شنو الي فادني والي شريته عالفاضي حيـأكم

صبـاح الخيــر كروشات عسى ربي يسهل عليكم كلكم وتقر عيونكم بشوفة بيبياتكم متعافيه بحضنكم

انا توني ولدت بشهر 10 وجبت ولد عسول عسى ربي يحفظه لي ويخليه ومثل كل بجريه كنت ماني عارفه شنو ابي وشنو ما ابي ولما اروح اتسوق للبيبي طبعا المحلات ملياااانه شغلات حلوه ماتعرفين شتاخذين وشتخلين وللمنتديات الي تقول انا خذت هذا وخذت واحنا نضيع بالوسط

طبعا هالموضوع صج للبكريات يستفيدون منه بس هم يمكن وحده والده من قبل وانا جربت شي هي ماجربته واستفدت منه افيدها

حياكم معاي بسم الله نبدأ

اول شي مخدة الرضاعه مثل الي بالصوره تحت

الصراحه انا هذي كلش ما استفدت منها للرضاعه الطبيعيه بس استفدت منها للرضاعه الصناعيه والحين بقولكم شلون, انا لما كنت ارضع طبيعي ماكنت اجندس علي جدام كنت ايب الياهل صوبي وانا متسنده هالقعده كانت مريحه لي ولولدي حتي امي كانت تستغرب بس تقولي وايد اريح لو تجندسين تتعبين فما كنت احتاج هالمخده واصلا ترا شغله كل مابترضعين تحطين هالمخدره داير مادار خصرج انتي يدوب بتشيلين البيبي من فراشه وتجيبينه يم صدرج ولا بنص الليل

بس استفدت منها الحين لما ولدي دش الاربع شهور قمت لما اعطيه المرضاعه ماخليه بحضني انومه عليها بحيث يكون جسمه مايل واعطيه هالشي اريحلي وهو بعد يرتاح وساعات ينام بمكانه

ننتقل للمراضيع

انا نوعين المرضاعه الي رسيت عليهم هم بيجون وجيكو

بيجون هذي معروفه وفي منها احجام وموجوده بكل مكان بيبي شوب الصيدليات وحتي الجمعيات بس عيبها حلمتها يابسه ومايبيها الياهل فكنت استخدم معاها حلمات بيبي شوب من ماركه JUNIORS مالقيت صوره لهم

وهذي مرضاعه جيكو وايد زينه وحلمات جيكو بعد زينه

وهالمرضاعه الصغيره الي فوق رقم واحد بس ريلي خذها لي وانفعتني واايد للماي والينسون وحلمتها لينه ولدي تقبلها من الولاده

ننتقل لجهاز تدفئه المراضيع الي خذته من جيكو

طبعا كلش ماستخدمته ولا احتجت اني استخدمه الصراحه انا كنت اعتمد عالحمام المائي في تدفيه المراضيع أأمن واسرع طريقه يعني اذا الحليب حار احط المرضاعه بكوب ماي بار واذا بارد العكس بس مادري يمكن في ناس استخدموه واستفادو منه يقولونلنا تجربتهم بس انا للأمانه ماستخدمته لحد الحين وطبعا حتي معقم المراضيع ماشريته المراضيع نغسلهم ونحطهم بالثلاجه هذي طريقه تعقيم عمليه ومتوفره يعني مالها داعي زياده الاغراض

الحين ننتقل لطاولة التبديل هذي وفي منها اشكال بس الفكره مثل الي بالصوره

الصراحه انا ماستخدمت هالطاوله في تبديل ولدي الا مره وحده وبعدها تحولت كبت وبس كنت استخدم فرشه التبديل الي في الصوره تحت واحطها عالسرير وعالارض واحط عليها مفرش ومخده صغيره مثل الصوره وابدله اريحلي وبعدين اذا بروح عنه شوي او بجيب شغله ما احاتي انه يطيح

طبعا في اشياء مهمه وضروريه لازم تكون عندج وكلها انواع زينه: مثل سرير البيبي, الكرسي الي يقعد وينام فيه, كرسي السياره, والعربانه انا خذت هالسوالف من جيكو بس صديقاتي بعضهم خذوهم من بيبي شوب ويمدحون نوعيتهم بعد

وبالنسبه للمصاصه انا ماكنت ابي اعطيها ولدي والحمدلله ماحتجت اني اعطيه وافتكيت من هالسالفه

الصراحه هذا الي ذكرته الحين من تجربتي واذا ذكرت شي ثاني برجع اكتبلكم عنه والي عندها سؤال لا تتردد والله يهون عالجميييع يارب