طريقتي وطريقتكم في الورق عنب ؟

يم يم يطلع حده حامض تسلم ايدج

يسلمووو قلبي بس شنو انخليه 3 ساعات ع النار

يم يم تسلم ايدج

انا وصفاتي المعتمده 2.. بس احب اجرب دايم

اول طريقه اخذتها من طرق جارونه الحشوه تكون عيش صنوايت وشبنت وبقدونس وبصل ابيض و نص كوب ليمون ونص كوب زيت زيتون مع دارسين و بهار

واصف بقاع الجدر شرايح بطاط وطماط و بعدين اصف ورق العنب واصب فوقه الصلصه المتبقيه مع نص كوب ليمون و نص كوب زيت زيتون و وخلطه عباره عن ثوم مدقوق مع نعناع ومعجون وماجي .. واخليهم على الناي من ساعه ونص لي ساعتين

والطريقه الثانيه طريقه امي الله يرحمها

الحشوه عيش صنوايت مع بصل اخضر وبقدونس وطماط ونعناع طري و مجفف ( البقدونس والبصل شدتين والنعناع وحده) واخلط معاهم بهار وماجي وربع كوب ليمون واستكانه تقريبا زيت زيتون و قفشتين دبس رمان

واصف بقاع الجدر جزر و بطاط و شرايح ثوم( مو وايد) وطماط وشرايح بصل واصف ورق العنب فوقهم واخر شي الصلصه عباره عن صبار و باجي الصلصه مع ليمون او ملح الليمون حسب الرغبه وهم اخليه على النار لمده ساعتين على ما ينضج

وكل الطرق رووووعه

في طريقه ثانيه لورق العنب ذقتها عند وحده وعجبتني .. تحط جوز بالحشوه و قفشه قهوه ودبس رمان بالماي.. طعمها حلو وغريب>>> مو نفس سراي غير

وشوفي هالرابط نفس موضوعج تقريبا

http://q8yat.net/showthread.php?t=11980&page=2

أنا أموت عالحامض

تقريبــًا نفس طريقتي بس ماحب أكثر زيت الزيتون حتى لو انه صحي يبقى دهن وأنا تلوع جبدي من الدهون والاكل الدسم

المهم الحشوة مالتي أحط فيها لحم مفروم بس يكون مستوي وعيش مصري وابهارات وكركم ولومي وطماط ومرات ماجي واكيد لييييييييييموون

اطبخه بماي وملح بس واسوي مثلج اسكره بصحن مقلوب واحط عليه ثقل " جدر صغير فيه ماي " عشان ما يتفتح ورق العنب وتطلع الحشوة

لما اصفه احط بقاعة الجدر حلقات بطاط وبعدين اصف ورق العنب وبين كل صف والثاني احط حلقات طماط

ولما يخلص واطلعه من الجدر احط ثاني مره زيت زيتون غير اللي بالحشوة وعصير ليمون

عاد طريقتي عجيبة أكثر شي أضبطه المحاااشي

انا طريقتي بسيطه وسهله وفوق هذا ماشاء الله تبارك الله الكل يمدحها ويحبها

مقادير الحشو :
قلاصين عيش مصري مسلوق ربع سلقه
2 طماط كبار مفروم
2 بصل مفروم
2 فص ثوم مهروس
شدتين بقدونس مفروم
نص شدة نعناع مفروم
2 قفشه كبيره بهار حلو
ملح الليمون

فلفل اسود

مقادير الصلصة :-
2 قلاص ماي حار مذوب فيهم 4 مكعبات ماجي (علبتين )
1 قلاص ليمون
1 قلاص صبار
1 قلاص زيت زيتون
طبعا تخلطين المقادير السابقه مع بعض من غير الزيت وتجربين الطعم اذا حسيتي انه مو حامض وايد زيدي شوي ملح الليمون وذا صار العكس وحسيتي انه صار حامض وايد زيدي سكر شوي وذوقيه لين تحسين ان الطعم اوكي اخر شي حطي زيت الزيتون وصبيهم على ورق العنب