حملة [ يا صاحبة القلب الأبيض ]

السلام عليكم ورحمة الله وبركاته
________________

اليوم راح أطلب منكم طلب، أبي كل وحدة فيكم اتييب ما يلي :
اسفنجة/ كلوريكس/ ماي/ ماي ورد

لا تخافين مابيج تغسلين زوليتكم

أبيج تغسلين شي ثاني، شي قال عنه رسولنا عليه الصلاة والسلام
إذا صلحت صلح الجسد كله، وإذا فسدت فسد الجسد كله

تدرون شنو أهوا؟ قلبج يالحبيبة

سالفة قديمة، هوشة، touch بينج وبين رفيجة ولا بنت خالة
نقطة سودة بقلبج، شايلة بقلبج عليها ..

لي متى بتظل القلوب شايلة على بعضها؟ ولي متى الزعل؟
ألم يحن موعد التسامح؟ ما يا الوقت اللي لازم نقول فيه خلاص !
انتهى اللي فات، مسموحة ..

غلطت بحقج؟ عورت قلبج؟ طعنت فيج من وراج؟
تخيلي على قد ما انتي تأذيتي منها، تسامحينها !
شنو بيكون جزاج عند ربج سبحانه؟

ما تبين تكونين من اللي مدحهم الله، حين قال تعالى :
[ والكاظمين الغيظ والعافين عن الناس والله يحب المحسنين ]

شتسوى هالدنيا، والله ما تسوى تعورين قلبج وتشيلين على أحد
اللي فات مات، واللي غلط بحقج الله يسامحه خلي قلبج أكبر من جذي
وابن آدم خطاء هذي طبيعتنا إحنا البشر !

إحنا شنبي من هالدنيا؟ غير رضا الرحمن؟
وعشانه كل شي نسوي، إذا كان يحب إن نسامح اللي أخطؤوا بحقنا
نسااااامح واحنا راضيييين ونقول الحمدلله جانه هالشي بيزيد من أجرنا عند رب العالمين

ما أبي أطول عليكم بس نبي نسوي حملة الغرض منها إن نسااااااااامح
ونبي بهالحملة نتذكر منو غلط بحقنا؟ ونقول يا رب سامحته، سامحه يا رب
ونقول يا رب سامحت عبادك، يا رب سامحت كل من غلط بحقي
يا رب سااااااااااااامحني وعوضني خيراً في الدنيا وفي الآخرة وارزقني جنتك ..

أبيج تغسلين قلبج بالكلوريكس وتنسين كللللل اللي فات
أبيج تفركين قلبج بالاسفنجة وتمحين كل ذرة حقد أو حسد أو كره
أبيج تصبين الماي على قلبج وتطهريييييينه من كل ذنب
أبيج تعطرين قلبج بماي الورد، بذكر الرحمن يا أمة الرحمن
والله سبحانه قال : [ ألا بذكر الله تطمئن القلوب ]

منوووووو معانا بالحملة؟؟؟

والسلام عليكم ورحمة الله وبركاته