طبقين سهلين(مسخن بالزنجر+بيديان والنخي بدبس الرمان)

الطبق الاول من ابتكاري

الي اهو مسخن الزنجر وايد لذيذ ماتوقعته جذي

تشترين دياي زنجر نايف من الجمعيات ترا حار فلفل
وتقصيين بصل شرايح طويله+ كريمه الحامضه+ سماق(صماق)+خبز الصاج+ ليمون وزيت زيتون
+_+_+_+_+_
اول شي بالمقله حطي زيت زيتون وحمسي فيه شرايح البصل وحطي عليه قفشه صغيره صماق وشيلي البصل على جنب وبنفس المقلى حطي الزنجر وغطيه وقصري على النار عشان يستوي ويلين بدون مايتحمش وقلبيه على الويه الثاني وهم غطي المقلى بغطى وخليهم بس دقايق لما تشوفين لونه تغير وتحسينه استوى عاد بعدها حطي عليه قفشتين كبار كريمه حامضه مع عصير نص ليمونه وخليه يغلي شويه واخر شي حطي البصل عليهم(مايحتاج ملح الزنجر مالح)

حطي خبز الصاج على صحن كبير وقصي الزنجر اذا كان كبير بالطول نصين وحطي كل حبتين زنجر مع البصل على الخبز

ولفي الخبز وصفيه بصينيه فرن

ولفي كل الخبز بهالطريقه وحطيهم يم بعض وبقفشه رشي عليهم زيت زيتون

ورشي عليهم صماق

وسخنيه بالفرن وقت التقديم ترا ماياخذ وقت مجرد يسخن طلعيه وقصيه نصين

وزينيه على راحتج بس حلو مع الريحان والنعناع

+++++++++++++++++++

البيديان بالدبس حامض حلو ويعتبر مقبلات
اقلي شرايح البيديان المقشر والمملح بزيت زيتون وشيليه
وبنفس المقله اقلي شرايح بصل وحطي عليه ملح وفلفل اسود وبعدها حطي عليهم فصين ثوم مقصص وعلب فلفل مقصص وحمسيهم مع بعض وبعدها حطي قفشتين دبس رمان وقلبيه شويه وحطي عليهم علبه نخي والبيديان وقلبيهم
وقدميه مزين بالنعناع