ساعدوني حزينه حدي والسبه رجلي

السلام عليكم ورحمه الله وبركاته……..
شلونكم حبايبى ان شاء الله بخير ……..
يا عمرى عادى اذا ريلج قالج جذييييه………..سكتى لا تحنين عليه يمكن اهو مو من اللى يطلع بس عشانج وتوج عروس طلعتوا وفرفرتوا ……….زين مو اللى كاشت من الاول………..

المهم مثل ما قلت لج ….. لاتحنين عليه ….صبرى نفسج..باى شى فى البيت…بزواره بيت اهلج ….خواتج ….اهله…خواته ……نطرى فترة وردى قوليله على الطلعه يمكن يكون تغير ….واذا بعد ……..انتى بادرى قولى انج عازمته ….سمعتى عن مطعم تبين تجربينه معاه …….سمعتى عن اكله فى مطعم حاولى معاه ان ودج تذوقينها……
مع الوقت اهو راح يقول من زمان ما طلعنا خل نطلع……

حاولى تذكرينه…باول مطعم عزمج فيه…….اول مكان تعرفتوا على بعض فيه …
صدقينى راح يرد……. لو ماكان نفس اول على الاقل يتغير للاحسن …..وبعد انتى لا تقصرين فيه من جميع النواحى……..
انا وريلى للحين نروح المطعم اللى عزمنى فى اول مره …..قبل عشرين سنه…ونفس الفرع مع انه له فروع وايد بس هالفرع لنا فيه ذكريات ……..صج انه هدموه وسوا غيره ..بس ما ادرى ليش اعزه……..اللى اهو مطعم قيصر السالميه…

بالتوفيق للجميع ان شاء الله ……….

كا ماشاء الله عليها شهد ستايل كفت و وفت

صح انا ريلي دايما يقولي لا تحنين لين زهقته و الله
ديري بالج

اذا ريلج مو امقصر معاج ابشي صبري عليه شوي ، عامليه باحترام ، بس من يفكر يطلعج عطيه من الحب والاحترام دبل واضعاف مضاعفه ، عشان يحس بالفرق ، وانج تتغير نفسيتج واتكونين اكثر عطاء اذا طلعج وونسج ، اذا شفتيه يفضل القعده في البيت عن الطلعه ، ناقشيه في هالموضوع اذا صدره وسيع للنقاش بس لا اتحنين على الموضوع اطرحيه مره وحده ، قوليله ان انتوا ابحاجه انكم اتغيرون جو ، لان سبحان الله النفس ابحاجه للترويح وللتغيير ، وهالشي يساعد على تجديد حياتكم نحو الأفضل .
سبحان الله ، الريال ما يسمع للمرأه الحنانه وان شاءالله ما تكونين من هالحريم ، حاولي تتمالكين نفسج واتميلين للهدوء ، عشان اتخلين الريال يتسائل ، حاولي اتلهين نفسج بالقراءه ، ترا من تتولعين في القراءه راح تنسين الوقت ، حاولي اتكونين لج شخصيه مستقله عن زوجج ، ما اتخلينه اهوا بس محور حياتج عشان ما يملج ولا اتضيعين من بعده . خلاصة الحجي الريال ما اتيينه الا بالطريقة غير المباشره .
اذا يوافق تطلعين مع صديقاتج او أهلج طلعي وياهم .
حاولي توصلين معاه لاتفاق الى انه يطلعج يوم بالاسبوع ، لا اتقارنينه بأحد ثاني خصوصا جدامه ، ترا تقلبين الموضوع للآسوأ، فهميه هالموضوع بعقلانيه وانكم فعلا ابحاجه لهالنوع من الطلعات. وهونيله السأله وانها ما تتعدى يوم واحد فقط بالاسبوع بمقابل ايام كثيره له .
ترا الرجل ذكي حافظ ردود افعالج و امبرمج نفسه على شخصيتج ، لكن اذا غيرتي اشوي من ردود افعالج راح تلفتين نظره ، وراح يرجع يحاول يكسب ودج من جديد لانج رجعتي تشغلينه من اول ويديد .
خلي طلعاتج اقتصاديه ، يعني مافيها صرف وايد لان الريال مهما كان غني ما يحب الصرف وايد ، فحتي لو قعدتوا عالبحر وكليتوا سندويتشات شورما و بيبسي بتكون طلعه احلى من العسل على القلب اذا كان فيها حب وتفاهم. وهالشي راح يسعده اكثر من السوق والصرف
لان فيه حريم يموتون على السوق ويريرون رياييلهم للسوق لين يمل الريال من الطلعه ووده يشق اهدومه .

