خلع اليد اليمنى بـالولاده

السـلام عليكم ,,

شلونكم ياالغاليات ؟

عـساكم بخير ان شاالله

بعيد الشر عنكم انا اعاني من اعاقه بسيطه وصعبه علي بنفس الوقت !

لما نولدت ولاده طبيعيه يقوم لكم الدكتور اثناء الولاده ويتلني من ايدي اليمين ويمصعني عشان يطلعني من بطن امي

حسبيـاالله ونعم الوكيل ,, مصاروه بعد شتقولون ؟

عالعموم ماودي احط اللوم على احد لانه قضاء الله وقدره لكن هم هوه كان لازم يآخذ حذره

كبرت على هذي الحال ايد قصيره وايد طويله وكنت مااقدر افردها ودايما جافستها على بطني

ومن نولدت لين صار عمري 5 سنين وانا اتعالج بالعلاج الطبيعي والحمدلله تقوى العصب

والحمدلله قمت اقدر انزلها لكني لماكنت اصغر من الحين لماانسى واسهى ارد اجفسها واحطها على بطني والي حولي ويدرون بحالتي ينبهوني

لكني مااقدر ارفعها وايد لحد معين بس

ومااقدر آكل فيها ولا اسوي اي شي الا اذا كان بسيط

وشكلها اقصر ومقوسه عن ايدي اليسار الي هيه طبيعيه

وجتفي اليمين منخفس اكثر من اليسـار

وطبعا ابوي عارض اني اكمل العلاج الطبيعي كان يـائس جدا قال للوالده بس يبا خليها والله يعيناويعنيها هذي كتبه الله لها

مع العلم انه الوالده ردت راكضت فيني لما صار عمري 11 ولما شافتني الدكتوره الانجليزيه قالت لي ليش قطعتي فتره

العلاج كان من الممكن انه ايدج تصير طبيعيه وتتحسن اكثر من جذي دام انج كنتي توج وعظمج لين

لكن الشكـوه لله ,, شبيدي اسوي ؟

سكـت ولا قلت لها ابوي عصب ورفض بشده وهوه السبب وحنته على امي والهوشه

وكلما سألت اهلي هل في علاج بالعمليه قالوا لأ ماكو

وانا مااحب اتكلم بهالموضوع مع والديني لاني احس بالضعف وهمه تعودوا علي باسي قوي ومايهزني شي

ودمعتي ماتنزل بسهوله وغاليه ,, لكن هالموضوع نقطه الضعف فأكره اني اكلمهم فيه وعيني تغووورق

فماحبيت اغير هالفكره بعد ما كبرت وخلاص يعني بطلع من جيسهم ومن كفنهم

وبالذات ماماتي الي فاهمه حالتي ومقدرتها لاوبعد ياعوينتي دايما تخفف عني وتواسيني تقولي انسى انه ايدج فيها شي

لانه مايبين ,, وين مايبين وانا لماافردها واشد عليها شد شكلها مقوس ومنحي هم ! فديتها والله لما ترفع معنوياتي

ومره حطوا عالتي في وحده كوافيره تسوي تساريح وتعاني من نفس حالتي وقالت لي كاهي المره ماضرها تسوي تساريح

وترفع ايدها على قد ماتقدر

والله وبالله لو اتم اشرح لكم معاناتي محد راح يسمع نداي ويحس بألمي الا الي يعاني من اعاقتي

ساعتها بس راح يعرف جيمتها ويثمنها ,, إلي ايده بالنار غير عن الي ايده بالثـلج

وانا توني بنوته صغيره وابي اعيش حياتي حالي حال اي انسانه طبيعيه بهالكون

وطبعا تصيرلي مواقف وايد تحرجني

لاني آكل بيدي اليسار دايما يقولون لي اكلي باليمين واستحي ولا اقول لهم شنو السبب خوفا من اني اطيح من عينهم ويستصغروني ويعطوف على حالي ويشفقون

لكني من داخل احس بشي يصرخ يقول شذنبي انا انظلم ؟

وهالشـي راح يأثر على مستقبلي حلمي ومنى عيني اني اصير دكتوره جراحه

ياترى شلون بيقبلوني كليه الطب او حتى ان قبلوني انا شلون برضى اشتغل بإيد وربع شلون بمسك المشرط وبشقق واخيط واسوي العميله !

واذا ياني نصيبي ,, شلون يرضى فيني اي ريال جذي ؟! حتى وان رضى مابي اظلمه معاي

انا ماراح ارضاها لنفسي باجر ان عيلت شلون بغسل حق عيالي واوكلهم وانجز لهم كل احتياجاتهم

الام تشتغل بإيدها وريلها وتربي وعساها تلحق تربيهم وتكبرهم ,, وانا خلوني على كتر

عسى ربي يشـافي ايديتي ويوفجني لما يحبه ويرضاه

وانا بإيد وحده والثانيه شغاله عالربع بس

تصدقوووون حتى لما احف بالشيره ايدي هذي تقززني لدرجه مو طبيعيه تقولين ابر مقججه فيها !لااله الا الله

ودايما احس بإيدي انها ثجيله وهذا نصيبي بدنيتي

والحمدلله على كل حال وقدر الله وماشاء فعل

قبل جم يوم كان عند ماماتي موعد بمستشفى البابطين للحروق والتجميل وقالت حق الدكتور عني وقالها ييبها خن اشوفها واقيم حالتها

واتمنى من كل الي تقدر تفيدني بخوص هالاعاقه ماتقصر معاي

وربي بتم ادعي لها طول عمري و لا راح انسى فضلها علي

عسى ربي يوفجها ويسمح دروبها ويحقق لها كل الي ببالها ويسيركل امورها عليها ويفج عوقها ويهدي لها كل من تحب

السموحه عالطواله ,. لكني حبيت اطرح مشكلتي الشايكه عليكم ياخواتي ولعل وعسى افيدكم وتفيدوني

ولتعــم الفايده