شاورما اللحم نفس المطاعم و اطيب

المكونات:

1 كيلو لحمة ستيك
بهارات مشكلة
خل
ملح
زيت زيتون
طحينية
لبن
ليمون
بصل
بندورة
وبقدونس
خبز شراك

الطريقة:

1) بتجيبي اللحمة وبتحطيها وبتبليها بالخل والبهارات والملح أول شي بتحطي عليه الخل وبعدين بتمسكي كل قطعة وبترشي عليها ملح رش لا تكتري وبتبهريها كلها وبتخلطيها مع بعض منيح وبتحطي عليها كاسة زيت زيتون صغيرة وبتخلطيهم وبتتركيها منقوعة ومسكر عليها شي ساعتين

2) بتحطيها بصينية وبتضيفيلها كاسة مي كبيرة وبتغلفيها بالقصدير على نار متوسطة بالفرن (أو أقل بشوي) وبنتركها ساعة أو لتستوي اللحمة وازا استوي مو خالصة ميتها نشفيها من المي

3) بتجيبي اللحمة وبتقطعيها قطع صغيرة أو شرائح بالطول وبعدين بطبقة التحمير يلي بالفرن بتقلبيها شوي من دون ما تنشفيها وتخليها يابسة وبتطلعيها من الفرن

4) خلال واللحمة بالفرن بتجهزي الحشوة وهي (كاسة طحينية صغيرة وكاسة لبن صغيرة ورشة ملح وعصير ليمونة) وبتخلطيهم منيح

5) بتفرمي بصل جوانح وبندورة جوانح وممكن تذبليهم شوي بالمايكرويف أو بالفرن و بتفرمي بقدونس مفروم ناعم وممكن تضيفي مخلل خيار لو حبيتي كمان طيب

6) بتجيبي خبز الشراك وبتفرديها بصينية وبتحطي فيها خلطة الطحينية وبعدين اللحمة وبعدين بصل وبندورة وبقدوس متل الصورة وبعدين بتثني الأطراف من تحت وبتلفيها وبتقطعيها لنصين