قروب لنظام السعرات الحرارية رشاقتنا بصحه وعافيه approaved

السلام عليكم ورحمة الله وبركاته

كل مرة ابلش قروب واوقف مادري ليش

مشكلتي انا نوعي ملولة وغير جذي كنت ارجع من الدوام تعبانه مافيني شده اسوي اكلي فاخربط

مرة اتبعت نظام السعرات وكنت ادخل اكاونت the_diet_ninja بانستغرام واطلع الاكل اللي يرشحه ويسمح فيه والحمدلله ضعفت كيلو شحم بكل اسبوع

لاتستهينون بكيلو الشحم مو شويه

بس كنت اروح الممشى وامشي بضمير

الحين طشت من البلعه وابي ارجع على النظام لان حيل ريحني

وعلى فكرة بالبداية تتعبون بالحسابات لكن مع الوقت تتعودون واصلا تسوون الاكل بكميات عارفينها بدون لاتطالعون الكالوريز

وببداية كل ريجيم طبعا اول اسبوع ممكن يصير شوية يوع لكن مع الوقت تصغر المعده

بعض النقاط المفيدة:

انا ماكنت امشي على الكالوري بس
ممكن تكةن كمية الدهون والسكريات عاليه وكمية البروتين والالياف نازله
فكنت ادور شغلات عالية البروتين والالياف وقليلة الكربوهيدرات او السكريات والدهون

معلومة
الشغله اللي مكتوب عليها لايت او قليلة الدسم اشلون تعرفون اذا هالشي صحيح والا خربوطه
شوفو المعلومات اذا نسبة الدهون نص نسبة البروتين معناته صح اما اذا اكثر فمعناته خربوطة
مثال:
شغله فيها 6 غم بروتين و3.5 غم دسم
هذا صح لايت

لاتعصرون شي بالعصاره كل شي ضربوه بالخلاط علشان الالياف

الفواكه عالية بالسكر اختارو الانواع والكميات بذكاء

الخضار اكلها بكذا طريقة مثال خضار مثلجه اطبخها عالبخار واعصر عليها ليمون وملح وفلفل
او بطريقة سلطة

وانا وااااااااااايد احب الحلو فكنت اشتري حلويات دايت كير او لو فات او هيلث كومباني من الجمعيه

عدد السعرات الحرارية اللي يحتاجها الجسم:

يعتمد من جسم لي جسم ولحساب عدد السعرات اللي يحتاجها الجسم للقيام بالوظائف اليوميه العاديه عبارة عن
(الوزن كجم × 24 (عدد الساعات باليوم) × نسبة النشاط)
نسبة النشاط:
1.3 غير نشيط
1.4 متوسط النشاط
1.5 نشيط جدا

مثال: وزني 77 كجم ومتوسطة النشاط

(77×24×1.4 = 2587 كالوري)

علشان اضعف لازم اخذ اقل من هالعدد
لان اذا السعرات اللي تدخل الجسم اقل من اللي محتاجها يحرق من الجسم
وعلشان نضمن ان يحرق من الشحم مو الماي او العضل لازم رياضه لو نص ساعه باليوم وشرب ماي وايد

يقولون نص كيلو شحم يحتاج حرقه 3500 كالوري
يعني اذا قللتو من حاجتكم باليوم 500 كالوري
في اسبوع 500×7 = 3500 كالوري

وعلشان تحرقون كيلو بالاسبوع قللو من حاجتكم 1000 كالوري باليوم

يعني بالنسبه لي اخذ 1500 كالوري و العب رياضه نص ساعه باليوم ويكفي اضعف كيلو بصحه وعافيه كيلو بالاسبوع باذن الله

وكل وحده حسب جسمها

يالله من معاي