عايزة تعرفي اللبن او البيكينج بودر او الخميرة باظو ولا لا

السلام عليكم ورحمة الله وبركاته
بسم الله الرحمن الرحيم

ازاى تعرفى ان اللبن رايب قبل ماتغليه كله وتلاقيه قطع وراب وطعمه بيلسع وترميه رايب او لا قبل ما تغليه ؟

او البيكينج بودر تعرفيه ازاى فاسد ولا لا قبل ما تخترعى وتلاقى الاختراع فشل بسببه؟
ولا الخميرة اللى بتبقى كرثتها كبيرة وتقعدى تعجنى وفى الاخر تكتشفى انها فاسدة ؟

تعـــــــــــــــــــــــالى اقولــــــــــــــــــك ازاى

اولا اللبن تجيبى المعلقة الكبيرة بتاعة التوزيع وتاخدى بيها شوية لبن وتحطيها على البوتاجاز ولو غليت توكلى على الله واغلى اللبن وبالهنا والشفاولو قطع يبقى توكلى على الله وسيبه برا التلاجة لغاية لما يروب او تدفى الفرن شوية وتحطيه فى الفرن احسن يروب وتاكليه رايب او تعملى بيه قرص او لما يمسك تفضيه فى مصفاة وتغطيها بشاش وتحطى تحتها حلة وتعمليه جبنة قريش وبالهنا والشفا

تجيبى معلقة صغيرة لبن بارد وتحطى عليها شوية بيكينج بودر لو عمل فوران يبقى البودر تمام ولو مافارش ارميه طبعا واوعى تستعمليه

نيجي لخميرة البيرة طبعا انتى بتحطى عليها شوية سكر وتفظلى تقليبها لغاية ما بتدوب في السكر سيبها من ربع لنص ساعة لو مالقيتهاش اتخمرت وعليت ارميها ولو ارتفعت تبقى تمام او تحطيها فى شوية مية دافية وتسيبيها عشر دقايق وتشوفيها عليت ولا لا

الخميرة الفوريه تحطيها فى شوية ميه دافية وشوية سكر وتقليبها وتسيبيها عشر دقايق ولو ارتفعت تبقى تمامولو لا ارميها
وبالتوفيقات