ربي أعلم بالحال و أبي دعواتكم لي , الله يرزقني الضنا بهالأيام المباركه , محتاجتكم

السلام عليكم خواتي

عيدكم مبارك مقدما

أبعرفكم ابنفسي انا متزوجه من 4 سنوات و توني حللت شهر 3

و لله الحمد و هو الحكيم الخبير

النتايج طلعت انا عندي سن يأس مبكر و قالولي قدرتج ع الأنجاب محدوده من سنه لي سنتين بالكثير و طبعا انا ما اصدق كلامهم لأنه هالشيء بيد رب العالمين وحده

و زوجي طلع عنده ضعف شديد الحركه 0% و التشوهات 100% بس العدد الحمدلله زوين

وانا وزوجي كبر بعض اعمارنا 28

و قررت اسوي عملية حقن من شهر 5 و أنا أجلها من الخوف والتوتر و الخوف من فشل العمليه نفسيتي ما يعلم فيها الا علام الغيوب

كل يوم افتر بشقتي اتخيل انه في يهال الاحقهم و اذا طلعت السوق بس اتنح صوب ملابس اليهال و قلبي يتقطع و كل ما شفت حامل دعيت ربي يتمم عليها و تفرح بضناها و اوصيها على الياهل بعد الولاده لأني محرومه و دايم افكر اذا يبت شلون ابهتم بضناي و ابطلع من الشغل و ابجابله و الحريم عبالهم ابحسدهم لا حشى والله عمري ما حسدت الحمدلله راضيه بقسمة ربي و دايم أدعي ياربي لا تجعلني ممن يمد عينيه على ما متعة به أزواجا غيري

بس بالفتره الأخيره صرت أحس حياتي مع زوجي بارده و ناقصها شيء اهوا ما يتكلم بس مرات يقط قطات على ضحك يقول عن نفسه توه صغير يقول اعالج بعدين و اتزوج وحده تيبلنا عيال اهوا يقولها على ضحك بس انا اتم مغروزه ابقلبي

والله قبل شهرين يا بنات تأخرت الدوره عبالي اني حامل و كلمت دكتوره جزاها الله كل خير و الله يرزقها من حيث ما تحتسب قالتلي يمكن حامل كل شيئ جايز رحمت ربج كبيره و عشت الدوره و رحت عند أهلي قعدت عشان اريح جان تنزل و قعدت بالصاله عادي و ساكته بس امبين بعيوني شي و الا تطلع دعاية بامبرز بالتلفزيون جان دموعي تصب و الا اخوي قاعد و يطالعني و مستحي يكلمني و انا اصد تو ابقوم جان ابوي يدخل و يقول اشفيج بنتي جن ألمه و أقعد ابجي بجي و اهوا عرف بدون لا أتكلم و قام يدعي لي

أنا أسفه طولت عليكم بس لأنه ما عندي أحد افضفضله عندي أخت وحده و مسافره بامريكا ولاهيه مع ريالها و عيالها و دراستها و أحس اني فاقدتها حيل و انتوا خواتي بالأسلام و هذس أعظم أخوه

أبيكم تدعوا لي بالذريه الصالحه و العمليه تنجح من أول مره و صحتي تكون زينه و اصير أم

عسى ربي يرزقكم ضعف دعواتكم

و أسفه عالإطاله