عملية تكميمي الناجحه ،، نقطة تحول في حياتي .

السلام عليكم ورحمة الله وبركاته

الحمد لله الذي بنعمته تتم الصالحات

شلونكم يا أحلى بنات …
انا قاعده توصلني رسايل كثيره تستفسر عن عمليتي ،، وقررت اني اعرض تجربتي على الجميع علشان افيد الكل مثل ما استفدت من تجارب الاخوات في منتدانا الغالي ..

انا كانت معاناتي مع السمنه طوووول حياتي ،، وما خليت نظام غذائي ما اتبعته ولكن الفشل كان ملازمني لان للأسف ارادتي ضعيفه ،، واللي خلاني اتخذ هالقرار مرض السكر ومضاعفاته اللي بدت تنخر بجسمي ..
وبديت عقبها اقرا عن عمليات السمنه واشتركت بمنتدى الدكتور الفذ سلطان التمياط www.temyatt.com واللي فادني كثير بخصوص عمليتي وعطاني اجابات لكل الاستفسارات اللي كانت تدور في بالي عن عمليات السمنه ..

بعد ما اقتنعت بعملية التكميم صار وقت اختيار الجراح الشاطر ،، وقمت اسأل اغلب اللي اعرفهم وأجروا عمليات السمنه وكان دايما يتردد على اسم الدكتور خالد العنزي استشاري الجراحه العامه والمناظير ،، سبحان الله اسم هالشخص كنت اسمعه في مناسبات وايده واغلبها كانت بمحض الصدفه والكل كان يمدحه ويثتي عليه ،، لين قلت خلاص بقابل الدكتور خالد وعسى ربي يسهلي اموري معاه ان شاء الله ..

وفعلا زرته بعيادته اللي بالاميري وشرحلي بكل رحابة صدر عن العمليه وعن مضاعفاتها وقالي انها عامل مساعد لنزول الوزن لان الدكتور أساسا راح يستأصل 80% من حجم المعده العادي بما فيها غدة الجوع واللي تسبب لنا الشراهه في الاكل وتخلينا دايما ندور الأكل ،، وطبعا الدور الباقي على المريض انه ينظم اكله ويختار الأكل الصحي وما يتجاوز حجم معدته الجديد لأنها صارت مثل معدة الطفل..

عقبها طلب مني الدكتور اني اسوي بعض التحاليل وسونار للبطن وعلى ضوءها حددلي موعد العمليه ..

واللي كان يوم الأحد 28/3/ في المستشفى الاميري ، طبعا عمليتي كانت ناجحه بكل المقاييس ولله الحمد ،، والدكتور خالد الله يحفظه ويجزيه كل الخير أهنم فيني اخر اهتمام أثناء العمليه وبعدها ، وكان متواصل معاي حتى بعد اسبوعين من العمليه وهو يطمئن على حالتي، والله يعلم ان لو ما الدكتور خالد جان ما سويت العمليه لأني حاولت جم مره اني اتهرب واكنسل العمليه بس تشجيعه لي واصراره خلاني اتوكل على الله وأسويها والحمدالله كانت افضل قرار اتخذته بحياتي ..
بصراحه هذي اول عمليه لي في مستشفى حكومي وتفاجأت بالنظام والنظافه وبالخدمه اللي شفتها من هيئة التمريض في الجناح الثاني جراحه ومن كل العاملين في غرفة العمليات .. ومن الامور اللي خلتني اتعافى بسرعه اني تحركت ومشيت على طول عقب العمليه مع اني كنت حدي تعبانه من البنج بس الدكتور ما خلاني الا عقب ما درت الجناح خمس مرات ..

المفاجأه

فعلا كانت لما اكتشفت ان الدكتور ما حطلي بربيش !!! وسوالي اختبار الصبغه خلال العمليه !!! وانا كنت دايما اسمع عن العوار اللي يسببه البربيش عقب العمليه ,, وسوالي الغرز كلها تجميليه بالكبس …
(واختبار الصبغه اللي يحب يعرفه اهوا ان المريض يشربونه صبغه وياخذون له أشعه علشان يشوفون اذا ما في تسريب للمعده واللي عادة يسوونه ثاني او ثالث يوم من العمليه) ..

ثالث يوم شربت ماي وعصير تفاح وكليت جلي ،، وطلعت من المستشفى العصر بعد ما تطمن الدكتور على حالتي …

أول اسبوعين كانوا شوي صعبين علي لأن نظام حياتي كله تغير ،، نوعية الأكل يديده علي ،، لا روحات مطاعم ولا بيتزا ولا فطاير ،، كنت ما اقعد مع اهلي على طاولة الاكل علشان ما اتعب .. بس ولله الحمد من شفت الميزان تحرك والكيلوات بدت تنزل نسيت كل اللي مريت فيه ،، وصارت اموري عاديه الحين لأني عرفت حجم معدتي ومتى اقول ستوب …

عقب اسبوعين رديت الدوام وانا اشوف نظرات الاعجاب من كل اللي حولي ( قولوا ما شاء الله )

من كل قلبي اشكر كل من وقف معاي وشجعني اني اسوي عملية تكميم المعده (السليف) واخص بالذكر الأخوات ( كجب وانقلش مفن وتووونه وأنوار 87 وبنفسج وكتكوتا )

وانا حاضره لأي استفسار حبايبي …