سمعوا السالفه وقولولي اللي سويته صح ولا غلط ؟؟؟

انا مو ام بس تربيه خواتي واخوي اكثرها علي يعني خبره

اول شي تعوذي من ابليس وذكري الله والف حمدلله انه ماضاع ولقيتوه هذا اهم شي

احس انه جسيتو عليه شوي اهو ياهل مايعرف انه هذا غلط المفروض تعصبين عليه وتزعلين وتفهمينه انه هذا غلط مايصير يهدكم لازم يستاذن ويعلمج اهو وين بيروح عشان ماتخافين عليه
وفي شي ايجابي انه اسم الله عليه مايخاف شخصيته قويه

لاتهدينه بالغرفه بروحه وتخلين هالشي ياثر علة نفسيته وهذا صغير يمالج من هالمواقف والله يخليهم ويحفظهم لج

واي يمه
اكبر رعب بالنسبه لي
يضيع احد من عيالي
او يكون ورا السياره وانا مادري وارد قري هذا اكثر رعب
كل ماركب السياره اعد
ولازم كلنفر يرد علي
واجيك علي عيال خواتي وينكم منو طالع؟ يودو عيالكم
متعقده حددددددددددددددددددددي من منظر بطفولتي ولد عمتي جلب بسياره امه واهي ماتدري عندها وداست واهو ظل مجلب بسيارتها اشواا ن مو قري جان عينته داست جدام واهو مجلب بالسياره ورا سحبته وراها بس الحمدالله اصابات بسيطه موشي جايد

المهم نرجع محور حديثنا
انتي عاقبتيه من حرتج
الطق جدام الناس لو شنو الياهل مسوي مرفوض مانصحج فيه كلش تدمرين شخصيته وتالي بعدين ماياثر فيه شي من ناحيه عقاب يعني حتا لو بيخرب جدام احد ماهمه انكسر حاجز فشله من الناس لازم تتفقين وياه علي اسلوب تعامل بره يعني مثلا انا متفقه مع عيالي تفشليني بره افشلج تبجين وتصرخين وتنسدحين بالارض ادوسج بالعربانه وامشي عنج او اصرخ عليج مثل كل ماتصرخين وكل الناس بتعرف انج مومؤدبه وشيطانه وماتطيعين امج

بالبيت العقاب تايم اوت
بس مو بغرفه النوم او علي الاقل مو السرير لان السرير مكان النوم والنوم مو عقاب بتخلينه بداره بليها بشي يتسدج يتبطح يبجي يطالع السقف يقلب العاب مافاد !
عندنا كرسي النوتي جير يقعدون عليه بمكان مافي شي يلهيهم ويسليهم مثلا تلفزيون او شي
اقعدها ظهرها لحوض السمج تطالع سيدا ممنوع ترد علي احد وتنفرد وماتتحجا اوتعلق علي شي ومو من حقها انها تعترض لانها غلطانه ولي خلص عقابها (لازم مده محدده علي مستوا الغلط) تيي تبوس راسها تقولي انا اسفه انا غلطانه (ققبل لاتتعاقب اشرحلها شنو الغلط اللي اهي سوته بالضبط اقولها فلانه انتي الحين عندج تايم اوت لانج غلطتي ورفعتي صوتج – ناجرتي اختج – ماحترمتي اني قاعده وسويتي شي غلط – اذيتي الخدم …..) عقابج تايم اوت مده فلانيه يالله روحي قعدي بدون ولاكلمه ولا ابي اسمح تحلطم ازيد الوقت
تقعد تنثبر واهي شاطره ماتتحجا
ماطاعات مامشا العقاب
اقولها روحي نقي لعبه تحبينها هاتيها ماكو هاللعبه اسبوع كامل (عندي وحده من البنات هوايتها الهدوم تموت علي المنفش واميرات اقوم اخذ لبس البرنسس مالها او لعبتها براتز او كفرها او شي مال برنسس تاكل بعمرها من الحره) اقولها انتي حريتني وسويتي غلط لازم مقابله تتعاقبين
والتزم بكلمتي
ولانكسر كلمتنا يعني اتفق مع ريلي حتا لو تادبو مانكسر الكلمه ولايناجرني علي عقابهم ولا اناجره علي عقاب اللي استخدمه المناقشات بينا وبين بعض

