خاص لأمهات الأولاد والمدرسات

السلام عليكم
اذا بتسألون ليش أمهات الأولاد والمدرسات بس
لأن انا مشكلتي مع ولدي.. ومن المدرسه
ومادري شسوي وشلون اتصرف لأن ماعندي أولاد غيره وما اعرف شلون التصرف السليم لمثل هالمشكله

ولدي بثانيه ابتدائي
وطبعا انا تربيتي حق ولدي مثل ما تتمنى كل أم تربي ولدها
أدب..احترام..نظافه..هدوء
على اساس اني ابي ولدي يصير احسن انسان بالدنيا
ماتوقعت ان في اشياء مانقدر نتحكم فيها
شلون يقايش ولدي ربعه بالمدرسه؟؟
شلون يتعامل مع أولاد كلامهم كله سب وقلة أدب؟؟
شلون يتعامل مع أولاد مايتعاملون الا بالطق والهواش؟؟
ولدي اليوم راد من المدرسه ويقولي ان ربعه قالوله(…….)
طبعا الكلمه اللي قالها لي مايدري انها كلمه وصخه وحتى الرياييل يستحون يقولونها وسألني عن معناها
انا حدي انصدمت.. خصوصا ان الكلمه يت جدام بنتي

ويقول انه اذا رد عليهم يقولونله كلام أوصخ وأوصخ
وطبعا عقب ما قام ينطق كل يوم بالمدرسه ولما يقول حق الأخصائية والا الناظره ماكو فايده ويقولون عادي الصبيان هذا لعبهم
فقلتله اللي يطقك طقه
الولد استانس جني معطيته القرين لايت
وكل يوم يايني كافخ ومكفوخ
بس بالنسبه للكلام الوصخ واللي محد يرضى ينقال
شقوله؟؟ وشعلمه؟؟
اعطيه دروس مثلا بالكلام الوصخ عشان يرد فيه؟؟
والا ابلغ المدرسات أو الأخصائيه على وعسى يسوون شي؟؟
ولا اخلي ولدي كل يوم ينسب وينطق ويسكت علابو انه مؤدب ومحترم
والله حدي محتاره ومادري شسوي
ياليت اللي عندها حل من المدرسات تساعدني
أو أم مرت بنفس تجربتي تقولي شنو سوت