خطوات عملية و افكار تساعدك على الالتزام و التقرب من ربنا

السلام عليكم و رحمة الله و بركاته

ازيكن يا فتوكاتي كل سنة و انتن طيبات بمناسبة العيد طبعاً

الموضوع ده بذرة
يعني مجرد فكرة محتاجة مشاركاتكم و افكاركم عشان تكبر
مفيش حاجه الزام
و الطاعات المذكورة في هذا الموضوع ليست هي كل شئ
باب الخير واسع و اوسع من اننا نحصره في موضوع

المهم
عايزة تلتزمي و تقربي من ربنا بس مش عارفه تبدأي منين؟ نفسك ربنا يرضى عنك؟

اقولك

احنا هنعمل خطة و هنبقى منظمين عشان الواحد لما بيمشي بالبركة كده بعد شويه بيقف

بس في الأول عايزين نحفظ الاحاديث دي عن ظهر قلب عشان هتساعدنا كتير بعد كده

أحب الأعمال إلى الله أدومها و إن قل *1

لا تحقرن من المعروف شيئا*2

يقول الله تعالى : أنا عند ظن عبدي بي ، وأنا معه إذا ذكرني ،
فإن ذكرني في نفسه ذكرته في نفسي ، وإن ذكرني في ملأ ذكرته في ملأ خير منهم ، وإن تقرب إلي شبرا تقربت إليه ذراعا ، وإن تقرب إلي ذراعا تقربت إليه باعا ، وإن أتاني يمشي أتيته هرولة *3

ثانياً
كل انسان له طريقة يقرب بيها من ربنا
مثلا انا بحب الصيام جداً و الصيام عندي اسهل من اني اصلي ركعتين سنة
غيري بترتاح في قراءة القرآن جداً بس مش بتقدر تصوم
غيري بتتصدق كتير و هكذا
فجربي و نوعي في العبادات لحد ما تلاقي نفسك

ماشي؟

دلوقتي نشوف الرسمة دي و هنشرح كل نقطة بشوية تفصيل

اول حاجة الصلاة
و دي هتنقسم لحاجتين
1) التركيز في الصلاة المفروضة + الصلاة بعد الاذان على طول
مين مننا مش بيجيله الشيطان و هو بيصلي و يخليه يسرح في الطبيخ و الدراسة و اللي بيحصل في البيت الخ؟

الهدف: مجاهدة النفس و محاولة طرد الافكار دي و التركيز في اللي بنقوله

لازم نبقى عارفين ان محدش بيوصل للخشوع في الصلاة كده من اول مرة
النهاردة هركز في الفاتحة, بكره هركز في الركعة الاولى , بعده هركز في ركعة و نص و هكذا لحد ما اوصل

طيب ممكن نعمل ايه عشان نركز في الصلاة؟
1) نعمل لنفسنا ركن في الاوضة و نفرش فيه سجادة صلاة- هو ده هيبقى المسجد بتاعك
2) نتوضأ بالراحة و نتقن الوضوء
3) ننوع في السور اللي بنقراها
4) لو بتصلي بسرعة بطأي شويه, فكري في كل كلمة بتقوليها
5) تخيلي نفسك واقفة قدام ملك عظيم – بتشكريه و تحمديه و تسبحي له, افتكري ايام امتحانات الشفوي بتبقي عاملة ازاي
4)نحتسب عند ربنا المجهود اللي بنعمله عشان نخشع في الصلاة

طيب نصلي بعد الاذان ليه؟ عشان أحب العمل الى الله الصلاة على وقتها *15 و لو ما صليناش ورا الاذان على طول هنكسل و نفضل قاعدين للصلاة اللي بعدها و هنضطر نكروت الصلاة و نصليها بسرعة

2) السنن ( الضحى – بعد/قبل الصلوات المفروضة – قيام الليل)
الضحى: دي سنة, وقتها من بعد الشروق بربع ساعة الى قبل اذان الظهر بربع ساعة – عدد ركعاتها من اثنين الى ثمانية
فضل صلاة الضحى

السنن الرواتب: ركعتان قبل الفجر – 4 ركعات قبل الظهر- ركعتان بعد الظهر- ركعتان بعد المغرب – ركعتان بعد العشاء
ثواب السنن الرواتب

قيام الليل او التهجد: هي الصلاة من بعد العشاء لقبل الفجر – عدد ركعاتها مفتوح و اقل حاجه ركعة واحدة – بتتصلى ركعتين و تسلمي و بعدين ركعتين و تسلمي و هكذا و بعديها صلاة الوتر ركعة او 3 او 5 او 7
التجهد هو قيام الليل بس الفرق ان التهجد بيكون بعد النوم – يعني بعد العشاء لو نمتي و صحيتي صليتي يبقى اسمه تهجد
فضل قيام الليل