غير عندنا جدول معلق بالصاله مسوينه لليهال
هابي فيس
ساد فيس
مقسم علي ايام الاسبوع
واساميهم
كل اسبوع لازم مايبون ثلاث ساد فيسات اذا يابو ثلاث ساد فيسات معناتها ماكو طلعه الاسبوع ويا ابوهم فتلقينهم يموتون خرعه ان هددتهم بالساد فيس ينهار العالم عفيه ماتحطين ساد فيس واذا سوو شي وخذو ساد فيس ويييييييييييه تلقينهم يوم كامل مكتئبين ويبجون والعوده تستحي عفيه لاتعلمين خالاتي اني خذيت ساد فيس واذا احد بيي خشي الجدول لاحد يدري اني كنت نوتي
وحيل حيل حيل فايدني هالجدول مو شويه كفايه اقولهم ترا ساد فيس ترا والله ساد فيس
سيدا تطيع هالسستم تعلمته من المدرسه + استشاريه تعامل مع الاطفال

والحمدالله مرتاحه
ما أأيد الطق كلللللللللللللللللللش وان مت مت حره وييت اطق امسك الايد واهز بنتي شويه مو وايد
او اطقها علي ايدها او قرصه ايد وهذي ولله الحمد من يبت بناتي ماستخدمتها الا مرتين يمكن مو اكثر أؤمن ان الطق اخر حل لان الطق عقب فتره يصير مايأثر كثر الحرمان من شي يحبونه ، والعقاب يكون تاديب والطق مع الفتره يموت القلب ويصير انتقام جسدي اكثر من ماهو تاديبي

ذكرتينى ببنتى ضيعتها بلبنان صرت مجنونه فجاه واحنا نتمشى انا وابوها وخواتها اختفت شلون مادرى كل الى اتذكره كنا نمشى ودخلنا بزحمه السووق
كان متروس كويتين ماشاء الله جنه زحمة العيد فجاه اختف
ابوهاا راح يركض بصوب وانا بصوب ندورها اخر شى لقيناها ماسكها الشرطى وتبجى بجى بعد عمرى
واحنا معاها نبجى تقول عبالى انتو قعدتوو بكراسى المطعم لانه كله لما ننزل نقعد هناك رايحه هناك
صج هالمواقف صعبه حيييييييل

بس يالفنانه جان ما طقيتيه ترى صغير ما يفهم ياحياتي
الله يخليهم لنا يارب ويصلحهم

البنات كفوا و وفوا
و الحمدلله على سلامته
و احسن عقاب انج تحرمينه من شئ اهو يحبه او تقعدينه في زاويه و ما يكلم احد لمدة 3 دقاايق يعني على العمر فاهمتنى؟

و كل ما تحرك و الا تكلم تردينه مكانه و هم تعيدين ال3 دقايق

و الطق ادري من الحره طقيتوه بس حرام هذا صغير على الطق و مو حلوه جدام الناس

و ربي يخلي لج عياالج ان شاء الله و يحفظهم

وااااو الله يعينج الصراحه عوار قلب ان ولدج تفقدينه لو دقيقه

ياعمري هو موبسن تقولين يتعمد هالحركه

حرااااام جان انتي تديرين بالج

انا ولدي بعمر ولدج ضبط

والله ماافلته ولا ثانيه ايده بايدي ….. اخاف عليه من نسمه هوا

مادري عقابج صح ولا لأ بس كل ام لها طريقه تعامل عيالها

والله يخليهم لج يارب

وااااي ذكرتيني باللي صار حق بنتي بحديقه الحيوان ضاعت مني

ماتشوفينا اشلون نركض بالاخير لقيناها تبجي واااااااي لميتها لم

المهم مالومكم بصراحه لان يعور القلب بس تفكرين انه يضيع

والبنات ماقصروا

وانا سمعت شغله من اختي ان كل طفل عاقبيه على عمره

يعني اللي عمره 3 سنين حده 3 دقايق عقاب

واللي 5 سنين عقابه يكون 5 دقايق

اسم الله عليهم الله يحفظ عيالج وعيال المسلمين اجمعين