شوفو الصوره .فيكم وحده تعرفه يقولون عجييييب .يضعف بشكل رهيب

لاحبي أول مره أشوفه سوري

اول مره اسمع عنه والله يوفقج وتضعفين

منتجات هيربا لايف رائعه فعلا ,تجربتي مع هالمنتجات كانت تجربه مو بس ناجحه نزلوني 27 كيلو خلال فتره قياسيه مع رجيم ورياضه وكنت استخدم من ماركه هيربا لايف الحبوب +بودره اعشاب تخلط بالماء وتنشرب ,للاسف هالمنتجات مو متوفره بالكويت انا شتريتهم من شركه كانت تبيع كميه بسيطه منهم ونفذت وهالكلام من 3 سنوات واللي باعوني هالمنتجات عرضوا علي ان يسوون علي دعايه قبل وبعد لوووول بس انا ما رضيت طبعا لان فعلا وقتها الكل توقع اني مسويه عمليه ..للاسف انا بعد هالتجربه ونظرا لظروف كثيره مرت خلال هال3 سنوات رجع زاد وزني بالتدريج وانا الحين ادور وسيله ادعم فيها ارادتي الضعيفه

أنزين ماله أضرار

قلكسي انا لمن نفذت الكميه اللي عندي صراحه تكدرت وقتها وحاولت اطلبهم من بره عن طريق الانترنت بس للاسف اللي اعرفه ان شركات التوصيل ما تقدر اتدخل ادويه وهم موقعهم ما فيه نظام الطلب لان بس يشرحلج عن المنتجات على هذاك الوقت انا سويت سيرج بالقوقل ولقيت بنات يبيعونهم في مدونة بس باسعار عاليه واتوقع ان لو تسوين سيرج تلقين ناس تبيعها بالخليج بس بالكويت هني مو مرخصه والشركه اللي باعوني كانو بييبون وكاله المنتج خصوصا انه مافي له اضرار او موانع بس الظاهر صارتلهم مشكله مع وزاره الصحه بالترخيص او غيره انا من ناحيتي وقت لمن شريتهم وديتهم حق خالتي صيدلانيه اصلا طلعتلي من كبتها مثلهم وقالتلي هذول وايد زينين واللي عني هذول سامبلز معطينها الشركه بس تقول ما تدري ليش ما رخصوهم يمكن ما يبون منتجات ثانيه اطيح بجبدهم اتوقع السبب تجاري عموما مالج بالطويله اذا تبين تجربين سوي سيرج على اسم المنتج بالقوقل موجود لسبيلنق على اسم المنتج فوق بالصوره اما انا حاليا افكر بوسيله يديده ..افكر للاسف بالعمليات لان المسأله مسأله مو ضعف بس مسأله تضبيط القوام بكبرهاتوقع هذا موضوع يبيله شرح طويل يمكن اتكلم عنه بموضوع بروحه؛)

اصيله ,تجربتي هذي كانت مثل التحدي ترى لان قبل لا اكتشف هيربالايف كنت مشتركه بدايت سنتر لمده 3 شهور خلال ال3 شهور هذي ضعفت 9 كيلو وكانت اخصائيه التغذيه عندهم وايد مستانسه مني تقولي انتي من المميزين عندي انج نزلتي من وزنج وايد وكنت مستانسه صراحه بس في يوم من الايام صارلي موقف وياهم كان عندي موعد وكنت يايه بموعدي وانا تخيلي بدش جان يدخلون وحده قبلي موعدها طاف ويت متأخره وتغافلوني ودخلوها بوقت موعدي انا هني صراحه مت قهر وتهاوشت مع مالت الرسبشن قلت لها اللي دخلتيها بموعدي شنو احسن منس فيه؟ انا واهي دافعين فلوس شنو يعني انا اقعد انطر واهي تيي وتدش بارده مبرده وياليت داشه قبل موعدي بدقايق اقول يمكن ما اطول لا داشه بوقتي انا بالضبط لا وداشه من الباب وانا اللي قاعده انطر جان اقولها انا ماني مكمله وخلاص مابيكم وطلعت وانا خانقتني العبره اني الحين شلون بكمل رجيم؟؟؟ وشلون بضعف؟؟؟ سبحان الله وكانت لي خيره من ثاني يوم طحت على ورقه معطيتنياها بنت خالتي عن منتجات هيربالايف جان اقوم ادق عليهم واخذت التفاصيل ورحت شريت المنتجات وبديت رجيم بروحي اللي اهو اكل كل يوم الصبح توتتين "توست اسم مع الحبوب من منتجات المطاحن"+قطعه جبن سلايز"جبن المراعي بطعم البيتزا" لوووول – واروح الدوام لمن ارد بطريجي امر مطعم كبابجي اشتري "2ماعون فتوش و2 ماعون تبوله" هذول حق غداي وعشاي زيدي عليهم توستتين وجبنتين مثل الريوق يعيني غداي توسته وجبنه وسلطه وعشاي نفس الشي+اروح نادي فتره الممغرب اسوي رياضه الماي +يوم وترك اسوي مساج تخسيس خلال شهر واحد يااصيله نزلت 9 كيلو وهذا فعلا كان تحدي عشان كنت مقهوره من دايت سنتر ولمن دقوا يراضوني قلتلهم ليش ادفع 200 دينار عندكم انا بروحي نزلت خلال شهر اللي نزلته عندكم خلال 3 شهور وكملت عقب هالشهر تقريبا شهرين عقبها الناس قامت لمن تشوفني تبطل حلجها وطلعت علي اشاعه اني مسويه عمليه ..اصيله تبين تضعفين بسرعه 3 اشياء مفعولهم سحري اولهم مساج التخسيس ورياضه الماي وسلطه كبابجي وطبعا ما انكر ان هيربالايف ساعدني بس الثلث اشياء هذول فعلا مفعولهم سريييييييييييع