ثاني حاجة الصوم
عندك الاثنين و الخميس
و الايام الـ13 و 14 و 15 من كل شهر هجري
في الأول طبعا هتتعبي و تعطشي و اول ما تفطري هتاكلي كتير بس بعد فترة هتلاقي نفسك بقيتي تستحملي و خلاص مالكيش نفس تاكلي حتى بعد المغرب
ثواب الصوم

ثالث حاجه بر الوالدين
1)لو احياء
نكلمهم كويس مهما عملوا – نساعدهم – نبوس ايديهم – نفرحهم- تسلم ايديكي يا ماما – ربنا يخليك لينا يا بابا

و مهما عملوا نعاملهم بما يرضي الله
لأن اللي بيعق والديه لا يدخل الجنة*16

2)لو اموات
نستغفر لهم و ندعي لهم بالرحمة

رابع حاجه صلة الرحم
بالتليفون – بالانترنت – بالزيارات – بالخروجات – بالتهنئة في المناسبات
فضل صلة الرحم

خامس حاجه يا حلوين و هي المعاملات
و دي ناس كتير بتنساها و بتختصر الدين في الصلاة و الصوم بس للأسف

ساعدي الناس :
تعين الرجل في دابته فتحمله عليها أو ترفع له عليها متاعه ، صدقة*4
وإرشادك الرجل في أرض الضلال لك صدقة*5
وبصرك للرجل الرديء البصر لك صدقة*5
وإفراغك من دلوك في دلو أخيك لك صدقة*5
و قيسي على ذلك كثير

خلي لسانك ينقط سكر: الكلمة الطيبة صدقة*4
لو و انت ماشية و لقيتي ازاز مكسر او قشرة موز شوطيها جنب الرصيف: وتميط الأذى عن الطريق صدقة*4
ابتسمي في وش الناس و خصوصاً الأهل: تبسمك في وجه أخيك صدقة*5

اعملي الخير : كل معروف صدقة*6
اعطفي على الحيوانات و العصافير: في كل ذات كبد رطبة أجر *7

في حاجات كتير صغيرة ممكن نعملها و ناخد بيها ثواب

سادس حاجه القرآن
ده بينقسم ل3 حاجات
1) قراءة
حددي لنفسك عدد معين من الصفحات تقرأيه كل يوم- حتى لو هنبدأ بصفحة واحدة – اي حاجه احسن من بلاش المهم يبقى لنا صلة بالقرآن كل يوم
2)تفسير
عندك تفسير ابن كثير و الطبري و الجلالين – بجد متعة انك تعرفي شويه من اسرار القرآن و كل التفاسير دي موجودة على النت
3)حفظ
الأحسن انك تحفظي مع حد- في مسجد او مع اصحابك او حتى مع اخواتك عشان تشجعوا بعض و يبقى في التزام

فضل قراءة و تعلم القرآن

سابع حاجه الذكر
الاذكار المتنوعة زي الخروج من البيت – ركوب المواصلات- دخول و خروج الحمام – بعد الاكل – اذكار الصباح و المساء هنلاقيها في كتاب صغير اسمه "حصن المسلم" بيتباع بنص جنيه قدام الجوامع و هتلاقيه على النت
ننقل منه الاذكار في ورق و نلونه و نعمله بطريقة ظريفة و نلزق كل ورقة في مكانها عشان نذكر ربنا في كل حاجه بنعملها – بره الحمام- على باب الشقة- جنب السرير الخ و هتلاقي نفسك بعد فترة حفظتيهم

عندك سبحان الله و بحمده سبحان الله العظيم : كلمتان خفيفتان على اللسان ، ثقيلتان في الميزان ، حبيبتان إلى الرحمن : سبحان الله وبحمده ، سبحان الله العظيم*8

سبحان الله و بحمده عدد خلقه و رضا نفسه و زنة عرشه و مداد كلماته :حديث: أن النبي صلى الله عليه وسلم خرج من عندها(جويرية بنت الحارث) بكرة حين صلى الصبح ، وهي في مسجدها . ثم رجع بعد أن أضحى ، وهي جالسة . فقال " ما زلت على الحال التي فارقتك عليها ؟ " قالت : نعم . قال النبي صلى الله عليه وسلم " لقد قلت بعدك أربع كلمات ، ثلاث مرات . لو وزنت بما قلت منذ اليوم لوزنتهن : سبحان الله وبحمده ، عدد خلقه ورضا نفسه وزنة عرشه ومداد كلماته *9

كل تسبيحة صدقة . وكل تحميدة صدقة . وكل تهليلة صدقة . وكل تكبيرة صدقة*10

ده غير الاستغفار

و الصلاة على النبي عليه الصلاة و السلام: من صلى علي صلاة صلى الله عليه بها عشرا*11
و الترديد ورا المؤذن عند كل صلاة