فاذا رحتي سينما لا اتعرين صوب المحلات ، خلي روحتج للسينما فقط و بعدها مثلا مطعم ،بس مو محل تزرعين ريلج لين يكره الطلعه ، يعني نوعي في طلعاتج ، طلعوا مثلا روحوا مثل هالايام البر ، وتمشي وياه ، ركبي بانشي وياه ، طرحي هالفكره عليه ، او روحوا تمشوا لبسوا تريننج وتمشوا في مكان حلو الصبح او العصر . بعدين ردوا البيت تغدوا .
احيانا القصور اهوا في طريقة عرض الفكره مو في استلامها :
يعني خليج مرحه ولا تكونين حساسه اذا رفض طلبج لانه اذا رفض مره ومرتين دايما ابتسمي عشان بعدين يستحي يرفض ، وبدام اهوا عندج تأكدي انه يحب يقعد معاج ، واذا تبين تطلعين كوني مرحه وعرضي الفكره عليه ابمرح وسعاده وجنج تشوفين الطلعه جدام اعيونج وواثقه ، يعني قوليله : واي فلان الجو حلو طلبتك لا اتردني ما يرد الكريم الا اللئيم ، وانت الكريم اللي ما اتردلي طلب ان شاءالله ، خنروح نتمشى الجو اينن خل نتفس اوكسجين حابسين روحنا بين اربع اطوف والله هذا اللي اييب المرض ، خل نتنشط وانروح نتمشى عالبحر ، انا وياك وكاني امزهبتلج التريينج والجوتي وحتى الدلاق .
واذا تبين اتروحين سينما ، قوليله قبل ابفتره عشان ما تفرضين عليه فلم معين ، قوليله ، يا فلان مشتهيه طلعة سينما ، وانت اختار الفلم الي تبيه ،بس ودي اروح معاك سينما وانغير جو وناكل بوب كورن ، او قوليله يا فلان ميخالف انروح سينما اليوم اذا قالج اوكيه حجزي من الكي نت عشان اتحطينه جدام الامر الواقع .
واذا ودج اتروحين مطعم شوقيه ابوجباته ، مثلا قوليله في مطعم يمدحونه الستيك عندهم مو طبيعي خيال ، وخليه يسعبل على هالمطعم لين باذن الله يوديج .
المهم خلي طلعاتج معاه سعيده مافيها حنه ومافيها الا السوالف الحلوه الخفيفه عشان ما اتكرهينه بالطلعه ، فأحيانا الزوجات يستغلون الطلعه بالنقاشات الحاده ، وانا ما اتفق وياهم ، انا مع الطلعات اللي يكون من شأنها تخفيف التوتر وتعزيز العاطفه ، والابتعاد عن المشاكل بقدر الامكان وقضاء وقت ممتع.
المهم افكار سريعه بس اهم شي طريقة العرض اتكون حلوه وفيها مرح وشوية ذكاء ودلع ، وابتعدي عن الحنه والرنه لانها عدو الرجل الأول ، ولا تزعلين واتمدين البوز اذا رفضلج طلب بل كوني مبتسمه وسعيده واذا استجاب لك كوني ضاحكه واكثر سعاده ، وشكرا

ههههههههههههههههه انا زوجي وقت اللي يكون مفلس يقوول ودي اطلعج ووقت الرواتب يتميرض او يطلع مليون عذر وعذر على هالحال تعوودت الين طحت بروحات وجيات مع رفيجتي تونس اكثر منه