كانلوني الدياي .بس بخبز الصاج

السلام عليكم خوات كويتيات
-جيس خبز صاج
-ديايه او صدور دياي على حسب رغبتج
-مشروم
-ملفوف ابيض(لهانه)شرائح رقيقه
-جزر مبشور
-بصل جوانح رقيقه
-مكعب ماجي
-فلفل اسود,ملح
-زيت للقلي
-جبن موزاريلا
-كريمه حمرا حسب كمية الصاج وحجم البايركس
انا اسوي بالبايركس الوسط احط 2 عشان تتشرب
-اول شي نسلق الدياي بالبهارات ونشيل الزفره منها مدة ساعه لييييييييييييييييين تنضا تمام
-ثاني شي اذا كانت ديايه كامله نسحبها من العظام ونتف الدياي واذا صدور بس نتف الدياي
-ثالث شي نحمس البصل بالزيت ونحط فوقه الملفوف وبعدين المشروم واخر شي الجزر ونحط مكعب الماجي والملح والفلفل ونحمسهم زين لين يذبلون,وبعدين نحط الدياي فوق الحمسه ونخلطهم عدل
-ورابع شي تقصين خبزة الصاج بالنص بس ديري بالج لانها خفيفه وايد ودلوعه

يستحسن تشترين جيسين خبز لانه بسرعه يتنتف(لاني دفاشه)وتحطين الحشوه بالخبزه وتلفينها زين وتصفينها بالبايركس لين تخلص الكميه اللي عندج
-خامس شي تصبين الكريما فوق الخبز وتدششينه الفرن مدة 20 دقيقه تقريبا لين تبقبق الكريمه
-اخر شي تطلعينه من الفرن وتغطينه بالجبن كثري من الجبن وشبي الفرن من فوق وخليه لين تسيح الجبنه

وبالعافيه على قولوبكم
بس لاتكثرون لانها تمتن