فشلي بالارتباط من شخص للزواج للمرة الثانيه بسبب .!!!!

?

?
?
?
?
?
?
أخواتي الكريمات

بداية

ابي اشكر كل من
الغاليه نونو وأم ضاري وسيدة الذوق وعزّ لوقفتهم وياي
عسى الله يحفظهم ويحفظكم من كل مكروه

حبيباتي

بصراحة مدري شلون ابدأ موضوعي

لكن اللي قاعد يصير وياي مدري شلون اوصفه لكم

لكن من ضيقي وحالتي النفسية السيئة ابي اقول كل شي عندي

قبل فترة طويلة تقدم لي شخص عمره مناسب لعمري ومواصفاته حلوه
يعني فارق السن بينه وبيني كان تقريبا 5 سنوات

المهم قعدت انا وياه عدة مرات وتفاهمنا على كل شي لدرجة كنا نبي نقرى الفاتحة على نية القبول

وسبب الرفض منه تدرون شنو اهو؟؟

اني كنت عامله عملية بظهري
تدرون شنو اهي العملية؟؟؟

انا كان عندي انحناء بالعمود الفقري لما كان عمري 12 سنة
والطبيب قرر انه يعمل لي عملية تقويم للعمود الفقري
والعملية كانت عبارة عن وضع سيخ بلاتين على العمود الفقري لتقويمه
هذي اهي كل القصة
وبقى أثر بسيط جدا لمكان العملية

دكتوري قال لي : اني اقدر امارس حياتي مثل اي شخص طبيعي
واتزوج …..

المهم يا خواتي ابوي قال لي انه لازم نقول لهم عن عمليتج وانا ادري انه
عمليتج مو هالشي الخطير
قلت لابوي انزين انا موافقه نقول لهم

وبعد ما قلنا لهم….. قالولنا انه كل شي نصيب

هذا فشلي الأول

فشلي الثاني:
ومعظم البنات هني يعرفون عنه
انه تقدملي شخص ثاني
اهو صحيح أكبر مني والفارق بينا 24 سنة
وكان متزوج وعنده بنات ثنتين وحده عمرها 7 سنوات والثانيه 12 سنة
لكن انا قلت هذا الشخص رح يكون انسان فهمان وعاقل ورح يتفهم وضعي
وصليت الاستخارة أكثر من مرة
وتمت الموافقه والقبول بينا
ولا شنو بعد …. تمت الملجة وشرينا الذهب
وكان المفروض ماكو حفلة لانه امي الله يرحمها ماصارلها 5 شهور متوفيه

انا يا خواتي قعدت وياه وانا بنفسي قلت له اني كنت عامله عملية بظهري وعطيته اسم دكتوري
حتى يتأكد منه ويتطمن أكثر..
قال لي وقتها مايخالف وخلي هذا الشي بينا وانسي الموضوع
وهذا الكلام صارله تقريبا اسبوع وصار قبل الملجة

المهم
بالأمس تقريبا الساعه 10 اتصل عمه مع ابوي وصار يقول له:
((والله يا أبو……… احنا ما شفنا منكم الا كل خير وانتو ناس ماشاءالله عليكم ومن هالكلام..
وبصراحة: ولد اخوي يعتذر وايد ويقول لكم انه كل شي قسمة ونصيب لانه خايف انه ييب
مرت ابو لبناته ونعتبر كل شي انتهى بينا))
لعلمكم يا خواتي : بالنسبة لبناته احنا كنا متفقين على كل شي بالنسبة لهم ولتربيتهم واهو
كان راضي وموافق
لكن انا اليوم الصبح اتصلت مع سكرتيرة دكتوري واهي تعرفني من زمان
وقالت لي انه أخت المعرس يوم الخميس اللي طاف زارت دكتوري
وسمعت كل اللي صار بينهم لانه الباب كان مفتوح
والطبيب طمنها انه كل شي طبيعي عندي وما علي الا العافيه

لكن للأسف شنو اقول
عقول الناس اللي مدري شلون تفكر وتقرر

يعني بعد ما دخلت الفرحة لقلبي طلعت منه بسرعة مليون

انا صار عندي عقدة نفسية من الزواج… خلاص

تدرون انا كل ليلة شنو يصير وياي لما أكون بداري
اقعد اتخيل نفسي اني عروس ولابسه البدلة البيضه اللي كنت بنت تتنمى انها تلبسها
وعريسي يمي وكل الناس فرحانه فيني ويرقصون
هذا اللي قاعد يصير وياي كل ليلة
اكيد قاعدين تقولين عني اني مينونه
انا ما عاد يهمني شي بهالدنيا من بعد عين امي الله يرحمها

لكن الحين انا مالي غير هالتخيلات في كل ليلة
ورح اعلق ورقة على باب بيتنا اني عامله عملية بظهري
اللي عاجبه يدق الباب ويسمع الجواب
واللي مو عاجبه يروح يدق باب ثاني
لانه كافيني جرح كافيني

وحسبي الله ونعم الوكيل على اللي يجرحون مشاعر الناس

حسبي الله ونعم الوكيل