شلون تخططين للسفر.؟ ابتداء" من الميزانية الى حقيبة السفر؟

اممممم ابدي بنفسي …

ج1: طبعا اذا حاطه فبالي اسافر في الصيف ..الميزانية ازهبها من شهر واحد تقريبا"..والله يخلي قطيات الدوام يعني ادخل جمعية بألف واخذها دايما على شهر خمسه او سته واحيانا سبعه ..بالاضافه الى زوجي العزيز اهو يتحمل مصاريف التذاكر والاقامة ..وانا فلوسي طبعا لي بروحي ههههههه لا اتغشمر انا وياه شي واحد

ج2:بالنسبة لملابس السفر انا ماحب اشتري قبله السفر واحب اوفر فلوسي للسفر ..حتى لو البلد اللي بروح له الجو فيه بارد اطلع ملابسي الشتوية انا وعيالي اذا كانت قدهم بالصيف ..واهم شي عندي تغيير الجووووو ..هالصيف افكر اسافر ويا عيالي مع انهم صغااار وانشالله مايأذوني ..

ج3: بالنسبة لحجز التذاكر احنا على حسب العروض بس احس موكلها ميه ميه يروح زوجي يفتر عالمكاتب ويشوف احسن عرض للدولة اللي نبيها طبعا مع الاقامه ..

ج4: بالنسبة للخدامه طبعا ولا مرة خذيتها فياريت تفيدوني خواتي اذا بفيز لها قبل جم يوم من السفر ؟

ج5: لما ازهب الجناط اول شي افكر فيه طبعا القرآن وكتيب حصن المسلم ..وبعدين ملابسي واغلبها بناطيل وجنزات وبجايم وعباتين ابدل فيهم مع الملافع.. ..وطبعا مانسى قمصان النوم (شي مهم بالسفر ) من غير العطور والشامبوات ..والادوية طبعا"..وبالنسبة لعيالي البدل والبجايم وافضل اخذ لبنتي جنز وجم بلوزة وفساتين عمليه ..وولدي جم بلوزة مع جم جنز وبنطلون..مايهمني الكشخه اهم شي يستانسون..

ج6:طبعا اول شي نتسبح ونريح واذا كنا واصلين بالنهار ماحب اضيع اليوم نروح نتمشى ونبدي بالاماكن السياحية والمطاعم طبعا"واخر يومين بالسفر السوق..

ج7:انا ودي نأجر سيارة بس والله غاليين حيل التكاسي احس ارخص ..

ج8: انا قبل سافرت وماخليت احد ماشريت له بس الحين بس حاطه فبالي اهلي وخالتي وعمي وبس..واحب اخذ جم شغلة لي ولعيالي خاصه بنتي اذا لقيتلها فساتين وبدل حلوة ..

ج9: بصراااحه السفر شي جميل خاصه لما اكون مصورة للذكرى واحلى شي فيديو ..وطبعا ماوري الا اهلي واهل زوجي وبس ..

اب اب يعني

اب

مشكورة اختي ام حيدر

اول سؤال : اذا حددتي البلد اللي بتسافرين له انشالله عربي ولا اوروبي..ودخلج انتي وزوجج محدود ..او ماشالله راهي ..هل الميزانية اتوفرينها وقت السفرة ولا قبلها بفترة .؟

للاسف مانوفر لانه اجازاته مفاجأه ويادوب موفرين قبل شهرين بس
ثاني سؤال : ليلحين في الميزانية ..انا اعرف ناس يشترون ملابس للسفر قبل لايسافرون..انتوا تشترونها قبل السفر ولا تشترونها من البلد اللي اتسافرون له ..؟ ولا انتوا من النوع اللي يحب يوفر كل فلس عشان يغير جو وبس ومايفكر يشتري؟

أشتري ملابس قليلة ونحنا من الناس الي يسافر يغير جو بس ومانفكر وايد في المشترى ولا يهمنا
ثالث سؤال : هم ليلحين في الميزانية ..نجي لحجز التذاكر ..عندكم مكتب معين تحجزون منه دايما ولا على حسب العروض اللي بالجرايد والمجلات..؟

التذاكر من مكتب معين والباقي على حسب الدولة
السؤال الرابع : بالنسبة للخدامة ..اذا خذيتوها معاكم ؟…قبل السفر بجم فترة اتفيزون لها ؟

ماناخذ خدامات ويانا ناقصينهم بعد في سفراتنا يكفي ويانا في البيت الوحده ترتب امورها هي وريلها ويا عيالها وكل شي بيكون تمام
السؤال الخامس : حجزتوا التذاكر وقرب موعد السفر ..يالله بتزهبون الجناط واول شي نبدي فيه جناط عيالكم ؟..شنو اللبس اللي تحطونه؟…وبعدين جناطكم انتوا هم شنو لبسكم والاشياء المهمه اللي تحطونها بالجنطة؟

اول شي شنطة العيال وعقب أنا وعقب ريلي خخخخخ كل شي مهم خاصه الحلاوة لنزع الشعر وكل أدوات الحلاقة والسشوار

السؤال السادس : توكلتوا على الله ورحتوا المطار ..ووصلتوا بخير وسلامه للبلد اللي تبون..طبعا" اول ماتوصلون الفندق بترتاحون وبعدها …شلون اتقسمون ايام السفر ..؟ يعني تروحون الاسواق اول ولا الاماكن السياحية والمطاعم؟

على حسب أحيانا بس نيلس في الفندق وتمشى عداله ونتعشى في المطاعم الي عداله و احيانا بس نخليها رقاد لليوم الثاني وهذا أفضل بالنسبالي

السؤال السابع : انتوا من النوع اللي تاجرون سيارة ولا على التكاسي ؟

تكاسي مانتحمل سيايير حد

السؤال الثامن : اذا تسوقتوا هناك ..بتشترون هدايا ولا لأ ولا بس اهم الاشخاص ؟..وبالنسبة لكم انتوا شنو الاشياء اللي تحبون تشترونها لكم ولعيالكم؟

قبل كنت أشتري للكل بس الحين للناس القريبين مني والمهمين بس

السؤال التاسع والاخير .: رديتوا لاحلى ديرة ….ابيكم تقولون لي شنو أثر السفر في انفسكم ..واذا كنتوا مصورين اتحبون اتورون صوركم لكل لاحد ولا ناس معينه من الاهل ؟

ومن ارد البلاد أحس اني منتعشة وحاسه بالمتعة والصور اراويهم أهلي واهله وبعض ربيعاتي والموضوع واايد حلو تفكيرج شرات تفكيري