قصتي مع العمليات 7

سنه 1999 كانت خطبتي على رجل وهوه وحيد اهله ويوم الخطبه خالتي ام زوجي قالت لي انا ما ابي منج غير" احمد ومحمد ومحسن "
وتزوجنا وسويت احلى عرس الحمدالله وبعدها خالتي عطتنها هديه زواجنا سفره لامريكا كانتاحلى ايام حياتي زوجي كان رجل طيب وخلوق ويحبني وخالتي بعد كانت تحبني وايد……..

وبعد سنه من زواجنا ما صار حمل…….. امي خذتني حق الدكتوره فوزيه القطان وسويت التحاليل كلها الحمدالله كنت سليمه وما فيني شي….. بس الدكتوره قالت خل نسوي تلقيح صناعي وفعلا بنفس الشهر اخذت حبوب وبعدها الابره التفجيريه…ويوم التلقيح كانت الصدمه… زوجي فيه ضعف عدد وحركه بالحيوانات المنويه وقالت ما لكم غير الحقن المجهري ومرت الايام وسوينه العمليه والدكتوره زرعت فيني 3 اجنه وقالت بعد اسبوعين النتيجه وخالتي فرحت واايد وقالت للكل ان انا حامل بتوم وكلنا مستانسين لكن بعد اسبوع من الترجيع نزلت علي الدوره وكلنا زعلنا

وبعد سنتين من زواجنا زوجي طلع لبعثه دراسيه خارج الكويت وسافرت معاه هوه درس هندسه طيران 5 سنوات وانا باكلريوس 4 سنوات ومرت الايام وكانت الغربه صعبه حييييييل وقررنا بالسنه الخامسه اسوي العمليه للمره الثانيه بس من غير ما نقول حق خالتي………….. وزوجي حط الفراش بالصاله عشان ما اتحرك واكون تحت عينه وهوه يدرس وطول الفتره كنت متفائله وبعد الاسبوعين حللت ولكن للاسف مو حامل

رجعنا الكويت بالشهاده وخالتي فرحت ان ولدها اكبر مهندس بالكويت ومرت السننين وكررت العمليه بدار الشفا عند الدكتور مصطفي 3مرااات
لكن للاسف ما صار حمل……….الحمدالله على كل حال

ولكن الصدمه ان خالتي فيها مرض سرطان بالرحم وبتسافر علاج بامريكا وماكو غيرنا يسافر معاها لان ولدها الوحيد وسافرنا وانا كنت اغسلها واطبخ لهم وشايلتها وبوسط العلاج وصل خبر لنا ان فتحو العلاج بالخارج لحالات العقم وخالتي رفضت العلاج وقالت لازم ترجعون الكويت تقدمون على العلاج ورجعنا الكويت وخالتي كملت علاجها بالكويت وزوجي بلش بأجراءات السفر

وانا الحين بامريكا للمره الثالثه مو شهر عسل ولا علاج حق خالتي……….عشان الذريه" رب لاتذرني فردا وانت خير الوارثين"

سويت العمليه للمره 6 بأحسن مستشفى بالعالم والدكاتره ستغربو 5 مرات ولا مره حملتي على الاقل تكونين حامل مرتين
قلت زيييييين يعني بحمل هالمره والشهر الي طاف حللت …………….الحمدالله والشكر عل كل حال مو حامل

خالتي اتصلت قالت مو معقوله ما حملتي 4 شهور وانتو بامريكا وما صار شي اكيد انتي حامل وخاشه عني وقالت انا بعد اسبوع عندكم بطمن عليكم والحين خالتي عندنا

وانا الحين بلشت بالعمليه رقم 7 وناطره النتيجه بعد 5 ايام…………….هل بكون حااامل او مثل باقي العمليات

اتمنى الي تقرا قصتي تدعيلي وتدعي حق كل محرومه من الذريه الصالحه

يارب بهذا الشهر الفضيل اكون حامل وحق كل محرووومه من الذريه