتني منه, ومن بينها الغدر.

في زميلة لي بدوامي, كنت تقريبا مرافجتها عشان آنا وياها تخصصنا واحد وبنفس القسم, غير ان سوالفها كانت تونس وآنا هم بعد أحب السوالف وآخذ وأعطي معاها, بس صراحة كان في مآخذ لي عليها, يعني أشوفها وايد تنافق وتساحل بالحجي, ووايد تاخذ راحتها بالسوالف مع الرياييل بالدوام, هم كان لبسها مو عاجبني صراحة العباة شوي وتنشق من كثر ما اهيا ضيقة عليها.

المهم آنا مصيبتي إذا خذيت على أحد أسولف له اللي ببالي علطول, وهالشي ودرني وايد ان اللي بقلبي على لساني, فكنت أقولها عن موظف عندنا بالدوام ان شكله حلو, قامت تقولي شرايج أضبطج معاه ومادري شنو, أخليه يخطبج, قلت لها شالسالفة؟! بالله عرفت آنا زينه من شينه يمكن مو زين وأخلاقه زفت أو شي جذي, تقول لا يقولون عنه زين ومادري شنو. المهم عقب هالكلام بفترة يعني جم اسبوع, ولا الاخت تدش من الصبح معصبة ومنفسه وحاطة حرتها فيني وتقولي خلصي الشغل وماردي شالسالفة, قلتلها شغلي وكيفي مالج شغل فيني متى أخلصه مو انتي اللي تتحكمين فيني!! وبعدين طلعت من المكتب واهيا معصبة, وبعد شوي ردت وقالتلي ما دريتي شيقول فلان, عن الموظف اللي تكلمنا عنه من قبل, قلت لها شنو, جان تقول يتهمني اني أكتبله رسايل حب وغرام كل يوم, لأن الرسايل مكتوبة بالانجليزي!! آنا وياها زينين بالانجليزي معروفين بالادارة كلها بهالشي, فتقولي لا يكون انتي اللي كاتبة هالرسايل واهوا لازق هالشغلة فيني, قلتلها شكو يعني من زود المحبة ولا شنو, أصلا آنا ما عرفه وحتى لو أعرفه ما أنزل لهالمواصيل هذي مهما كان, ما تربيت على جذي.

بذاك الوقت عطينا السالفة طاف, وآنا خذيت فكرة مو زينة عن الموظف, وعقب السالفة بسنة تقريبا اهيا هالبنت انتقلت, واكتشفت ان وايد بلاوي كانت تسويها لي وآنا يا غافلين لكم الله, كانت تشيش مراقبتنا على, وتضيع بعض الأوراق اللي أشتغل فيها, وهم وصلني خبر عنها ان سمعتها زفت بزفت وإن أحسن لي أبعد عنها, ولما سويت هالشي استلمتي بالأذية ولعوزتني اللي خلاص الدوام صار بالنسبة لي لا يطاق ينيييييييييييييت منها. حتى قبل لا تنتقل خذيت اجازة ورحت العمرة مع الأهل و قعدت أدعي يا رب تخلصني منها!! والحمد لله رب العالمين استجاب دعائي وعرفت عقب خمالها اللي كنت غافلة عنه وسوالفها اللي من تحت لي تحت.

وبالنسبة لسالفتها اهيا ويا الموظف, عرفت آنا من زميلة لهالموظف صرت آنا معاها بقسم واحد وكانت علاقتي وايد زينة معاها, واهيا خوش مرة محترمة وحبوبة, قلتلها عن زميلتي ذيك وان فلان الموظف قالها انها مطرشة رسايل, جان تقول امبلى كانت تطرشله وتبيه بدليل لما كلمها وواجهها انقطعت هالرسايل عنه وبذاك الوقت يت لها زميلتي وقالت لها عني "ترا فلانة معجبة بفلان" يعني نغزة قوية اني آنا اللي أطرش له الرسايل الحقيرة الجذابة, صج غدارة وتطعن بالظهر, بتضرني بسمعتي وتتبلى علي عشان تبرئ نفسها, وعلى فكرة الموظف كل من يمدح فيه ويقولون عنه ملتزم ومحترم, فلما قستها بالعقل والمنطق, واحد مثله مستواه وايد أعلى من أشكالها الخايسة, ومو معقولة بيعطي اللي مثلها ويه, والحمدلله ما قدرت تنال مني ومردها اهيا طلعت وآنا تميت, والكل يعرف اني أشرف من مليووووون من أمثالها.

لا وللعلم, حاولت بجم وحدة من رفيجاتي بالدوام انهم تخليهم نفسها, يتعرفون على شباب ومن هالسوالف, حسبي الله عليها, بس مرده هالشي انقلب ضدها وكشف حقيقتها القذرة.

وآسفة طولت وايد بالقصة بس ما عرف أكتب سالفة جذي بدون تفصيل

السلام عليكم أناحابه أشارك بهالموضوع عن الغدر بس لافضيت بنزل الموضوع بس حبيت أرفع الموضوع الحين

أب أب