كف القدر

*(( كف القدر ))*

على كف القدر والحب ظامي والرجا حيران
على كف الزمن ضاعت سنيني مع لياليها

تضيع بداخلي بسمه ويظهر للشقا عنوان
واذا بانت بوادرها عذاب الهجر يخفيها

واحس ان الجفا يمشي بدمي داخل الشريان
يعذبني..يسهرني..ليالي مر حاليها

عجزت ولابقابي حيل وانفاس الوصل هجران
تعبت اسأل ليال الصمت جروحي كيف أواديها؟

تجاوبني ليال الصمت وتحرق قلبي الهيمان
تقول:شموع امالك حلفت اني لطفيها

مدام انك على دربي ابعطيك العذاب الوان
وازيد جراحك بصدرك ولا لك من يشافيها

ياليت اقوى ولو لحظه اسلي خاطري بنسيان

الم جروحي واهاتي من الدنيا وبلاويها

نخيتك ياامل ضايع نخيتك تطوي الحرمان
نخيتك ترسم الفرحه على حزني وترضيها

والا يالله يارازق عبادك يارفيع الشان
تفرح قلبي الملهوف قبل مااروح تنهيها