رحلة ريلاكس مو طبيعيه . في الاراضي الماليزية

السلام بنات ..

شلونكم؟؟؟ انا للحين بكوالالمبور وراجعه الديره نهاية هالاسبوع فقلت دام اني فاضية ليش ما انزل لكم تقريري من الحين؟؟

مستعدين؟؟ يالله بسم الله نبتدي ..

اول شي باذكر ملاحظة مهمه حيل هالسفره مو سفرة سياحيه اهي سفرة عمل خاصه بزوجي وانا مرافقته فيها لمدة اسبوعين فالتخطيط للرحلة مو تخطيط سياحي وترفيهي ..

الشغلة الثانية انطباعاتي الشخصية عن الديرة ورايي فيها مجرد رايي شخصي ما يحتاج مؤيد او معارض وثقوا اني ماراح اسوي مثل غيري واقارن البلد هذي بدل اوروبا او امريكا لان فيها ظلم لها لكن يكفي اقارنها بالدول اللي بمستواها..

بس حبيت اوضح هالتقطتين قبل لا ابتدي بالتقرير..

ماليزيا سمعت عنها وايد ناس امدحتها وناس ذمتها وناس مستغربه على كثر اسفاري مارحتلها وناس انصحوني فيها بس ماكنت متشوقه لها مادري ليش مو عن انا ما احب دول شرق اسيا بالعكس انا رحت تايلند ومناطقها واستمتعت فيها بس ماليزيا مادري ليش مو متقبلتها ..

وباول فرصه احصلتلي "كورس ريلي" حبيت اروح وياه واشوف هالديره واحكم عليها بنفسي … بالدبدايه سويت سيرجز وسألت اسئله عنها وتابعت تقارير البنات لها وجمعت معلومات كافيه عنها ..

ويينا ليوم السفر ..

سكرت جناطنا..

وزهبت جنطة الطياره "الهاند باغ" واللاب توب ..

وجيكت على الجوازات والتذاكر..

وهم على حجز الفنادق والطيران الداخلي ..

وزهبت شوية "snack" للطياره وخرابيط ..

ويبت معاي روايه لكاتبتي المفضله اغاثا كرستي ما استغني عن كتبها وهالقصه كنت توني باديه اقراها فقلت اخذها اكملها اهناك .. بس ريلي يوم قرا "عنوانها" جان يخزني ويقول .. "فالج ماقبلناه" لوووووووول

عقب مالبسنا وخلصنا يت اللحظة الصعبه … حبيت اعيالي ولميتهم ووصيتهم يصيرون عاجلين وما يأذون اهلهم واهم يبجون يبون اييون وياي .. كلمت الكبيره واقتنعت والصغيره نقولي ابي اتافر اميتاااااااا لووول قلتلها مو رايحه امريكا باروح ماليزيا واذا رديت وديتج امريكا جان تبجي وتقول لالالالالالالالالالالا مابي ابي اسافر .. عاد ساعه على ما ساحلتها واسكتت ورحت وانا استودعهم الله اللذي لا تضيع ودائعه..

ورحنا المطار طبعا ماكنت بمود التصوير فماصورت اي شي من مطار الكويت وعقب ما وصلنا مطار كوالالمبور حمدت ربي اني ماصورت مطارنا

بصراحة بهالرحلة تعرضنا لصدمات وايد .. اول شي الحجز على الكويتيه "كان اجباري" لان الوزارة دافعه لريلي كرسي عليها فحجزنا فيها وللاسف بعد 6 اسنين ماركبت فيها الكويتيه لازال الوضع كما هو عليه ..

بالمطار كان جدامنا كله اهنود فشافونا الموظفين كويتيين ونادونا والا الموظفه تقولنا وين الفيزا؟؟!!!!!!!! اي فيزا؟؟ اتقول امبلا لازم فيزا قلنالها احنا سائلين قالولنا مافي فيزا قالت مو بتروحون الهند؟؟ لازم فيزا؟؟ اي شي الحين التذاكر صارلها ساعه اطقطق فيهم واخر شي تقول رايحين الهند؟؟ ماتشوف جدامها ماليزيااااااااا!!!

المهم تأسفت واقعدت تضحك اتقول ان الهنود فروا راسها .. وصيناها تحطنا بمكان زين قالتلنا لا تحاتون حطيتكم باماكن ممتازه .. استانسناااااااا..

الصدمة الثانيه اطلعت طيارتنا ترانزيت في كوالالمبور وبتروح تالي جاكرتا يعني متروسه خدم من اندونيسيا قلنا مو مشكله اكيد ضبطت اماكنا ..

نادوا على رحلتنا وركبنا الطياره والا الصدمه!!!!!!!!!!!!!!

انا بصوب وريلي بصووووووووووووب … كلمنا المضيف وقال مو مشكله نسأل الراكب اللي يمج يبدل مع ريلج والا تطلع وحده ورضت تبدل .. اطل من الدريشه والا الاخت حاطتنا فوق الجناح مال الطياره بالضبط لووول هذي لو مو موصيتها تحطنا باماكن زينه جان وايد احسن ..

المهم بعد تأخير ساعه طارت الطياره .. بس استغربت شي قبل الكويتيه تشغل دعاء الركوب وهالمره ماحطوه مادري ليش؟؟ المهم وزعوا علينا تالي اوراق نعبيها للجمارك اهناك ..

عبيناهم ..

وتالي نمت يمكن 6 ساعات لووول صج تكسرت بس كنت تعبانه وسمتها نومه ..

وهذا خط سير الرحلة ..

يتبع…