ذكر ربنا في اي وقت و في كل مكان
ماذا قال ربنا عن سيدنا يونس؟
فَلَوْلَا أَنَّهُ كَانَ مِنَ الْمُسَبِّحِين
لَلَبِثَ فِي بَطْنِهِ إِلَىٰ يَوْمِ يُبْعَثُونَ
الصافات143-144
فضل الذكر

ثامن حاجه النفس
و دي هتكلم فيها عن 3 حاجات
1) اللسان: بلاش زعيق – فرملي نفسك قبل ما تشتمي – فكري قبل ما تنطقي عشان ما تجرحيش حد – خلي لسانك ينقط سكر – بلاش غيبة و نميمة
ما تخليهوش سبب في دخولك النار
زي ما قال الرسول عليه الصلاة و السلام :وهل يكب الناس في النار على وجوههم ، أو على مناخرهم ، إلا حصائد ألسنتهم*12

2) الحسد و الحقد و النفسنة و محاسبة الاخرين و معاقبتهم بسبب ذنوبهم دي حاجات لازم نبطلها
لازم ننشغل بعيوبنا احنا و بس, نحاسب نفسنا و بس
مفيش ملايكة على الارض- كتير من الناس لما يلاقي حد بيعمل ذنب معين بيبتدي يعامله وحش و يبقى مش طايقه, ده على اساس ان حضرتك ملاك و ما بتعملش اي ذنوب؟

3) المظهر
حجابك متوفر فيه الشروط اللي ترضي ربنا و لا لأ؟
طرحتك مغطية منطقة الصدر؟
هدومك بتشف او تصف او تكشف؟
الميك اب اخباره ايه؟
حواجبك

انتِ الرقيبة على نفسك- و لو مترددة احسمي امرك بكلام الرسول عليه الصلاة و السلام
ثلاث من كن فيه وجد حلاوة الإيمان : أن يكون الله و رسوله أحب إليه مما سواهما…*13
ما ترك عبد شيئا لا يتركه إلا لله إلا عوضه الله منه ما هو خير له في دينه ودنياه*14

و في النهاية و بعد ما صدعتكم و دوشتكم برضه هنعمل ايه؟

هنجيب ورقة و نقسمها اتنين نص للحاجات الوحشة اللي عايزه تغيريها في نفسك و نص للطاعات اللي عايزه تعمليها
و كل ما تحققي حاجه من اللي مكتوبة تكافئي نفسك بحاجه بتحبيها

و زي ما قلنا في الاول اي طاعة بتعمليها احسن من بلاش- مش لازم اسبح 100 مرة و مش لازم اصلي النوافل كلها و لا اصوم كل الايام
عايزين نبدأ بحاجات بسيطة جداً بس نداوم عليها و مع الوقت هتحسي انك عايزه تزيدي في الطاعة
نبدأ مثلا بركعتين سنة في اليوم – و اختاري الوقت اللي تحبيه
نسبح 10 مرات بعد كل صلاة
نقول 3 بس من اذكار الصباح (و على فكرة هي هي اذكار المساء بس بتختلف في كلمة واحدة)
ممممم ايه تاني
مثلا نصوم الاثنين بس
زي ما تحبي بس تواظبي

و القسم الاسلامي هنا في المنتدى هتلاقي فيه تحفيظ و طلب علم و مجموعات تشجعك على الالتزام
و زي ما قلت لكم الموضوع ده مجرد افكار و اكيد كل فتوكة عندها افكار مختلفة
فشوفي اللي تقدري تعمليه اعمليه

معلش طولت عليكم

—————————————————————————————————————-

*1

الراوي: عائشة
المصدر: صحيح الجامع
الصفحة أو الرقم: 163
خلاصة حكم المحدث: صحيح

*2
لا تحقرن من المعروف شيئا ، ولو أن تلقى أخاك بوجه طلق

الراوي: أبو ذر الغفاري
المصدر: صحيح مسلم
الصفحة أو الرقم: 2626
خلاصة حكم المحدث: صحيح

*3

الراوي: أبو هريرة
المصدر: صحيح البخاري
الصفحة أو الرقم: 7405
خلاصة حكم المحدث: [صحيح]

*4
كل سلامى من الناس عليه صدقة كل يوم تطلع فيه الشمس .
قال : تعدل بين الاثنين صدقة
. وتعين الرجل في دابته فتحمله عليها أو ترفع له عليها متاعه ، صدقة .
قال : والكلمة الطيبة صدقة .
وكل خطوة تمشيها إلى الصلاة صدقة
وتميط الأذى عن الطريق صدقة

الراوي: أبو هريرة
المصدر: صحيح مسلم
الصفحة أو الرقم: 1009
خلاصة حكم المحدث: صحيح

*5